ʻOku tupulaki ʻa e fakafalala pē kiate kitá mo e ngaahi faingamālie ngāue totongí maʻá e kau fafine ʻoku nau nofo he ngaahi feituʻu ʻuta ʻo Fisí tupu mei he tokoni ʻa e Siasí ʻo foaki ai ha ngaahi mīsini tuitui ʻe 50 ʻi he 2010 ki he Potungāue ʻo e Uelofea Fakasosiale ʻa Fisí (Fiji’s Ministry of Social Welfare) pea ʻe toe foaki ange foki mo ha ngaahi mīsini ʻe 50 he kahaʻú.

Ko e ngaahi tokoni ʻa e kāingalotu ʻo e Siasí ki he paʻanga tokoni ʻofa fakaetangatá ʻokú ne fakaʻatā ʻa e Siasí ke ne feau e ngaahi fie maʻu kotoa he māmaní ʻaki ha ngaahi ngāue hangē ko e foaki e ngaahi mīsini tuituí. ʻOku fengāueʻaki vāofi ʻa e kau fakafofonga ʻo e Siasí mo e kau taki ʻo e koló mo e puleʻangá ke fakamahinoʻi ʻa e ngaahi tūkunga fakalotofonuá mo fakaʻapaʻapaʻi ʻa e ngaahi fakaʻānaua ʻa e kau mēmipa ʻo e koló.

Naʻe pehē ʻe ʻEletā Taniela B. Uākolo, ko ha Fitungofulu Fakaʻēliá ʻi hano fakaʻekeʻeke ia ʻe he nusipepa ko e Fiji Times, “ ʻOku mau fai ʻeni mo e ngaahi ngāue peheé koeʻuhí ko e kau muimui kimautolu ʻo Sīsū Kalaisi. ʻOku tākiekina kimautolu ʻe heʻemau tuí ke mau … fai lelei ʻi he māmaní.”

ʻI he ʻaho 9 ʻo Nōvema 2010, ko e māhina ia ʻe fā kimuʻa he mofuike fakalilifu ʻi Siapaní, naʻe maʻu ai ʻe ʻIosi Sukiama, ko ha mēmipa ʻo e Siteiki Siapani Fusisauá, ha pale ʻo e kalasi lotoloto ʻo e Tuʻunga ʻo e Koloa Toputapú (Order of the Sacred Treasure) heʻene ngāue tokoni maʻa hono fonuá, ʻa ia ne taau ke fakapaleʻi.

ʻI he hoko ʻa Misa Sukiama ko ha mēmipa ʻo e Potungāue Ki Mulí (Foreign Ministry) ʻi ha ngaahi taʻu lahí, naʻá ne kau mālohi ai ʻi hono aleaʻi ʻa e ngaahi talite mo e ngāue tokoní ʻo fakafofongaʻi ʻa Siapani.

ʻOku fakatokangaʻi ʻe Misa Sukiama ʻa e ʻomi ʻe he ʻEikí kiate kitautolu kotoa pē ha ngaahi faingamālie ke tau fai lelei ai ʻi hotau ngaahi feituʻú. Naʻá ne pehē, “ ʻOku ʻomi ʻe he ʻEikí he taimi ʻe niʻihi ha ngaahi faingataʻa kiate kitautolu koeʻuhí ke tau lava ʻo ʻilo ai ʻa ʻetau ngaahi fie maʻú. Kapau ʻe ʻikai e ngaahi fie maʻu ko iá mo e faingamālie ke maʻu ha ngaahi fakalelei ʻoku leleí, ʻe ʻikai ha fakalakalaka ʻa e tangatá pea ʻikai ʻomi ha fiefia ki he māmani ko ʻení.”

ʻOku meimei laupiliona ʻa e tokolahi ʻo e kakai ʻi he māmaní ʻoku siʻisiʻi ʻenau maʻu ha vai maʻá, pea faʻa tupu ai ʻenau puke he ngaahi mahaki ʻoku fakamafola ʻe he vaí hangē ko e kōlelá, fakalelé, mo e taifotí. Ka ko e talu mei he taʻu 2002, mo hono tokoniʻi ʻe he Siasí ha kakai ʻe toko fitu miliona ʻi he ngaahi kolo ʻe 5,000 ke nau maʻu ha ngaahi maʻuʻanga vai ʻoku maʻá. Ko e foʻi vitiō ko e Water Is Happiness (Ko e Vaí ko e Fiefiaʻangá), ʻoku lava ke maʻu atu ia ʻi he lea faka-Pilitāniá ʻi he news.lds.org, ʻoku fakaʻaliʻali ai ʻa e talanoa ʻo e Ngaahi Kautaha Tokoni ʻOfa ʻa e Siasí ʻi heʻenau fakaaʻu atu e vai maʻá ki ha kiʻi kolo ʻi Siela Leone.