ko ʻeku Ngaahi Lotu ʻo e Fakafetaʻí

Naʻá ku fakatau mo hoku husepānití ʻi he ngaahi taʻu kuo hilí ha ʻapi ne ma saiʻia ai peá ma fakamoleki ha taimi mo ha paʻanga lahi ke fakaleleiʻi. ʻOsi mei ai ha māhina ʻe hongofulu mā valu, kuo tūʻulu e tuʻunga fakaʻekonōmiká. Naʻe pau ke ma fakamoleki ʻema paʻanga naʻe faingataʻa hono ngāueʻí ki he mōkesi lahi pea mo ha ngaahi fakamole taʻeʻamanekina lahi.

Ne ʻosi atu ha ngaahi māhina ʻo e faingataʻa mo e faingataʻaʻia fakapaʻanga. Peá ma fetaulaki mo ha māhina ne fuʻu faingataʻa ʻi he monomono ʻo e ʻapí mo e ngaahi ʻo e meʻalelé, moʻua fakafaitoʻó, pea toe holoki mo e vahé. Ne pulia vave ʻema kiʻi paʻanga naʻe fakahuú.

ʻOku ou manatuʻi ʻeku lotu ʻo toutou kole mo kole ʻa e ngaahi meʻa ne ma fie maʻú. ʻI he lōmekina au ʻe he loto mafasiá, ne faingataʻa kiate au ke tauhi fakalelei ʻema fānaú mo e ngaahi fie maʻu homa fāmilí ʻi heʻeku fakaʻau ke mamahi mo loto foʻí. Ka, naʻá ku kei lotu pē, ʻo kolea ha fakafiemālie he naʻá ku ʻilo ko e fakamaʻunga pē ʻeni ʻokú ne taʻofi au mei he tō ʻo mamaʻo atu ki he fakapoʻulí.

Hili ha ngaahi māhina ʻo ʻeku lotua ha tokoní, naʻá ku kamata fakakaukauʻi leva ha ngaahi founga ke lotu tāumaʻu ange ai. Naʻe ʻomi ʻe he Laumālié ki heʻeku fakakaukaú ha faleʻi mei he kau taki lakanga fakataulaʻeikí mo e folofolá ʻokú ne akoʻi hono mahuʻinga ʻo e fakahaaʻi e fakafetaʻi ki he Tamai Hēvaní. Naʻe tokoni e ngaahi ueʻi ko ʻení ke u fakatokangaʻi naʻe fie maʻu ke u fakahaaʻi ha fakafetaʻi lahi ange ki hoku ngaahi tāpuakí kae siʻi ʻeku kole ʻa e ngaahi meʻa ʻoku ou fie maʻu mo hoku fāmilí. Naʻá ku pehē ke u ʻahiʻahi ʻi ha uike ʻe taha ke tuku ʻeku ngaahi kole fakaʻahó kae fakahaaʻi pē ha fakafetaʻi ʻi heʻeku ngaahi lotú.

Naʻe faingataʻa. Naʻá ku ongoʻi naʻe lahi e ngaahi fiemaʻu hoku fāmilí. Naʻá ku ongoʻi ʻo hangē kuó u liʻaki hoku fāmilí ʻi he ʻikai ke u kole ʻa e ngaahi tāpuaki ʻoku mau mātuʻaki fie maʻú. ʻE tāpuakiʻi fēfē au ʻe he ʻEikí ʻi he ʻikai ke u kolé?

Neongo ʻeku tailiili fekauʻaki mo iá, ka naʻá ku ʻahiʻahi. Naʻe ʻikai hano taimi kuó u fakatokangaʻi ʻeku ngaahi lotú ʻoku ʻikai ko ha ngaahi kole angamaheni. Naʻá ku toe maʻu e malava ko ia ke fakatokangaʻi e ngaahi fiemaʻu ʻa e niʻihi kehé pea sio fakalaka atu ʻi heʻeku ngaahi palopalemá ki he ngaahi tāpuaki naʻá ku kei maʻú. Naʻe tohoakiʻi au ʻe heʻeku loto fakafetaʻí ke u ofi ange ki he Fakamoʻuí, ʻo ne fakafiemālieʻi au ʻi ha ngaahi founga naʻe ʻikai ke u mei toe maʻu.

