Ko e Fetokoniʻakí ʻi ʻInitia
ʻI he taimi naʻe maumauʻi ai ʻa e feituʻu fakatonga ʻo ʻInitiá ʻe ha matangi mālohi mo e afā ʻi ʻOkatopa ʻo e 2009, naʻe vave e ngāue ʻa e kau talavou mo e kakai lalahi kei talavou mei he ongo Vahefonua Haitelapati mo Pengikaloa ʻInitiá ke tokoniʻi e faingataʻaʻia ʻa kinautolu naʻe uesia ʻe he tāfeá.
Fakatatau kia Palesiteni Palāsāta Kati ʻo e Vahefonua Haitalapati ʻInitiá, “Naʻe fakahoko ʻe heʻemau kau talavoú ha ngāue fakaʻofoʻofa ko hono fetuku ʻa e meʻakaí mo e vaí kiate kinautolu naʻe faingataʻaʻiá. Naʻe foaki mai ʻa e meʻakaí pea naʻe ʻosi aʻu mai pē ki he vahefonuá, ka naʻe ʻikai lava ʻe he puleʻangá ʻo tufa ia ki he kau faingataʻaʻia ʻe toko lauiafe naʻe ʻi he ngaahi ʻapitanga kumi hūfanga ʻe 200 tupu naʻe ʻi aí. Naʻe ʻilonga ʻaupito hotau kāingalotú heʻenau tui honau ngaahi sāketi Nima Fietokoni ʻo e Māmongá ʻi heʻenau ngāue mālohi ʻi hono tufaki ʻo e meʻakaí mo e vaí ki he kakai kotoa pē.”
Naʻe pehē ʻe ha niʻihi ʻo e kau talavou mo e kakai lalahi kei talavou naʻe tokoní naʻe lava ke nau fiefia mo ongoʻi ʻaonga ʻi he tokoni naʻa nau faí.
ʻI laló: Ko e taha ʻa Palahu Kuma (ʻi he lolí) ʻo e kāingalotu ʻe toko 60 ʻo e Siasí naʻa nau ʻalu atu ki he ngaahi ʻapitanga kumi hūfanga ʻi he vahefonua fakatokelau ko Kanataká. Naʻa nau ʻoatu ha ʻū sipi kafu, tapoleni, mo e ngaahi nāunau haisini naʻe faʻo ʻe he kāingalotu ʻo e Siasí. Naʻá ne pehē, “Ko e meʻa fakaofo moʻoni ʻa e tokoni ʻi he ngāue ko ʻeni ki hono tufaki ʻo e meʻakaí. Naʻe ʻi ai maʻu pē ʻa e holi ʻi hoku lotó ke tokoni mo tauhi ʻa e niʻihi kehé. Naʻá ku fakamālō ʻi he lava ke u tokoní. Ne u loʻimataʻia ʻi he lava ke u mamata ki he kakai ko ia kuo mole ʻenau meʻa hono kotoa ʻi he tāfeá. Ko ha tāpuaki maʻongoʻonga ke u lava ʻo tokoniʻi ʻa e kakai ʻi hoku fonuá.”
ʻOlungá: “ ʻI heʻeku talanoa ki hoku ngaahi kaungāmeʻa ʻi he kolisí ʻo kau ki he ngāue tokoní, naʻa nau fiefia ʻi he ngāue naʻá ku faí. Ne u fakamatala ange ʻa e meʻa naʻa mau faí peá u vahevahe mo kinautolu e ngaahi tefitoʻi moʻoni ʻo e Siasí. Ne u ongoʻi fiefia ʻi heʻeku tokoni ki he kakaí ʻi he ngāue naʻa mau faí. Fakamālō ki he Siasí ʻi hono ʻomai ʻa e faingamālie ko ʻeni ke mau tokoni aí.” —Tīpeki Sama
ʻI toʻomataʻú: “Ne u fuʻu ongoʻi fiefia ʻi he faingamālie ne u maʻu ke tokoni ai ki hoku kāingá. Ko e meʻa fakaʻofoʻofa ne u aʻusiá, pea ne u ako ha ngaahi meʻa lahi ʻi hono fai iá, pea ʻi he taimi tatau pē, naʻa mau fiefia foki ʻi heʻemau fakataha mo homau ngaahi kaungāmeʻá ʻo faʻo ʻa e meʻakaí mo e ngaahi nāunau ko ia naʻe fie maú. Ne u ongoʻi ʻa e ʻofa mo e melino ʻa hoku Fakamoʻuí ʻi heʻeku tokoniʻi ʻa e niʻihi kehé.”—Vēnisi ʻAmisitulongo
“Ne u fiefia ʻaupito ʻi he lava ke u tokoni ʻi he ngāué ni. Naʻá ku maʻu ha fiefia lahi ʻi heʻeku ʻiloʻi naʻá ku tokoni ʻi hono tokangaʻi ʻo e kakai naʻa nau fuʻu faingataʻaʻiá. Ne u lotua ke faitāpuekina ʻa e kakaí.” —Visali Nata
ʻI toʻomataʻú: “Meʻa fakafiefia moʻoni ke kau ʻi he kau ngāue tokoni ʻi he tāfeá. Naʻá ku tokoni ʻi he valí mo hono tufa ʻo e meʻakaí. Ko ha tāpuaki maʻongoʻonga ke ʻi ai mo e kau taki lakanga fakataulaʻeiki kehé pea malava ke tokoni mo tokangaʻi ʻa e kakai naʻe faingataʻaʻia lahí.”—ʻAvina Tōmasi
ʻŪ taá naʻe fai ʻe Charles mo Carol Kewish; tā valivali ʻo Siosefa Sāmitá ʻe Dan Weggeland, ʻi he angalelei ʻa e Musiume Hisitōlia ʻo e Siasí