Naʻe lea ʻa ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he fakamafola ʻo ha faeasaiti ʻa e Potungāue Ako ʻa e Siasí ki he kakai lalahi kei talavoú ʻi he ʻaho 6 ʻo Māʻasi 2011 ʻo pehē, “Kuó u mamata ki he mālohi fakalaumālie faivelenga ʻo e kakai lalahi kei talavoú ʻi he Siasí ni. ʻOku ou ʻilo ʻa e meʻa ʻoku mou malavá.”

Naʻá ne akoʻi ha meʻa ʻe fā te nau tokoniʻi e kakai lalahi kei talavoú ke nau fakahoko e meʻa ʻoku nau malavá mo tokoniʻi e niʻihi kehé ke nau toe maʻu ʻenau tui kia Kalaisí: lotu fakaʻaho, ako fakaʻaho e folofolá, moʻui taau ki he temipalé, mo e ngaahi ngāue tokoni fakaʻahó.

Naʻe pehē ʻe ʻEletā Peuli, “Ko kimoutolu ʻa e toʻu tangata naʻe fakahaofi ʻe he ʻEikí ki he kuongá ni. … ʻOku ou fakatukupaaʻi kimoutolu ke mou hoko ʻko e toʻu tangata maʻongoʻonga tahá.’”

Lau, fakafanongo, pe vakaiʻi ʻa e tuʻasila ʻi he ngaahi lea fakafonua kehekehe ʻi he institute.lds.org. Lomiʻi ʻi he CES Firesides, peá ke toki fili ha lea fakafonua.

Naʻe ʻaʻahi ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ki he Kāingalotu ʻi Kōlea mo Siapaní mei he ʻaho 12 ki he 20 ʻo Fēpueli 2011.

Naʻá ne akoʻi e kāingalotu ʻo e Siasí ʻi Soulu, ʻi Kōleá ʻoku totonu ke tau houngaʻia ʻi he meʻa ʻoku tau maʻú kae ʻikai ke tuku taha e tokangá ki he meʻa ʻoku ʻikai ke tau maʻú. Naʻá ne fakamanatu kiate kinautolu ʻoku ʻomi ʻe he ongoongoleleí ʻa e fiefiá, nēkeneká, mo e melino ʻoku tau fekumi ki aí.

Naʻe feʻiloaki foki ʻa ʻEletā Kuki mo e kau faiongoongo mei he ngaahi nusipepa kehekehe ki ha fakataha tali fehuʻi.

Naʻe tuku ʻe ʻEletā Kuki ha taimi ke ne akoʻi, faleʻi mo tali ha ngaahi fehuʻi mei he kau faifekau ʻi he Misiona Kōlea Teisoní mo kau atu ki he konifelenisi fakatakimuʻa ʻo e lakanga fakataulaʻeikí maʻá e ʻēlia ʻo e Misiona Kōlea Teisoní.

Naʻe fakaʻosi ʻaki ʻa e ʻaʻahí ha kau atu ʻa ʻEletā Kuki ki ha konifelenisi fakasiteiki naʻe fakahoko ʻe he Siteiki Kōlea Sionisuú, pea ko e fuofua ʻaʻahi mai ia ʻa ha ʻAposetolo ki he siteikí.

Naʻe kau atu foki ʻa ʻEletā Kuki ki ha konifelenisi fakatakimuʻa ʻo e lakanga fakataulaʻeikí ʻi Kope, Siapani, mo ha konifelenisi ʻa e Siteiki Siapani ʻOkahamá; ʻaʻahi ki he kau fakafofonga mei Meisu Suline ʻi Tōkiō, Siapani; pea kiʻi ʻaʻahi nounou ki Vietinemi.

Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi haʻane lea ki he kau mēmipa ʻo e Kautaha Lao ʻa J. Lūpeni Kalaké (J. Reuben Clark Law Society) ʻi he ʻaho 4 ʻo Fēpuelí, “Kuo tuku mai ‘e he ‘Otuá kiate kitautolu, ko ʻEne fānaú, ʻa e faingamālie mo e fatongia ke fokotuʻu ha lao mo ha ngaahi founga fakalao ke ne puleʻi e ngaahi vā fetuʻutakí mo e ʻulungāanga ʻo e tangatá.” Naʻá ne lea he fatongia ʻoku fakahoko ʻe he laó ʻi hono fakaʻatā e fakafoʻituituí ke aʻu ki he kakato ʻo e meʻa ʻoku nau malava ʻi he moʻuí ni mo e moʻui kahaʻú.

Naʻe fakamanatu ʻe ʻEletā Kulisitofasoni ki he kau fanongó “ ʻe ʻikai ke tau lava ʻo aʻusia e fakamaau totonu fakaʻosí, taʻe kau ai ʻa Sīsū Kalaisi,” pea ko “hono tataki e niʻihi kehé ki he Fakamoʻuí ko e lelei maʻongoʻonga taha ia te tau lava ʻo fakahoko ke tokoniʻi kinautolu ke nau aʻu ki he meʻa ʻoku totonu ke nau aʻu ki aí.” Naʻá ne fai ha fakamoʻoni ki he mālohi ʻo e Fakamoʻuí ke fakatonutonu e ngaahi fehālākí pea ke “totongi huhuʻi ki heʻetau ngaahi tōnounoú mo fakatonuhiaʻi kitautolu ʻi he fonó ʻa ia ʻoku malava ke tau hoko ai ko e kaungā ʻea fakataha mo Ia ki he moʻui taʻengatá.” Naʻá ne fakaʻosi ʻaki ʻene fakamoʻoni ʻoku moʻui ʻa Kalaisi.

Naʻe foaki foki kia ʻEletā Kulisitofasoni ʻi he lolotonga ʻa e faeasaití ʻa e Pale ki he Ngāue Tokoni Maʻongoʻonga ʻa e Kautaha Lao ʻa J. Lūpeni Kalaké (Reuben Clark Law Society Distinguished Service Award) koeʻuhí ko ʻene ngaahi tokoni ki he malaʻe ʻo e laó.

Naʻe fakataha ʻa Suli B. Peki ko e palesiteni lahi ʻo e Fineʻofá mo e kau Fineʻofa meimei ke toko 10,000 mo e kau taki ʻo e ʻunivēsiti BYU-ʻAitahoó ʻi he ʻaho 26 Fēpueli 2011, ke fakamālohia ʻenau tuí pea mo poupouʻi kinautolu ʻi honau ngaahi fatongia ʻi he Fineʻofá mo e palani ʻo e fakamoʻuí.

Naʻe tali ʻe Sisitā Peki ha ngaahi fehuʻi mei ha kau fafine mo ha kau taki lakanga fakataulaʻeiki mei ha ngaahi siteiki ʻe 40 tupu, mei he feituʻu fakatonga-hahake ʻo ʻAitahō, ʻAmeliká.

Naʻe fakamoʻoni ʻa Sisitā Peki ko kinautolu ko ia ʻoku nau kau ki he ngāue ʻa e Fineʻofá ʻo nau tauhi maʻu e ngaahi taumuʻa ʻa e ʻEikí ʻi honau ʻatamaí mo honau lotó pea fakahoko ʻEne ngaahi taumuʻá he māmani ko ʻení, ʻe tāpuekina, fakamālohia, fakamaʻa, mo fakamoʻui kinautolu.

Naʻá ne pehē, “ ʻOku ʻi ai haʻatau houalotu kuo fokotuʻu ʻe he ʻEikí ke faitāpuekina ai Hono ngaahi ʻofefiné. ʻOku ʻafioʻi koe ʻe he ʻEikí koeʻuhí he ko ʻEne ngāué ia. Te Ne fakamālohia mo fakatupulekina koe.”

Lau ke toe lahi ange ʻa e meʻa naʻe akoʻi ʻe Sisitā Pekí mo mamataʻi hono vitioó ʻi he news.lds.org. (ʻOku lava ke maʻu fakataha atu ʻa e foʻi vitioó mo e fakamatalá ʻi he lea faka-Pilitāniá pē.)