ʻA e Kotoa Te u Malava ke Foakí

Ne u hohaʻa pe te u totongi fēfē ʻa e ngaahi meʻa ne u fie maʻu ke fai he tutuku ʻa e akó: ʻa e ngaahi kalasí, ngaahi kalasi akó, nofo kemi ʻo e faʻahitaʻu māfaná, mo e hā fua. Ne u pehē ʻe au te u tangi. Peá u toki manatuʻi hake leva ʻa e ngaahi meʻa kotoa ko ia ne akoʻi kiate au ʻo fekauʻaki mo e falala mo e tui ki he ʻEikí. Ne u fili leva ke tekaki atu ʻa e meʻá ni ki he toʻukupu ʻo e ʻEikí mo falala pē kapau ko Hono finangaló ia, te Ne fakahā mai ha founga.

Ne ʻikai fuoloa mei ai kuo maʻu hake ʻe heʻeku faʻeé ha foʻi sieke mei haʻaku ngāue he konga ki muʻa ʻo e taʻu ko iá ʻa ia ne teʻeki ai ke toho, pea ʻi he ʻaho pē hono hokó, ne u maʻu he meilí ha kiʻi pale paʻanga ʻi heʻeku ua ʻi ha feʻauhi naʻe fai. Ko ha fakamoʻoni maʻongoʻonga ʻeni kiate au ʻoku moʻui ʻa e ʻOtuá, ʻokú Ne ʻofa mo tokanga mai kiate au pea te Ne ʻomai ha founga.

Ne u maʻu ha loto houngaʻia mo e ʻofa ki heʻeku Tamai Hēvaní mo e Fakamoʻuí. Ne u ongoʻi ʻa e fonu hoku lotó ʻi he fiefiá! Fakaʻamu ange ʻe au ke u fakahā ʻeku loto fakafetaʻí, ke u fakahīkihikiʻi e ʻOtuá ʻaki hoku lelei tahá, mo vahevahe ʻa e ongo ko iá mo ha niʻihi kehe. Kuo ʻosi fakahoko ʻeni ʻe ha niʻihi ʻaki ʻenau faʻu hiva, faʻu maau, pe tā-valivali, ka ne u ongoʻi naʻe ʻikai ke u taau ke fai ha taha ʻo e ngaahi meʻa ko iá. Ne u ʻiloʻi ko e meʻa pē ʻe feʻunga ke fai ʻaki ha fakahīkihikí ko ʻeku moʻuí—ke u “ʻi he kakai tuí ko ha fakaʻilonga” (1 Tīmote 4:12), ke u foaki ʻeku moʻuí kia Kalaisi. Ko ia pē ʻokú Ne kole maí, pea ko ia pē ʻe lava ke u foakí.