Ko Hono Taukapoʻi ʻEku ʻĒseí— mo e Tohi ʻa Molomoná

ʻI heʻeku kei ako he ʻunivēsití, naʻe fie maʻu ʻi he polokalama fakalāngilangi ne u kau ki aí ke faʻu ʻe he kau akó ha ʻēsei. Naʻe tokangaʻi mo fakaongoongoleleiʻi e ʻēsei ʻa e tokotaha ako takitaha ʻe ha ongo palōfesa.

Ne u fili ke u fekumi mo fakamatalaʻi ʻa e ngaahi feinga tau naʻe hoko ʻi he Tohi ʻa Molomoná. Naʻá ku talanoa mo e palōfesa ʻe toko taha fekauʻaki mo ʻeku fakakaukaú, pea naʻá ne loto ke hoko ko e taha ʻo ʻeku ongo supavaisá. Naʻá ne fokotuʻu mai foki mo ha palōfesa ʻe taha ʻe lava ke hoko ko e palōfesa ke ua ʻaki iá.

Ne u feʻiloaki mo e palōfesa hono uá ke fakamatalaʻi ange ʻa e tefito te u fakamatalaʻi heʻeku pepá. Ko ʻeku talaatu pē e Tohi ʻa Molomoná kuo liliu ʻene tōʻongá pea kamata ke ne fakaangaʻi e Siasí. Ne u fakafanongo fakalongolongo pē kae ʻoua kuo ʻosi ʻene leá peá u fakamatalaʻi nounou ange pē ʻeku ongoʻi naʻá ne maʻu hala ki he ngaahi meʻa naʻa tau tui ki aí. Hangē naʻe ʻikai tui ki aí, ka ne u ʻohovale heʻene loto lelei ke supavaisa ʻeku pepá.

Hili ha meimei taʻu ʻe taha ʻo ʻeku fakatotolo mo hiki fakamatalá, ne u fakahū atu ʻeku ʻēseí ke tali ʻe he kau faiakó. Naʻe tali au ki he ʻapiako laó lolotonga e taʻu ko iá, pea naʻe fie maʻú ke u fakakakato e ngāue ko ʻení kau ʻosi ʻo hoko atu.

ʻI he uike pē ʻe taha ne u maʻu ai ha ʻī-meili mei he palōfesa naʻá ne fakaangaʻi e Siasí. Naʻá ne kole mai ke ma fetaulaki ki hono ʻōfisí.

ʻI heʻeku aʻu atú, naʻá ne kole mai ke tāpuniʻi e matapaá peá u nofo hifo ki lalo. Naʻe kamata ke ne lau fakafepaki mai kiate au he meimei taimi pē ko iá—ʻo ʻikai fekauʻaki mo ʻeku ʻēseí ka ko e Tohi ʻa Molomoná. Naʻá ku fai kiate ia ʻeku fakamoʻoni ki he Tohi ʻa Molomoná ʻi he fiemālie taha ne u lavá.

Ne u kiʻi momou heʻeku fehuʻi ange ki he palōfesá pe te ne kei tali pē ʻeku ʻēseí. Naʻá ne tala mai he ʻikai.

Ne u ongoʻi loto mamahi heʻeku foki ki ʻapí pea ʻikai ke u fakapapauʻi pe ko e hā e meʻa ke faí. Ka ʻikai tali ʻe he tangatá ni ʻeku ʻēseí, ʻe lava pē ke mole hoku faingamālie ke u ʻosi ai mei he polokalama fakalāngilangí mo kamata he ʻapiako laó. Ne u lotu ke iku lelei e meʻa hono kotoa ʻi ha faʻahinga founga.

ʻI heʻeku fakamatala e meʻa ʻoku hokó ki heʻeku palōfesa ʻe tahá, naʻá ne faleʻi au ke u ʻalu ki he palōfesa ʻe tahá ʻi he ʻaho hono hokó ʻo ʻoange ha toe faingamālie pē ʻe taha ke ne tali ai ʻeku ʻēseí.

Ne u ʻalu ʻo talitali ʻi tuʻa he ʻōfisi ʻo e palōfesá he pongipongi hokó. Ne u tailiili pē he naʻe ʻikai ke u fakapapauʻi pe ʻe fēfē haʻane toe sio mai kiate au. ʻI heʻene aʻu angé, naʻá ne fakaava fakalongolongo pē ʻa e matapā ki hono ʻōfisí pea kamo mai ke u hū ange. Naʻe ʻikai ke ne lea ka ne toʻo hake pē ha peni ʻo fakamoʻoni ʻi heʻeku ʻēseí, ʻa ia ko ʻene tala mai ia ʻokú ne tali. Naʻe ʻikai haʻane fakamatala ki hono ʻuhinga naʻe liliu ai ʻene fakakaukaú ka ne malimali mai ʻi heʻeku fakalea ange kau ʻalú.

ʻOku ou fakamālō heʻeku maʻu ʻa e faingamālie ke fai ai ʻeku fakamoʻoní ki he tangatá ni. ʻOku ou ʻilo ʻe fakamālohia mo tāpuakiʻi kitautolu ʻe he Tamai Hēvaní ʻi he taimi ʻoku tau taukapoʻi ai ʻa e meʻa ʻoku tau tui ki aí.