Fekumi ʻa e Siasí ki he Hisitōlia ʻo e Kau Paionia ʻo Onopōní

ʻI he taimi ʻoku fakakaukau ai ʻa e kāingalotu ʻo e Siasí ki he kau paioniá, ʻoku angamaheni ʻaki ʻenau sio loto kiate kinautolu ne folau vaka pe fononga lalo ki he feituʻu fakahihifo ʻo e ʻIunaiteti Siteití ʻi he senituli 19.

ʻOku ʻikai fakatokangaʻi ʻe he tokolahi ko e kau paionia kinautolu ʻoku nau tā-e ʻuluafí he ʻahó ni.

ʻOku lolotonga fekumi ʻa e Potungāue Hisitōlia ʻo e Siasí ki he kau paionia ʻo onopōní. Neongo ʻoku talitali lelei ʻe he potungāué ʻa e hisitōlia fakatāutaha kotoa ʻoku fakahūangé, ka ʻoku nau fuʻu mahuʻingaʻia ʻi he hisitōlia ʻo e kau papi uluí, kakai ʻoku nau nofo ʻi ha feituʻu ʻoku langa pe naʻe langa ai ha temipale foʻoú, kau faifekau ʻoku ngāue ʻi he misiona foʻoú, pea mo kinautolu ʻoku nau fakaʻaongaʻi ʻa e ongoongoleleí ʻi heʻenau moʻuí neongo ʻoku ʻikai ke nau nofo fakataha mo ha Kāingalotu ʻo e Ngaahi ʻAho Kimui Ní.

Naʻe pehē ʻe Puleti Uesiuti, ko e pule ʻo e ngaahi fakamatala ʻaonga ʻoku maʻu maí ʻi he Potungāue Hisitōlia ʻo e Siasí, “ ʻOku lava ke tokoni ʻa e ngaahi hisitōlia fakatāutaha ʻo e niʻihi kehé kiate kinautolu kuo nau foua atu ʻa e ngaahi aʻusia tatau pe naʻe nofo ʻi he feituʻu tatau pe vahaʻa taimi tatau.”

ʻOku lava ke hoko ʻa e ngaahi hisitōlia fakatāutahá ko ha ngaahi hisitōlia kakato pe fakakongokonga ʻo e moʻuí, hangē ko ha ngaahi manatu mei ha misiona, ngaahi aʻusia heʻenau hoko ko ha mātuʻá, pe ngaahi talanoa mahuʻinga kehe ʻoku fekauʻaki mo ha meʻa mahuʻinga naʻe hoko.

Naʻe pehē ʻe Misa Puleti Uesiuti, “ ʻOku mau tui ʻoku tatau kotoa ki he ʻOtuá ʻa ʻEne fānaú. ʻOku tau takitāuhi pē e talanoa mahuʻinga ke talanoaʻi—ʻoku tau aʻusia kotoa pē meʻa ʻoku hoko ko hotau ʻahiʻahi ʻanga ʻi he māmani ko ʻení, pea ʻoku tau ʻilo ʻoku tokoni e hisitōliá ki hono fakatupulaki e fakamoʻoní.”

Naʻe toe pehē ʻe Misa Uesiuti ko e hili ha taʻu ʻe teau mei he taimí ni, mahalo ʻe lau ʻe ha taha naʻe ʻikai ke ʻi ai haʻane lekooti hisitōlia fakafāmili hoʻo lekōtí peá ne pehē, “Ko ia ko e tuʻunga ʻeni ʻo ʻete hoko ko ha taha papi uluí.”

ʻI he ako ʻa e kakaí ʻo kau ki honau ngaahi kāingá pe kau paionia kehé—kau ai ʻa e ngaahi faingataʻa ne nau fehangahangai mo iá, ʻe hoko e ngaahi lēsoni ne nau akó, mo e poto ne nau maʻú—ko ha talatalaifale mo ha tokoni ki heʻenau moʻuí.

ʻI he taimi ʻoku fakahū ai ha hisitōlia ki he laipelí, ʻoku lēsisita mo fakaʻatā ia ke vakai ki ai mo lau ʻe he kau ʻaʻahí. ʻOku tauhi ʻi he Laipeli Hisitōlia ʻa e Siasí, ʻa ia ko ha feituʻu ʻoku puleʻi e anga hono ʻeá ke tolonga fuoloa ai e ngaahi fakamatalá mo e ngaahi tohí.

Naʻe ʻomai ʻe Misa Uesiuti ʻa e akonaki ko ʻení kiate kinautolu ʻoku nau fakakaukau ke ʻave ʻenau ngaahi hisitōlia fakatāutahá ki he Laipeli Hisitōlia ʻa e Siasí:

Tohi ke lau ʻe he kakaí. Neongo ʻoku hoko ʻa e ngaahi tohinoá mo e ngaahi tohi fakatāutahá ko ha ngaahi maʻuʻanga tokoni fakaofo, ka ʻoku faʻa fakamatala ia ki ha ngaahi meʻa naʻe hoko fakaʻaho mo ha ngaahi fakakaukau fakatāutaha ʻoku ʻikai feʻunga maʻu pē ke lau ia ʻe he kakaí. ʻE ala uesia heni e tuʻunga fakafoʻituitui ʻo ha taha. Kapau ʻoku kau ʻi he ngaahi hisitōliá ha fakamatala te ne fakaongoongokoviʻi ha taha, ʻe tali pē kinautolu ka he ʻikai ke fakaʻaliʻali ia ki he kakaí.

