Konifelenisi Lahí

ʻOua naʻa ngalo: ʻe fakahoko ʻa e fakataha lahi ʻa e Kau Finemuí ʻi he ʻaho 27 ʻo Māʻasí, pea ʻe fakahoko ʻa e konifelenisi lahí ʻi he ʻaho 3 mo e 4 ʻo ʻEpelelí.

Ko e hā ʻa e konifelenisi lahi? Ko ha fakataha fakaemāmani lahi ʻa e Siasí, ʻoku fakahoko tuʻo ua he taʻu—ʻi he fakaʻosinga ʻo e ʻuluaki uike ʻo ʻEpelelí mo ʻOkatopá. ʻOku ʻikai ō ʻa e kāingalotu ʻo e Siasí ki he ngaahi fakataha angamaheni ʻo e Sāpaté, ka ʻoku nau fakataha ke maʻu e faleʻi ʻa e palōfitá, hono ongo tokoní, kau ʻAposetolo ʻe Toko Hongofulu Mā Uá, mo ha kau taki kehe ʻo e Siasí.

ʻOku fakahoko ʻa e konifelenisi lahí ʻi Sōleki Siti ʻi ʻIutā, pea ʻoku fakahoko ia ʻi ha ngaahi fakatahaʻanga ʻe fā ʻoku taki houa ʻe ua maʻá e kāingalotú kotoa pea mo ha fakatahaʻanga houa ua ʻe taha maʻá e kau maʻu lakanga fakataulaʻeikí. ʻOku maʻu konifelenisi ha kāingalotu ʻe niʻihi ʻo e Siasí ʻi he Senitā Konifelenisí ʻa ia ʻoku ʻi ai ha sea ʻe 21,000, ka ko e tokolahi tahá ʻoku nau maʻu ia ʻi hono fakamafolá. ʻOku lava ha ngaahi feituʻu ʻe niʻihi ʻo mamata hangatonu ki he konifelenisi lahí. Ko e ngaahi feituʻu ʻe niʻihi te nau maʻu ha vitiō pe lea ʻo e konifelenisí kuo ʻosi hiki, ʻi ha taimi nounou hili pē ʻa e ngaahi fakamafolá. Vakaiʻi ki homou kau taki lakanga fakataulaʻeikí pe ki he www.conference.lds.org fekauʻaki mo e fakamatala ki he ngaahi taimi ʻo e fakamafolá pea mo e ngaahi feituʻú.

Hili e konifelenisí, te mou kei lava pē ke lau mo ako ʻa e ngaahi pōpoaki ʻo e konifelenisi lahí ʻi he ngaahi makasini Liahona ʻo Mē mo Nōvemá.

Ko e fakataha lahi ʻa e Kau Finemuí—ko ha fakataha ki māmani kotoa maʻá e kau finemui taʻu 12 ki he 18, ʻenau ngaahi faʻeé, mo e kau taki ʻo e Kau Finemuí—ʻoku fakahoko ia he taʻu kotoa pē ʻi Māʻasi, pea ʻoku fakahoko leva ʻa e fakataha lahi ʻa e Fineʻofá ʻi Sepitema. ʻOku fakamafola ʻa e ongo fakatahá ni ʻi he efiafi Tokonaki ʻo e uike ki muʻa he konifelenisi lahí.