ʻOku ʻIkai Ha Taha ʻe Haohaoa

Kuó u fakaʻānaua maʻu pē ke u hangē ko Nīfaí: ʻo talangofua kakato, mātuʻaki faivelenga, pea mo anga fakalaumālie ʻaupito. Ko e anga ʻeku vakaí, ne hoko ʻa Nīfai ko e sīpinga taupotu taha ʻo e leleí. ʻOku siʻi ha ngaahi meʻa ʻe toe mahuʻinga kiate au ka ko e foʻi fakakaukau ke tupu hake ʻo tatau tofu pē mo iá—pe ko haʻate kamata pē ā ke maʻu ha konga ʻo ʻene leleí.

ʻI ha ʻaho ʻe taha ne hoko ai ha kiʻi palopalema kiate au, tupu ʻi heʻeku ongoʻi taʻetāú. Ne ʻi ai haʻaku ngaahi fakaʻānaua mo ha ngaahi taumuʻa lahi pehē. Ka naʻe hangē naʻe ʻikai pē ke ʻi ai haʻaku kiʻi fakalakalaka. ʻI he loʻimata ʻo e ʻamanaki tō noá, naʻá ku fakahā leva ʻa e ngaahi ongo ko ʻení ki heʻeku tangataʻeikí. Naʻá ne tuʻu pē he taimi ko iá ki ʻolunga, ʻo laka atu ki he tukuʻanga tohí, ʻo ne toʻo mai ha taha ʻo ʻene ngaahi Tohi ʻa Molomoná. Naʻe ʻikai ke ne puʻaki ha foʻi lea, ka naʻá ne fakaava ia ki he 2 Nīfai 4 ʻo ne kamata lau ʻa e veesi 17.

ʻI heʻeku fanongo ki he ngaahi lea mamafa ko ʻení, ne u tuʻutuʻukina pea mafola ia ʻi hoku sinó ʻo hangē ha ʻuhilá: “ ʻOiauē ko e tangata loto-mamahi ko au!” Ne ʻalu ai ʻeku fakakaukaú. ʻOku anga fēfē ke pehē ʻe Nīfai, ʻa e moʻungaʻi tangata mo hoku faʻifaʻitakiʻangá, ʻoku “loto mamahi”? Kapau naʻe loto mamahi ia, ʻoku fēfē leva au?

Ka, ne toe mafola ʻa e ongo tatau pē ʻiate au ʻi hono lau heʻeku tangataʻeikí ʻa e veesi 28: “ ʻĀ hake, ʻe hoku laumālie! ʻOua te ke toe vaivai koeʻuhí ko e angahalá.” Naʻe ongo kiate au ʻo hangē kuo mavahe atu ʻa e ngaahi ʻao fakapoʻulí mei hoku ʻatamaí ʻo ne fakaʻataʻatā ha hala ke ʻasi mai ʻa e māfana mo e fakaʻofoʻofa ʻo e langi tafitongá mo e laʻā ngingilá. ʻOku ʻikai malava ke fakamatalaʻi e founga ne fakamāmaʻi ai ʻe he vēsí ni hoku laumālié. ʻOku siʻi pē ha ngaahi veesi ʻi he folofolá kuó ne fakafonu ʻaki au ha ʻamanaki lelei, ongo fakalaumālie pea mo ha fiefia pehē ʻo tatau mo ʻení.

ʻI he veesi 30, naʻe lea ʻaki ai ʻe Nīfai ʻa e meʻa tofu pē naʻá ku fakakaukauʻí, ka ʻi ha ngaahi lea mahino ange: “ ʻE fiefia ʻa hoku laumālié ʻiate koe, ko hoku ʻOtuá, mo e maka ʻo hoku fakamoʻuí.” ʻOku ʻomi ʻe he veesi ko ʻení ha ngaahi ongo ʻo e nonga mo e houngaʻia ʻi he ʻaloʻofa ongongofua pea mo e ʻofa ʻa e ʻEikí.

Naʻe tāpuni leva ʻe heʻeku tangataʻeikí ʻa e tohí ka ne fakamatala mai ʻoku faʻa ui ʻa e ngaahi veesi ko ʻení ko e saame ʻa Nīfaí. Peá ne toki akoʻi fakalelei leva au, naʻa mo e kakai maʻongoʻonga taha he funga māmaní ʻoku ʻikai ke nau haohaoa, pea kuo pau ke fakatokangaʻi ʻe he kakai ko ʻení ʻa ʻenau ngaahi tōnounoú he ka ʻikai, te nau hīkisia pea ʻikai ke nau maʻongoʻonga.

Naʻe mahino kiate au. ʻOku ʻikai ʻuhinga ʻa e ʻi ai hoku ngaahi vaivaí te u taʻe-malava ai ke hoko ʻo tatau mo Nīfai. Naʻe ʻomi ʻe heʻeku fakatokangaʻi hoku ngaahi vaivaí ke u ofi ange ai ki he tuʻunga ʻo Nīfaí. Naʻe maʻongoʻonga ʻa Nīfai he naʻe ʻikai ngata ʻi heʻene talangofua pea mo faivelengá, ka naʻá ne loto fakatōkilalo mo fie vete ʻa ʻene ngaahi fehālākí.

Talu mei he meʻa ko ia ne hokó, mo ʻeku mataʻikoloaʻaki ʻa e ngaahi lea ʻa Nīfaí. Ko e taimi kotoa pē ʻoku ou lau ai kinautolú, ʻoku ou maʻu ʻa e ngaahi ongo mo e ueʻi fakalaumālie tatau mo ia ʻi he ʻuluaki taimi naʻá ku lau ai kinautolú. ʻOku fakaongo mai ʻe he ngaahi vēsí kiate au ko ha ʻofefine au ʻo e ʻOtuá, ʻoku ou malava ha meʻa pē ʻo mahulu atu ʻi he meʻa ʻoku ou fakakaukau atu te u lavá. ʻOku ou ʻiloʻi kapau ʻoku ou faivelenga mo tuiaki atu ki muʻa, ʻoku ʻi ai ha ngaahi tāpuaki fufū ʻoku tokateu mai.