Lekooti ʻeni ʻe Taha Piliona ʻi he FamilySearch

Kuo aʻu hono fakahokohoko fakamotuʻalea (fakaʻilekitulōnika) ʻe he kau ngāueʻofa ʻi he māmaní e ngaahi lekooti hisitōlia fakafāmili lahi ʻo e Siasí ki ha makamaile ʻi he ʻaho 19 ʻo ʻEpeleli 2013. ʻI he ʻaho ko iá ne aʻu ʻo taha piliona e lekooti ne tānaki atu ki he uepisaiti FamilySearch ke fai mei ai ha fekumí ʻi ha taʻu nai pē ʻe fitu.

ʻOku fakamātoato hono ʻomai pe fakahokohoko fakamotuʻala ʻe he kau ngāueʻofá talu mei he 1978 e ngaahi lekōtí, ka ʻi Sepitema 2006 ne kamata ʻe he Potungāue Hisitōlia Fakafāmilí ha ngāue lahi ʻi hono fakaafeʻi ha taha ʻi ha feituʻu pē ke hū ki he saití pea lesisita ke kau ʻi he ngāue fakahokohoko fakamotuʻaleá.

ʻOku fakamatala ʻi he saiti FamilySearch ʻo pehē, “ʻOku maʻu e konga lahi ʻo e fakamatalá mei ha ngaahi maikolofilimi ʻe 2.4 miliona kuo tānaki ʻoku ʻi ai ha ngaahi tā ʻo ha fakamatala fakahisitōlia mei he ngaahi fonua mo ha feituʻu ʻe 110. “ʻOku kau ʻi he ngaahi fakamatalá e lekooti lau kakaí, tohi taʻu mo e tohi mate, laiseni mali, ngaahi lekooti e tau maluʻi fonuá mo e ngaahi kelekelé, mo e ngaahi lekooti mahuʻinga kehe ʻoku tauhi fakalotofonua, fakavahe mo fakafonua ʻe he puleʻangá.”