Ko ha Maama ʻi ʻAfilika

ʻI he ngaahi taʻu lahi kuo hilí, ne u aʻusia mo [hoku uaifí], Helieta ha meʻa fakafiefia ne ma mamata ai ki hano fakahoko ha talaʻofa. Naʻá ma ʻi ʻAfilika Hihifo, ko ha konga fakaʻofoʻofa ʻo e māmaní, ʻoku tupu ai e Siasí pea angalelei mo e Kāingalotú. Neongo ia, ʻoku lahi e ngaahi faingataʻá ʻi ʻAfilika Hihifo. Ne u fakaʻofaʻia he masiva ne u sio aí. ʻOku lahi e taʻe maʻu ngāué he ngaahi koló, pea faingataʻa ke malu mo maʻu ʻe he ngaahi fāmilí e ngaahi fie maʻu fakaʻahó. Ne ongo kiate au heʻeku ʻiloʻi ʻoku tokolahi hotau kāingalotu he Siasí ʻoku ʻi he tuʻunga fakaʻofa ko ʻení. Ka ne u toe ʻilo ʻoku fetokoniʻaki e kāingalotú ke fakamaʻamaʻa ʻenau ngaahi kavenga mafasiá.

Ne mau aʻu atu ki ha taha ʻo hotau falelotu ʻoku ofi ki ha fuʻu kolo lahi. Ne ʻikai ke u sio ki ha kakai ʻoku mafasia mo tofanga he fakapoʻulí, ka ne ma sio ki ha kakai fiefia ʻoku hā meiate kinautolu e māmá! Ne mafola mai e fiefia ʻoku nau ongoʻi ʻi he ongoongoleleí ʻo hikiʻi hake homau laumālié. Naʻe moʻoni ʻenau malimalí ʻo fakatupu ai haʻama malimali.

ʻOku ou manatuʻi haʻaku fakakaukau he taimi ko iá pe ʻoku toe ʻi ai nai ha kakai fiefia he māmaní ʻo hangē ko e kakai ko ʻení. Neongo hono ʻākilotoa e Kāingalotu leleí ni ʻe he ngaahi faingataʻá mo e palopalemá, ka naʻa nau fonu ʻi he māmá!

Ne kamata e fakatahá pea kamata ʻeku leá. Ka naʻe taimi siʻi pē kuo mate mai e ʻuhilá pea fakapoʻuli lōlō e falé.

Ne ʻikai lava ke u toe sio ki ha taha he haʻofangá, ka naʻe lava ke u ongoʻi e malimali fiefia mo fakaʻofoʻofa ʻa hotau Kāingalotú. Ne u fuʻu fiefia ʻaupito ke feohi mo e kakai fakaʻofoʻofá ni!

Ne hokohoko atu pē e fakapoʻulí, pea ne u tangutu pē he tafaʻaki hoku uaifí ʻo tali ke ulo mai e māmá. ʻI heʻemau tatalí, ne hoko ha meʻa fakaofo.

Ne kamata ke hivaʻi ʻe ha niʻihi ha taha ʻo e ngaahi himi ki hono Toe Fakafoki Mai ʻo e Ongoongoleleí. Ne kau mai mo ha niʻihi kehe. Ne toe tokolahi ange mo ha niʻihi ne kau mai. Ne fakafonu e falelotú ʻe ha hiva fakaʻofoʻofa moʻoni.

Ne ʻikai fakaʻaongaʻi ʻe he kāingalotu ia ko ʻeni ʻo e Siasí ha tohi himi; he naʻa nau maʻuloto pē e lea ʻo e himi kotoa ne nau hivaʻí. Ne nau hiva hokohoko pē ha ngaahi himi ʻaki ha ivi mo ha laumālie ne ongo ki hoku lotó.

Ne toe ulo mai e ʻuhilá ʻo maamangia e lokí. Ne u fesiofaki mo Helieta, ne ma fakatou tangi.

ʻI he uhouhonga ʻo e fakapoʻulí, ne fakafonu e falelotú mo homau lotó ʻaki e māmá ʻe he Kāingalotu fakaʻofoʻofa mo fakaofó ni.

Ko ha aʻusia fakangalongataʻa ia kiate kimaua—he ʻikai ke toe ngalo ia ʻiate au mo Helieta.