ʻIkai Hohaʻa ki he Vaí

Naʻe tupu hake pē ʻa e tamasiʻi taʻu fitu ko Siosefá mo e vai ʻi he feituʻu kotoa pē. Pe ko hono ʻai ʻe tahá naʻá ne tupu hake pē kuo ʻātakaiʻi ia ʻe he vaí—ʻa e vai momoko ʻo e Ano ko Titikaká ʻi Pelū. Ko e meʻa ia ʻoku hoko ʻi hoʻo nofo ʻi ha kiʻi motu ʻoku faʻu ʻaki ʻa e kuta ʻoku tētē holo he vaí.

Ko e kau ʻa Siosefa mo hono fāmilí ki he kakai ʻIulasí, ʻa ia kuo taʻu ʻe laungeau ʻenau faʻu mo nofo ʻi ha fanga kiʻi motu ʻoku tētē holo ʻi he Ano ko Titikaká. ʻOku nau taumātaʻu he anó. ʻOku nau kaukau ʻi he anó. ʻOku nau ʻaʻalo ʻi he anó mei he motu ki he motu.

Mahalo te ke pehē he ʻikai manavasiʻi ʻa Siosefa he tuʻu ʻi he faiʻanga papitaisó ke papitaiso ia ʻi he ngaahi māhina siʻi ka hokó he kuó ne anga he vaí. Ka ʻokú ne maʻu ʻa e ongo tatau pē mo e fānau kehe tokolahi.

“ ʻOku ou fiefia, ka ʻoku ou tailiili he uku ki lalo he vaí,” ko ʻene laú ia.

Koeʻuhí ko e ʻātakaiʻi ʻe he vaí ʻa e fānau ʻa e kakai ʻIulasí, naʻe akoʻi ai ʻa e fānaú ke tokanga he vaí. Ko ia ʻi hono talaange ʻe Siosefa ki heʻene ongomātuʻá ʻene loto hohaʻá, naʻe talanoa leva e fāmilí kau ki he papitaisó lolotonga e efiafi fakafāmili ʻi ʻapí, pea akoako ʻe Siosefa mo ʻene tamaí ʻa e meʻa ʻe faí.

ʻOku pehē ʻe Siosefa, “ ʻE papitaiso au ʻe heʻeku tamaí. Naʻá ne tokoniʻi au ke ʻoua te u fuʻu ilifia.”

ʻOku lolotonga teuteu faivelenga atu ʻa Siosefa ki hono papitaisó. ʻOkú ne feinga lahi ʻaupito ke tokanga lolotonga ʻa e Palaimelí pea mo ako ʻa e Ngaahi Tefito ʻo e Tuí. ʻOkú ne ʻiloʻi ʻe tokoniʻi ai ia he taimí ni pea ʻi he kahaʻú.

ʻOkú ne pehē, “Te u ʻalu ʻo ngāue fakafaifekau. Te u ʻalu ʻo fai ʻa e ngaahi meʻa kuo fekau ʻe he ʻEikí” (vakai, 1 Nīfai 3:7).