Ko Hoku Ngaahi ʻAho Paionia ʻi Kilikalí

Naʻe fanauʻi au ʻi ha kiʻi kolo ʻi he feituʻu fakatokelau ʻo ʻIngilaní ʻi he 1947. ʻI hoku taʻu 15, naʻe fakafeʻiloaki au ʻe haku ngaahi kaungāmeʻa ki he kau faifekaú, peá u kau ki he Siasí. Naʻe ʻikai pē kau hoku fāmilí ki he Siasí.

ʻI heʻeku ako ʻo kau ki he kau paionia ki muʻa ʻo e Siasí, ne u ongoʻi ʻa e ʻikai ke ʻi ai haʻaku ngaahi kui naʻa nau fononga ʻi he ngaahi potu tokaleleí ke tukufakaholo mai kiate aú. Ka ʻi he lahi ange ʻeku ʻilo ki he ongoongoleleí, naʻe liliu e ngaahi ongo ne u maʻú.

Ne mahino kiate au naʻe tofa ʻe he kau paionia ʻi muʻá ʻa e halá maʻá e kakai hangē ko aú ke u kau ki he Siasí. Ko e ongo faifekau naʻá na fakafeʻiloaki au ki he ongoongoleleí ko ha hako kinaua ʻo e kau paionia ko iá, pea ʻoku ou moʻua lahi ai ki he kau paioniá. Ne u ongoʻi ʻoku ʻi ai ʻeku fehokotaki mo kinautolu ʻi ha founga makehe.

Ne u ʻiloʻi foki ʻoku ʻi ai hoku tukufakaholo ko ha kakai angaʻofa, ngāue mālohi, ʻa ia naʻa nau feilaulau, ngāue, naʻa mo ʻenau kau ki ha ngaahi feinga tau kae lava ai ke u maʻu ʻa e ngaahi meʻa naʻe ʻikai ke nau maʻú peá u maʻu ai ʻa e tauʻatāina ʻoku ou fiefia ai he ʻaho ní. Naʻe ʻikai ke kau ʻeku ongomātuʻá ki he Siasí, ka naʻá na ʻohake mo akoʻi kiate au ha ngaahi ʻulungāanga lelei mo ha ngaahi tefitoʻi moʻoni ʻo u mateuteu ai ke tali ʻa e ongoongoleleí.

Fakaʻosí, ne u ako ʻo ʻiloʻi ʻoku lahi ʻa e ngaahi faʻahinga ʻo e kau paioniá. Ko e mēmipa toʻu tangata ʻuluaki au ʻo e Siasí. Naʻe ʻikai ke fiefia hoku fāmilí ʻi heʻeku fili ke u papitaisó, pea naʻe faingataʻa ai ke u ʻalu ki heʻeku ngaahi fakatahaʻangá. Naʻe faingataʻaʻia homau kiʻi koló koe tokosiʻi ʻa e kāingalotú, tautautefito ki he kau maʻu lakanga fakataulaʻeikí. Naʻe faifai pē pea mahino ʻe tāpuni ia ʻe he misioná.

Ne tupu ai ʻeku fakakaukau ke u hiki ki Kānata, pea ko e taha ia ʻo e ngaahi fili faingataʻa taha kuó u fai. Naʻá ku toko taha pē peá u ʻofa lahi ʻi heʻeku ongomātuʻá ʻo hangē pē ko ʻena ʻofa kiate aú, ka naʻe tuʻu fakatuʻutāmaki ki heʻeku fakamoʻoní kapau ne u nofo ʻi ha feituʻu he ʻikai ke u lava ʻo maʻulotu ai. ʻOku ou kei manatuʻi pē ʻa e pō ne u mavahe aí—ʻa e lele lalo ʻeku tamaí he tafaʻaki ʻo e lēlué mo taʻataʻalo mai kae sio pē ʻeku faʻeé. Naʻe mamahi hoku lotó, ka ne u ʻiloʻi naʻe totonu ke u ʻalu.

Ne u tau atu ki Kilikali ʻi ʻAlapetá ʻi he ʻAho ʻo e Ngaahi Faʻeé ʻi Mē 1967. Naʻá ku maʻulotu mo e kau mēmipa naʻa mau nofó pea naʻá ku tangi lolotonga e fakatahaʻangá kotoa. ʻOku ou manatuʻi ʻeku fai tohi ki heʻeku ongomātuʻá ki ʻapi kae lele noa pē hoku loʻimatá, mo talaange ʻeku saiʻia ʻi Kānatá ka ne u ʻofa lahi ki ʻIngilani mo hoku fāmilí.

Ne u feinga ke anga ki heʻeku moʻui foʻoú, fekuki mo e taʻelatá, tuēnoá, mo e siva ʻo e ʻamanakí, ka naʻá ku tauhi moʻoni ki he ongoongoleleí. Naʻá ku ʻalu ki heʻeku ngaahi fakatahaʻangá kotoa peá u tali ʻa e ngaahi fatongiá. Ko hoku ngaahi ʻaho paioniá ia.

Naʻe faifai peá u fetaulaki mo hoku husepānití. Naʻe silaʻi kimaua ʻi he Temipale Kaatisitoni ʻAlapetá pea ʻohake ʻema fānau ʻe toko tolú ʻi he Siasí.

ʻI he taimi kotoa pē ne u foki ai ki ʻIngilani, ʻoku foki ʻeku manatú ki hoku fakauluí peá u fakamālō ko hoku ngaahi tāpuakí. He ne u mei ʻi fē he ʻahó ni kapau naʻe ʻikai ke u loto toʻa ʻo fai ha fili faingataʻa pehē peá u muimui ʻi he Laumālié?

ʻE hounga taʻengata kiate au ʻa e kau paionia ʻi muʻá, ʻo tatau pē kiate kinautolu naʻe Siasí mo kinautolu naʻe ʻikai Siasí, ʻi heʻenau tofa ʻa e halá ke u lava ai ʻe au mo ha niʻihi kehe hangē pē ko aú ʻo fanongo ki he ongoongoleleí. Naʻe ʻomi ʻe kinautolu naʻe ʻi muʻá ʻa e faingamālie mo e loto toʻa ke u hoko ai ko ha paionia ʻo onopooni.