Tohi fakakongokonga pea vahevahe fakavahe e ngaahi talanoá. ʻOku fakatupu lotofoʻi maʻu pē ke kamata hoʻo ngaahi manatu fuoloa tahá mei hoʻo kei siʻí pea fakakau ai e meʻa kotoa ʻo aʻu mai ki he lolotonga ní. Kamata ʻaki ha talanoa ʻe taha ʻi he taimi ʻe taha. Hangē ko ʻení, kamata ʻaki haʻo tohi fekauʻaki mo hoʻo ngāue fakafaifekaú pē. Ko ʻene kakató pē, hoko atu ki ha konga kehe ʻi hoʻo moʻuí.

Fakaʻaongaʻi e ngaahi maʻuʻanga tokoni tefitó. Kapau ʻoku ʻi ai haʻo tohi (letter), hiki ia pe fakapipiki ʻi ha tohi (book). Kapau ʻoku ʻi ai hao laʻitā, fakakau mo ia ai. Kapau naʻá ke fakaʻaongaʻi ha fakamatala mei ha tohi pau, fakahaaʻi ia. ʻOku lava ke hoko e tohi manatú ko ha konga ia ʻo e hisitōlia fakatāutahá. Neongo ia, naʻe pehē ʻe Misa Uesiuti ʻoku angamaheni ʻaki ʻe he niʻihi ʻoku nau ʻai tohi manatú ʻa e ʻikai ke tohi ha puipuituʻa pe fakamatala ʻo kau ki he ngaahi fakatātā ʻi he kiʻi tohí. ʻOkú ne fokotuʻu mai ke toʻo ha kiʻi taimi ke hiki ha fakamatala fekauʻaki mo e ngaahi tā he tohi manatú

Talanoa pe fakafehuʻi e niʻihi kehé. Naʻe pehē ʻe Misa Uesiuti, “ ʻOku tau angamaheni ʻaki ʻ a e fakakaukau ko e hisitōlia fakatāutahá ko ʻetau fakakaukau pē ia ʻatautolu, ka ko e lahi ange e ngaahi fakakaukau ʻokú ke fakahū ki aí, ko ʻene mamafá ange ia.” ʻOku ʻomi ʻe hono fakaʻekeʻeke ʻo e niʻihi kehé ha fakakaukau foʻou pea mahalo ʻe tokoni ia ke fakalakalaka ange hoʻo hisitōliá.

Tohi ʻo kau ki he ngaahi aʻusia fakalaumālie, ngaahi momeniti mahuʻinga, pe kakai mo e meʻa mahuʻinga ne hoko. Naʻe pehē ʻe Misa Uesiuti, “ ʻOku saiʻia e kakaí ʻi he talanoa ʻoku talanoaʻi leleí.” Tohi ʻo kau ki ha ngaahi aʻusia ʻoku ʻi ai hano kamataʻanga, kakano ʻo e tohí mo hano fakaʻosí. “ ʻOua ʻe fakamoleki ha peesi ʻe 60 ʻi hoʻo moʻui kimuʻa ʻi ho taʻu uá. Mahalo pē he ʻikai ke ke tohi ia, pea he ʻikai ke lau ia ʻe he kakaí.”

Tohi ʻo kau ki ha meʻa ʻokú ke loto vēkeveke ki ai. Naʻe fokotuʻu mai ʻe Misa Uesiuti te ke lava ʻo tohi fakafoʻi kaveinga pe fakafoʻi tefito ʻi ha meʻa ʻokú ke manako ai kae ʻoua ʻe tohi ki he fakahokohoko fakataʻu e meʻa ne hokó.

Ko e meʻa mahuʻinga tahá, ʻoku ʻikai totonu ke fakahū ʻe he kāingalotú ha hisitōlia fakatāutaha pe fakafāmili ki he Siasí taʻe tufaki ia ki he kau mēmipa ʻo e fāmilí, he ʻoku totonu ke ne fakamālohia ʻa e fāmili naʻe ʻomi mei aí.

ʻOku tui ʻa Misa Uesiuti ko kinautolu ʻoku nau fie maʻu ha taimi ke lekooti ai ha hisitōlia fakatāutahá, ke nau faitotonu ʻi he tohi fekauʻaki mo e ngaahi taimi faingataʻá mo e ngaahi taimi leleí pea te nau lava ai ʻo mamata ki he toʻukupu ʻo e ʻEikí ʻi heʻenau moʻuí mo nau tuku mai ha tukufakaholo mo ha ngaahi manatu te nau fakamālohia ai e ngaahi fāmilí mo e kāingalotu ʻo e Siasí.

Kapau ko ha paionia ʻo onopooni koe pea ʻokú ke fie vahevahe hoʻo ngaahi aʻusiá, fakahū hoʻo hisitōliá ki he Potungāue Hisitōlia ʻo e Siasí.

Te ke lava pē ʻo ʻave pe meiliʻi hoʻo hisitōliá ki he: Church History Library, 15 East North Temple Street, Salt Lake City, UT 84150-1600, USA, Attention: Acquisitions.

ʻE lava ke ke aʻutonu ʻo ʻave fakahangatonu ia ki ai ʻo kamata mei he 9:00 pongipongí ki he 5:00 efiafí, Mōnite ki he Falaite.

Te ke lava foki ʻo ʻī-meili hoʻo hisitōliá ki he ChurchHistoryAcquisitions@ldschurch.org pe telefoni ki he Church History Acquisition tā ki he senitaá ʻi he 1-801-240-5696.