ʻI Haʻaku Toe Feʻiloaki Mo Hoku Tuongaʻané

ʻI heʻeku kei siʻí, ne u fie maʻu ke lele hoku tuongaʻane ko Huani Fenanitoó mo vaʻinga ʻo hangē ko e fānau kehé. ʻI heʻeku ʻeke ange ki heʻeku faʻeé hono ʻuhinga ʻoku ʻikai te ne lava aí, naʻá ne talamai naʻe hoko ha maumau lahi ki hono ʻutó ʻi hono fāʻeleʻi maí tupu mei he ʻikai ha ʻosikena feʻungá, pea he ʻikai ʻaupito pē te ne lava ke fai e ngaahi meʻa ko iá.

Lolotonga e moʻui hoku tuongaʻané, naʻá ne nofo pē ʻi mohenga. Koeʻuhi ko hono ʻohake au ʻi he Siasí, naʻe mahino kiate au hono tūkungá peá u tali ia mo ʻeku ʻiloʻi ʻa e laumālie fakaʻofoʻofa naʻá ne maʻú. Ka ne u fakaʻānaua ʻi hoku lotó pehēange mai ʻokú ne tatau mo e niʻihi kehé, neongo naʻe ʻikai ke u lava ʻo fakakaukau atu pe ʻe fēfē haʻaku sio ki ai ʻoku ʻalu pe lele pe lea.

Ne u hohaʻa pe ko hai te ne tokangaʻi ia kapau ʻe ʻuluaki mate ʻa e fāmilí ia ai. Ne u lotu ʻi he loto fakamātoato ʻo kole ki he Tamai Hēvaní ke ʻoua muʻa naʻa mau ʻuluaki mate ʻia Huani Fenanitō. Ne u ʻiloʻi te Ne tali mai ʻeku lotú.

Naʻe mālōlō hoku tuongaʻané ʻi hono taʻu 16 ʻi ha hoʻatā ʻe taha he faʻahitaʻu momokó, pea naʻe ongo lahi ʻeni ki homau fāmilí. Naʻa mau ongoʻi loto mamahi ka ne ʻi ai pē ʻemau ʻamanaki lelei. Hili ha ngaahi ʻaho siʻi mei heʻene mālōloó, ne u mohe lolotonga haʻaku fakakaukau ki ai ʻo u misi ha misi fakaʻofoʻofa moʻoni.

Naʻá ku lue lalo, ka naʻe ʻikai ke u sio lelei koeʻuhi ko ʻene ʻaoʻaofiá. Ne u lava ʻo mamata ki ha meʻa naʻe hā mamaʻo mai, ko ia ne u luelue māmālie atu ki ai. ʻI heʻeku ofi atú, ne u sio ki ha saliote naʻe fonu he matalaʻiʻakau fakaʻofoʻofá. Lolotonga ʻeku sio ki aí, ne u fakatokangaʻi atu ha tamasiʻi talavou teunga hina naʻe tuʻu ʻi he veʻe salioté. Ne u kiʻi tuʻu ʻo feinga ke ʻiloʻi pe ko hai ia, peá u toki fakatokangaʻi hake ta ko hoku tuongaʻané. Ne u fiefia he sio ki aí. Naʻá ne lea mai kiate au, pea naʻá ku fie fāʻofua mo ʻuma kiate ia. Peá u ʻā hake leva.

Ne u fiefia he fanongo ki hono leʻó mo sio ʻoku kakato hono sinó. ʻOku lava pē ke u sioloto atu ki he momeniti te ma toe feʻiloaki aí. ʻOku ou ʻiloʻi fakapapau te ma fāʻofua mo ʻuma mo talanoa ʻi ha ngaahi lea ʻofa—pea fakafetaʻi muʻa koeʻuhí ko e Fakalelei ʻa Sīsū Kalaisí. Koeʻuhi ko e Fakamoʻuí te tau toe tuʻu hake kotoa pē mei he faʻitoká pea lava ke tau toe fakataha ko ha ngaahi fāmili, ʻo ʻikai ʻaupito ke tau toe mavahevahe ha taimi.

ʻOku ou manatu ki he ngaahi lea ʻa ʻAmulekí: “ ʻE toe fakatahaʻi ʻa e sinó pea mo e laumālié ʻi hono anga haohaoá; ʻe toe fakafoki ʻa e alangá mo e hokotanga huí fakatouʻosi ki hono tuʻunga totonú” (ʻAlamā 11:43).

ʻOku ou fakamālō ki he ongoongolelei ʻo Sīsū Kalaisi kuo toe fakafoki maí, ʻa ia ʻokú ne ʻomi ʻa e melinó ki hoku laumālié. ʻOku ou ʻiloʻi ʻe ʻi ai e ʻaho te u toe mamata ai ki hoku tuongaʻané.