Ongoongo ʻo e Temipalé
Temipale Sao Paulo Palāsilá
Naʻe fakatapui ʻi he 1978 ʻe Palesiteni Sipenisā W. Kimipolo (1895–1985), ʻa e Temipale Sao Paulo Palāsilá ko e fuofua temipale ia ke langa ʻi Saute ʻAmeliká. Naʻe fakapaʻanga hano konga ʻe ha ngaahi foaki ʻa e kāingalotu ʻo e fonuá, pea ko hanau tokolahi naʻe ʻikai haʻanau paʻanga ke foaki. Ka naʻa nau foaki honau ngaahi mama malí, ngaahi vesá, ngaahi mētali mo ha ngaahi meʻa mahuʻinga fakatāutaha kehe.
Ko e temipalé ko ha sīpinga fakaonopooni, ʻoku ʻi ai hono taua. ʻOku mālohi feʻunga hono fakavaʻé ke ne poupouʻi hake ha fale fungavaka 13, ʻo ne ʻai ai ke matuʻuaki ʻe he falé ʻa e mofuiké.
Ko hono holisí ʻoku langa ʻaki ha sima fakauho ukamea pea teuteu ʻaki ʻa tuʻa ha efuefu maka ngingila (quartz) mo e māpele. ʻOku ʻi ai ha ngaahi pēnolo ʻe 3,000 ki tuʻa ʻi ha ngaahi lalahi mo fōtunga kehekehe ʻe 400, ʻoku fakamaʻu lelei ʻi ha ngaahi tuʻunga pau he holisi ʻo e temipalé koeʻuhí he kuo pau ke ʻoua naʻa toe vāmamaʻo ange ʻa e vahaʻa ʻo e ngaahi pēnoló ʻaki ha milimita ʻe taha.
ʻI he 2004 naʻe toe fakatapui ai ʻa e temipalé hili ia hano toe fakaleleiʻi, ʻa ia naʻe kau ai ʻa hono fokotuʻu ha maka ʻo e ʻāngelo ko Molonaí ʻi he tumuʻaki ʻo e tauá.