Naʻe ake maʻu mai pē ha potufolofola ki heʻeku fakakaukaú: “Kapau ʻoku fakakofu pehē ʻe he ʻOtuá ʻa e mohuku ʻo e ngoué, ʻa ia ʻoku ʻi ai he ʻahó ni, kae lī ki he ngotoʻumú ʻapongipongí, pea ʻe ʻikai lahi hake ʻene fie fakakofuʻi ʻa kimoutolú, ʻa kimoutolu ʻoku siʻi hoʻomou tuí?” Mātiu 6:30 Naʻe fakaloto-māʻulaloʻi au ʻe he potu-folofolá ni ʻi heʻeku hoko atu ke lotú. Naʻá ku ako lahi ange ʻi he loto fakafetaʻí ki he loto fakatōkilalo moʻoní.

ʻI he fakalau atu ʻa e ngaahi uiké, ne liliu ʻeku ngaahi lotú mei he “ʻOku ou fakafetaʻi atu ʻi he meʻakaí, valá, mo e falé” ki he “ʻOku ou fakafetaʻi ki Hoʻo ʻAfió ʻi he fāmili kuó Ke maluʻi mo tauhi fakaleleí, pea mo e maluʻi ʻoku kei fai ʻe he ʻAfioná kiate kimautolú. ʻOku ou fakafetaʻi atu ʻi he ngaahi meʻa ʻe tāpuakiʻi ʻaki kimautolu ʻe he ʻAfioná.” ʻOku ou toe manatuʻi foki ʻeku lotu, “ʻOku ou fakafetaʻi atu ʻi heʻemau fakafalala ki he ʻAfioná, ʻi Hoʻo tokangaʻi kimautolú, pea mo e hala ʻoku teuteu ʻe he ʻAfioná ke mau hao ai mei he pōpulá, pe ko e hā pē.” Naʻe aʻu ki ha tuʻunga ne ʻikai kei hoko ʻeku ngaahi lotú ko ha lotu ʻo e fakafetaʻi, mo e loto fakatōkilalo pē, ka ko ha lotu ʻo e tui foki. Naʻe ʻikai ke u kole ha ngaahi tāpuaki, ka naʻá ku fakahaaʻi ʻeku tui ʻe tokonaki ʻa e ʻEikí maʻamautolu, pea naʻe tupulekina lahi fau ʻeku tuí.

Naʻe faʻa ʻalu ʻeku fakakaukaú ʻi he lolotonga ʻo e ngaahi lotu ko ʻení, ki he feilaulau ʻa e kau ʻuluaki Kāingalotú, peá u faʻa fehuʻi kiate au pe ko e hā ʻa e meʻa te u fie feilaulauʻí. Ne ʻosi atu ha ngaahi ʻaho siʻi, peá ma tuʻuaki fakatau leva homa ʻapí. Naʻe mātuʻaki tōlalo ʻa e tuʻunga ʻo e fakataukelekelé, ka ne ma monūʻia ke fakatau homa ʻapí. Neongo ne ma mole lahi—ʻo hangē ko ʻema ʻamanakí—ka kuo ʻi ha tuʻunga homau fāmilí ke kamata langa ha fakavaʻe fakaetuʻasino mālohi ange.

Ka, ʻoku ʻikai ko hono fakatau homau ʻapí ʻi he taimi faingataʻa peheé ʻa e mana ʻoku ou ʻalu mo ia ʻi he meʻa ko ʻeni ne hokó. Ko e maná ʻa e tui naʻá ku fakatupulakí pea mo e mahino naʻá ku maʻú. Naʻe pehē ʻe Palesiteni Sēmisi E. Fausi (1920–2007), Tokoni Ua ʻi he Kau Palesitenisī ʻUluakí, ko e fakafetaʻí ko ha “tefitoʻi moʻoni fakahaofi.”¹ Te u pehē naʻá ku aʻusia ʻi he faʻahinga meʻa naʻá ne fakamatalaʻí, ʻi he taimi naʻá ku liliu ai hoku lotó mo ʻeku ngaahi lotú ki he Tamai Hēvaní, ʻo maʻu ha fakafiemālie, nonga, mo ha fakahinohinó. ʻOku fakatupu ʻe heʻeku fakamoʻoni foʻou ne toki maʻu ki he fakafetaʻí ʻa e loto fakatōkilaló, pea ʻoku poupouʻi ʻe he loto fakatōkilaló ʻa e tuí, pea ʻoku ʻomai ʻe he tuí ʻa e ngaahi maná.