ʻE ʻOtua Ko e Tāpuhā

Naʻe toki ʻosi pē ʻeku fakahoko ʻa e papitaiso maʻá e kau pekiá ʻi he taimi naʻá ku maʻu ai ʻa e pōpoaki kuo siʻi mālōlō ha taha ʻo hoku ngaahi kaungāmeʻa mamaé. Ko ha talavou lelei moʻoni ʻeni, pea naʻe lahi ʻema fiefia fakataha ʻi he ngaahi ʻekitivitī ʻa e Siasí.

Naʻá ku ʻalu ki hono meʻafakaʻeikí hili ha ʻaho ʻe tolu mei ai ʻo feʻiloaki mo siʻene ongomātuʻá mo hono ngaahi kaungāmeʻá. Naʻá ku tangutu fakataha mo ha taʻahine mei hoku uōtí ʻi he falelotú, pea naʻe kamata ʻaki e polokalamá ha hiva mo ha lotu. Ne fakahoko ai ha ngaahi lea lelei ʻaupito, pea tā mo ha ngaahi hiva.

Naʻe teʻeki ke ʻi ai haʻaku fakamoʻoni mālohi ki he moʻui taʻengatá, ka ʻi he taimi naʻa mau kamata ai ke hivaʻi ʻa e himi “ ʻE ʻOtua Ko e Tāpuhā,” naʻá ku kamata tangi. Ne ʻeke mai ʻe he taʻahine ʻi hoku tafaʻakí pe ʻoku ou sai pē he naʻá ne fakatokangaʻi e lahi ʻeku tangí. Ka naʻe ʻikai ko ha loʻimata ia ʻo e ongoʻi mamahi pe loto mamahi. Naʻe tuʻunga ia ʻi heʻeku ongoʻi mālohi ʻa e Laumālié, pea talu mei he momeniti ko iá mo ʻeku ʻiloʻi te u toe mamata pē ki hoku kaungāmeʻá.