2 Nīfai 2:11

Kuo hoko maʻu pē ʻa e vēsí ni ko e fakahinohino mo e ueʻi fakalaumālie kiate au ʻi he taimi ʻoku ou veiveiua aí, loto mamahi, pe ʻi ha tūkunga faingataʻa. Kuo hoko ia ko e potufolofola ʻoku ou manako taha aí talu pē mei he taimi ne u fehuʻia ai hono ʻuhinga ʻo e fie maʻu ke ʻi ai ʻa e fehangahangaí. Ko e hā ʻoku ʻi ai ai ʻa e fakafepakí? Ko e hā ʻoku ʻikai ke lelei ai pē, fakafiefia, faingofua, mo fakaʻofoʻofa e moʻuí? Ko e hā ʻoku ʻi ai ai ʻa e koví?

Naʻe tokoni e veesi ko ʻení ke mahino kiate au ʻa e moʻuí mo e fihifihi hono ngaahi meʻá. Naʻá ne tokoniʻi au ke toe lahi ange ʻeku fakahoungaʻi ʻa e ʻuhinga ʻo e moʻuí. Naʻá ne ʻai ke u ʻiloʻi ʻa e taumuʻa ʻo e fakafepakí pea ʻoku totonu ke u fakamālō ai. He ka ne ʻikai ia, he ʻikai ke tau ʻiloʻi ʻa e uho mo e fakaʻofoʻofa moʻoni ʻo e moʻuí. He ka ne ʻikai ʻa e fakafepakí, pehē ʻoku ʻikai ke tau ʻiloʻi ʻa e founga ʻo e ʻofá, ʻa e founga ke tau fiefia aí, pe founga ke tau lavameʻa aí. Kuó u ako ke ʻofa ʻi he moʻuí pea tali ia ʻi he tuʻunga ʻoku ʻi aí pea ke u falala ki he ʻEikí he ʻoku ʻikai toe fehuʻia Hono potó.

Neongo ʻe haʻu ki heʻetau fakakaukaú ha ngaahi fakakaukau kovi, ka ʻoku ʻikai totonu ke tau fakaafeʻi kinautolu ke nau hū mai ki loto ʻo nofo ai. Ko e taimi lelei taha ke maluʻi ai kitautolu mei he ʻahiʻahí ʻa e taimi ko ia ʻoku kamata ke tupu hake ai e foʻi fakakaukaú; fakaʻauha e tengaʻiʻakaú, pea he ʻikai ʻaupito teitei tupu ʻa e fuʻu ʻakaú. ʻI he taimi ʻoku maʻu ai au ʻi he tūkunga pehení, ʻoku ou hivehiva ʻaki e himi ʻoku ou manako taha aí peá u feinga ke maʻu ʻi hoku lotó ʻa e ʻimisi ʻo Sīsuú kae ʻoua leva kuó lava ke tekeʻi ia. ʻE mavahe atu ʻa e ngaahi fakakaukau koví kapau te tau vilitaki ʻi hono tekeʻi kinautolú.