Kuo fakalāngilangiʻi ʻe ha kautaha tuʻuaki mo fakamāketi ʻi Uāsingatoni D.C. ha fakamatala tokoni ki he kakaí ne faʻu ʻe he Siasí. Ko e “Swashbucklers,” ko ha fakamatala nounou ia ki he mahuʻinga ʻo e tuʻunga fakaetamaí, naʻe fakalāngilangiʻí koeʻuhí ko ʻene kaunga tonu, lelei hono faʻú, pea makehe ʻa ʻene tuifio ai ʻa e fakafiefiá, fakaolí, pea mo ʻene fakamāfaná, ʻo fakatatau mo e Savea Fakafonua ʻa e Ongoongó (National Media Survey). Ko e fakamatala tokoni ki he kakaí ko ha konga ia ʻo ha ngaahi polokalama ʻoku hokohoko ki he ʻApí. ʻE lava ke mamataʻi ʻi he sēnolo MormonMessages YouTube, www.youtube.com/mormonmessages. Kumi ki he “swashbuckler.”

Ne foaki ʻe he Kautaha ki he ʻŌtisimi ʻa ʻIutaá ki he Siasí ʻene Pale Fakataʻu ki he Kautaha Lelei Tahá ʻi he ʻaho 14 ʻo ʻOkatopa 2009, ko hono fakapaleʻi ʻo e Uepi saiti ʻo e Ngaahi Maʻuʻanga Tokoni ʻa e Siasí ki he Faingataʻaʻia Fakaesinó. ʻOku ʻomi ʻe he uepi saití ni ha ngaahi maʻuʻanga tokoni ki he kakai ʻoku ʻi ai hanau ngaahi faingataʻaʻia fakaesinó—hangē ko kinautolu ʻoku tulí, kuí, faingataʻaʻia ke leá, faingataʻaʻia ke ako pea toe lahi ange—pea mo honau kau tauhí, fāmilí, mo e kau taki ʻo e Siasí. ʻE lava ke maʻu ʻeni ʻi he www.disabilities.lds.org.

Ne kau fakataha ha kakai ʻe toko 170 tupu mei ha ngaahi siasi kehekehe ʻe ono, kau ai ʻa e Siasí, ʻi ha fakaʻaliʻali hiva naʻe ui ko e “Ko e Haʻofanga Hiva Fakaʻekumenikale—Leʻo Taha ʻi he Hivá mo e Fakahīkihikí” (An Ecumenical Musical Gathering—One Voice in Song and Praise) ʻi Letimoni ʻi Uāsingatoni ʻi ʻAmelika he 2009. Naʻe tataki ʻe he Siasi Katolika Seni Suté ʻa e polokalamá—pea kau foki mo e siasi ʻIngilaní, Pelesipitiliané, Lūteló, mo e Metotisí—ʻi he fakamālō ki he ngaahi kaungā siasí mo e koló ʻi heʻenau poupou ki he [Kolo Tēniti Fika 4], ʻa ia ko ha nofoʻanga fakataimi ki he kakai ʻo e feituʻú ʻoku ʻikai hanau ʻapí.