2010
ʻOku Fakamoʻoni ʻa e Laumālie Māʻoniʻoní ki he Moʻoní
Māʻasi 2010

Ko e Meʻa ʻOku Tau Tui Ki Aí

ʻOku Fakamoʻoni ʻa e Laumālie Māʻoniʻoní ki he Moʻoní

Ko e Laumālie Māʻoniʻoní ko e mēmipa ia hono tolu ʻo e Toluʻi ʻOtuá. Ko ha taha ia ko e laumālie, ʻoku ʻikai hano sino ʻo e kakano mo ha ngaahi hui (vakai, T&F 130:22). ʻOku faʻa ui ia ko e Laumālié, ko e Laumālie Māʻoniʻoní, ko e Laumālie ʻo e ʻOtuá, ko e Laumālie ʻo e ʻEikí, pe ko e Fakafiemālié. ʻOku fengāueʻaki uouangataha ʻa e Laumālie Māʻoniʻoní mo e Tamai Hēvaní mo Sīsū Kalaisi.1

ʻI hono tuʻunga ko e laumālié, ʻoku lava ai ʻa e Laumālie Māʻoniʻoní ke ʻi ha feituʻu pē taha ʻi ha taimi, ka ko Hono mālohí ʻe lava ia ke ʻi he potu kotoa pē ʻi he taimi tatau.2

Naʻe akonaki ʻa Palesiteni Siosefa Filitingi Sāmita (1876–1972) ʻo pehē, “[ʻOku lalanga ʻi he Laumālie Māʻoniʻoní ʻa e moʻoní ki he kihiʻi konga kotoa ʻo e sinó koeʻuhí ke ʻoua naʻa teitei ngalo].”3

Pea ʻoku makatuʻunga foki ʻi hono maʻu ʻo e Laumālie Māʻoniʻoní ʻi he taimi ʻoku tau fakatomala ai mo papitaisó ʻa e malava ke fakamāʻoniʻoniʻi kitautolú. Ko e fakamāʻoniʻoniʻí ko e founga ia ʻoku tau tauʻatāina ai mei he angahalá—ʻo haohaoa, maʻa, mo māʻoniʻoni—tuʻunga he Fakalelei ʻa Sīsū Kalaisí (vakai, Mōsese 6:59–60). ʻOku fakamāʻoniʻoniʻi kitautolu ʻi he taimi ʻoku tau momoi ai hotau lotó ki he ʻOtuá (vakai, Hilamani 3:35).

  1. ʻOkú ne “fakamoʻoniʻi ʻa e Tamaí mo e ʻAló” (2 Nīfai 31:18). Te ke toki lava pē ʻo maʻu ha fakamoʻoni pau ki he ʻOtua ko e Tamaí mo Hono ʻAlo ko Sīsū Kalaisí ʻi he mālohi ʻo e Laumālie Māʻoniʻoní.4

  2. ʻOku fakamoʻoni ʻa e Laumālie Māʻoniʻoní ki he moʻoní, pea ʻoku makatuʻunga ʻi Hono mālohí ʻa ʻetau “lava ai ke ʻiloʻi hono moʻoni ʻo e ngaahi meʻa kotoa pē” (Molonai 10:5).

  3. ʻOku akoʻi mai ʻe he Laumālie Māʻoniʻoní ʻa e ngaahi meʻa kotoa pē mo fakamanatu kiate kitautolu ʻa e ngaahi meʻa kotoa pē ne tau ʻilo kau ki he ʻEikí mo ʻEne ongoongoleleí (vakai, Sione 14:26).

  4. ʻE hanga ʻe he Laumālie Māʻoniʻoní ʻo “fakahā kiate [kitautolu] ʻa e meʻa kotoa pē ʻoku totonu ke [tau] faí” (2 Nīfai 32:5). Te ne lava ʻo fakahinohino kitautolu ʻi heʻetau ngaahi filí mo maluʻi kitautolu mei he ngaahi fakatuʻutāmaki fakatuʻasinó mo fakalaumālié.

  5. ʻE fakaava ʻe he Laumālie Māʻoniʻoní ʻa [hotau] ʻatamaí pea mo [hotau] lotó ki ha maama mo ha mahino ʻoku toe lahi ange.5

  6. ʻOku tāpuekina kitautolu ʻaki ʻa e ngaahi meʻafoaki ʻo e Laumālié ʻo fakafou ʻi he Laumālie Māʻoniʻoní. ʻOku tāpuekina ʻe he ngaahi meʻafoakí ni ʻa ʻetau moʻuí pea mo e moʻui ʻa kinautolu ʻoku tau ʻofa ai mo tokoniʻí. (Vakai, 1 Kolinitō 12:1–12; Molonai 10:8–18; T&F 46:11–33.)

  7. ʻOku ui ʻa e Laumālie Māʻoniʻoní ko e Fakafiemālié koeʻuhí he te Ne lava ʻo fakafonu kitautolu ʻaki ʻa e “ ʻamanaki leleí mo e ʻofa haohaoá” (Molonai 8:26).

  8. Ko ʻĀtama ʻa e fuofua tokotaha he māmaní ke papitaiso mo maʻu ʻa e Laumālie Māʻoniʻoní (vakai, Mōsese 6:64–66).

  9. ʻOku fakamāʻoniʻoniʻi kitautolu tuʻunga ʻi he mālohi ʻo e Laumālie Māʻoniʻoní, ʻi he taimi ʻoku tau fakatomala pea papitaiso mo hilifakinima, mo tau feinga ke talangofua ki he ngaahi fekau ʻa e ʻOtuá (vakai, Mōsaia 4:1–3; 5:1–6). ◼

Maʻuʻanga Fakamatalá

  1. Vakai, Tuʻu Maʻu ʻi he Tuí (2004), 99–100; Malangaʻaki ʻEku Ongoongoleleí (2004), 90–91.

  2. Vakai, Ngaahi Tefitoʻi Moʻoni ʻo e Ongoongoleleí (2009), 32.

  3. Joseph Fielding Smith, Doctrines of Salvation, ed. Bruce R. McConkie, 3 vols. (1954–56), 1:48.

  4. Vakai, 1 Kolinitō 12:3; Tuʻu Maʻu ʻi he Tuí, 100.

  5. Vakai, ʻĪnosi 1:3; Malangaʻaki ʻEku Ongoongoleleí, 20.

Pea naʻe hoko ʻo pehē ko au, Nīfai, ʻi he hili ʻeku fanongo ki he ngaahi lea kotoa pē ʻa ʻeku tamaí, … [ʻa ia] naʻá ne lea ʻaki ʻi he mālohi ʻo e Laumālie Māʻoniʻoní, ʻa ia ko e mālohi naʻá ne maʻu ʻi he tui ki he ʻAlo ʻo e ʻOtuá— … ko au, Nīfai, naʻá ku fakaʻamu foki ke u lava ʻo mamata, mo fanongo, mo ʻiloʻi ʻa e ngaahi meʻa ko iá, ʻi he mālohi ʻo e Laumālie Māʻoniʻoní, ʻa ia ko e meʻa-foaki ʻa e ʻOtuá kiate kinautolu kotoa pē ʻoku fekumi faivelenga kiate iá” (1 Nīfai 10:17).

Faitaaʻi ʻe Craig Dimond, David Stoker, Welden C. Andersen, Derek Israelsen, Matthew Reier, mo Christina Smith; tā fakatātaaʻi ʻo Nīfaí ʻe Jerry Thompson; ʻĀtama mo ʻIví, tā ʻe Lonni Clarke