Ongoongo ʻo e Temipalé
Temipale Venikuva Pilītisi Kolomupiá
ʻI he ʻaho 2 ʻo Mē 2010, naʻe hoko ai e Temipale Venikuva Pilītisi Kolomupiá ko e temipale hono 131 ke fakatapui ʻi he kuonga fakakosipeli ko ʻení. Ko e lahi ʻo e temipalé ko e sikuea fute ʻe 28,165 (2617 m2) pea ʻoku kau ki ai ʻa e faiʻanga papitaiso, loki silesitiale, loki ʻenitaumeni ʻe ua, mo e loki faiʻanga sila ʻe ua. ʻOku hā ʻi loto ʻa e lanu matá, lanu pulū vaivaí, mo e lanu koulá ko e fakalāngilangiʻi hono fakaʻeiʻeiki ʻo e ngaahi vao ʻakaú, tahí, mo e langí ʻi he Tokelau-Hihifo ʻo e Pasifikí. ʻOku hā holo he ngaahi tā valivali mo e ʻū tupenu ʻi he loto falé ʻa e matalaʻiʻakau tuʻufonua ʻo Pilītisi Kolomupiá (Pacific Dogwood).
Naʻe kau mai ha toʻu tupu ʻe toko 1,200 tupu ki ha polokalama katoanga fakafonua ʻi he pō kimuʻa ʻi he fakatapuí. Ko e hingoa ʻo e fakaʻaliʻalí “Ko ha Maama Kamo ki Māmani” pea naʻe fakamatalaʻi ai e hisitōlia mo e kakai ʻo Kānatá. Naʻe fetongi ʻe Palesiteni Monisoni ʻa e ʻuluaki hivá ʻi he kamataʻanga ʻo e fakafiefiá ki he fasi fakafonua ʻo Kānatá, mo ne pehē, “ ʻOku mau ʻi hení ke fiefia fakataha mo kimoutolu ʻi Kānata.”
Naʻe pehē ʻe Palesiteni Monisoni ʻi he lotu fakatapuí, [“Fakatauange ʻoku hū mai ʻa e kakai kotoa pē mo e nima ʻoku maʻa pea mo e loto maʻa. ʻOfa ke tupulaki ʻa ʻenau tuí ʻi heʻenau ngāue heni maʻanautolu kuo nau muʻomuʻa atú. ʻOfa ke nau mavahe atú mo ha ongoʻi melino, ʻo fakahīkihikiʻi Ho huafa māʻoniʻoní.”]1
Mei he taupotu ki ʻolungá: Ko ha vakai ki he faiʻanga papitaisó, ngaahi teuteú, mo e loki silesitiale ʻo e Temipale Venikuva Pilītisi Kolomupiá.