Uiuiʻi ʻe he ʻOtuá

Ne ma toki hiki mo hoku husepānití ki ha kolo foʻou pea naʻá ma fiefia ke maʻulotu ʻi homa uooti foʻoú. Ta koā ne ʻosi fetongi e ngaahi ngataʻanga ia ʻo e uōtí, pea vaeua e uōtí.

ʻI he tuku ʻa e lotú ʻi homa Sāpate ia hono ua aí, naʻe talamai ʻe he kalake fakauōtí ha taimi ke mau talanoa ai mo e pīsopé ʻi he efiafi Tūsité. Hili haʻamau talanoa taimi siʻi, naʻe kole ange leva ʻe he pīsopé ki hoku husepānití ke ne fakangofua mai ke uiuiʻi au ko e palesiteni Palaimeli ʻo e uooti foʻoú. Hili iá naʻá ne uiuiʻi leva au. Naʻá ku ʻohovale, kuo akoʻi au ke ʻoua ʻaupito naʻá ku fakafisingaʻi ha uiuiʻi, ko ia ne u loto fiemālie ai ke fai hoku lelei tahá.

Naʻe ʻomai ʻe he pīsopé ha lisi ʻo ha ngaahi hingoa peá ne kole mai ke ma fakataha ʻi ha ʻaho ʻe ua mei ai ki he ngaahi hingoa kuó u fili ke hoko ko haku ongo tokoni mo ha sekelitalí. Ne u ongoʻi lōmekina. ʻI heʻema aʻu pē ki ʻapí, ne u hū ʻo lokaʻi ʻa fale kaukau peá u tangi ai. Naʻá ku fakahā hoku lotó ki he Tamai Hēvaní, ʻo fakahā ange ʻeku hohaʻa ki hoku uiuiʻi foʻoú. Naʻe ʻikai ke u ʻilo ha taha ʻi he uooti foʻoú, pea ne u fie maʻu ʻa ʻEne tokoní. ʻI he ʻosi ange ʻeku lotú, ne nonga hoku lotó.

Naʻá ku lotu ʻi he pongipongi hono hokó pea fai ʻeku ngāue fakaʻapi angamahení. Naʻe hili ʻi he funga tēpile ʻi peitó ʻa e lisi ʻo e ngaahi hingoa ne ʻomai ʻe he pīsopé, pea ne u hila ki ai ʻi he taimi kotoa pē ne u fakalaka ai. Hili haʻaku sio tuʻo lahi ki he lisí, naʻe hā mahino hake ha ongo hingoa kiate au. Naʻá ku toʻo hake ʻa e lisí ʻo lau e ongo hingoá. ʻI heʻeku lea ʻaki iá, ne u maʻu ha ongo māfana. Kuo teʻeki ai ʻaupito ke u ongoʻi mālohi pehē ʻa e Laumālie Māʻoniʻoní ʻi ha taimi.

Ne u lotu ki he Tamai Hēvaní he taimi pē ko iá, pea naʻe tafe hifo hoku loʻimatá ʻi hoku ongo kouʻahé ʻi heʻeku toe lea ʻaki e ongo hingoá. Naʻe ʻikai ke u ʻilo ha meʻa kau ki he ongo fafiné ni, ka naʻá ku ʻiloʻi ʻi hoku lotó ko hoku ongo tokoní kinaua.

Ne u fakakaukauloto pē ki he lisi ʻo e ngaahi hingoá he efiafi ko iá. ʻI he taimi kotoa pē ne u sio loto ai ki he lisí, naʻe haʻu ha hingoa ʻe taha ki heʻeku fakakaukaú. Naʻe hoko e fefine ko iá ko ʻeku sekelitalí.

Ne u fakataha mo e pīsopé he ʻaho hono hokó peá u ʻoange ki ai e hingoa ʻo hoku ongo tokoní mo ʻeku sekelitalí. Ne u ʻohovale he ko e kau fafine tatau pē naʻe fakakaukau e pīsopé te nau ngāue lelei he Palaimelí. ʻI heʻeku aʻu ki ʻapi siasi he Sāpaté, naʻá ma tuʻu ʻi tuʻa he falelotú mo e tokoni ʻuluaki ʻi he kau pīsopelikí ʻo ne fakahinohino mai hoku ongo tokoní mo e sekelitalí ʻi heʻenau aʻu angé. ʻI heʻeku vakai atu ki he kau fafiné ni, ne u ongoʻi kuó u ʻosi maheni pē au mo kinautolu. Naʻe toe fakamoʻoniʻi mai ʻe he Laumālié kiate au naʻe uiuiʻi e kau fafiné ni ʻe he ʻOtuá.

Ne u ʻiloʻi te mau lava ʻo ngāue fakataha maʻá e ʻEikí ʻi he uouangataha—pea naʻe hoko ia. Neongo naʻe ʻikai ke u ʻiloʻi e kau fafiné ni, ka naʻa nau feʻunga moʻoni mo honau ngaahi uiuiʻí. Naʻe ʻafioʻi ʻe he ʻEikí ʻa kinautolu naʻá Ne fie maʻu ke uiuiʻí. Ne u tupulaki ʻi heʻeku ʻiloʻi tonu pē ʻiate au ʻa hono ʻuhinga ke ʻuiuiʻi ha taha ʻe he ʻOtuá ʻi he kikité.