Tohinoa ʻo e ʻAukaí

Naʻe faʻa faingataʻa ke u ʻaukai—kae tālunga ʻeku kamata tauhi ha tohinoa ʻo e ʻaukaí. Kimuʻa peá u kamata ʻa e ʻaukai takitaha, ʻoku ou tohiʻi ha taumuʻa pau ki heʻeku ʻaukaí. Hangē ko ʻení, te u tohiʻi peheni, “Tupu mei heʻeku manavasiʻi ʻi hoku uiuiʻi foʻou ko e ʻetivaisa ki he Punungahoné, ʻoku ou ʻaukai ai mo lotu ke tāpuakiʻi au ʻe he ʻEikí ke u maʻu ha nonga, loto falala, mo ongoʻi fiemālie ʻi heʻeku akoʻi ʻeku fuofua lēsoní ʻapongipongí.”

ʻOku ou hiki ʻa e ngaahi meʻa ʻaonga ʻoku hoko lolotonga ʻeku ʻaukaí: ngaahi fakakaukau, ngaahi ongo, mo e ngaahi meʻa ʻoku haʻu ki hoku ʻatamaí mo hoku lotó; mo e ngaahi fakamoʻoni fakafolofola ʻoku kaunga tonu ki he taumuʻa ʻo ʻeku ʻaukaí.

ʻI heʻeku vahevahe mo e Tamai Hēvaní ʻa e ngaahi holi ʻa hoku lotó, ʻokú Ne faʻa tāpuakiʻi au ʻi ha ngaahi founga ne ʻikai ke u fakakaukau ki ai. ʻOku mahino ʻa e fehokotaki ʻa e ngaahi meʻa ko ia naʻe faʻa hoko ʻi heʻeku moʻuí, ʻi he taimi ʻoku ou tohiʻi ai kinautolú peá u vakai ki he founga ʻenau tokoni kotoa ki heʻeku tupulakí mo e fakalakalaká. Talu mei heʻeku ʻuluaki kamata tauhi ha tohinoa ʻo e ʻaukaí ʻi he 1996, mo ʻeku mamata ki hono faitāpuekina ʻe he Tamai Hēvaní ʻeku moʻuí. ʻOku ou fakamoʻoni ki he mālohi fakalaumālie fakaofo ʻo e ʻaukaí mo e lotú, pea ʻoku ou lau ʻa e ʻaukaí ko ha faingamālie ki he “fiefiá mo e lotú” (T&F 59:14).