Ko e Malanga ʻi he tuʻa Tuʻunga Malangá
Seefi Fulumā, ʻAitahō, USA
Ko e meʻa pē naʻá ku lava ʻo fakakaukau ki ai he tangutu hoku fāmilí ʻi ha ngaahi ʻotu siʻi mei he tuʻa ʻo e kau tīkoní ʻi ha houalotu sākalamēniti ʻe taha, ki muʻa ʻi he fua hivá, ko ha tīkoni naʻe ʻikai ke ne haʻi fakalelei hono hēkesi lōloá mo mono fakalelei ki loto hono sote manusinusí. Naʻá ku fakakaukau naʻe totonu ke tokoni ki ai ha taha. Koeʻuhí, he ʻoku totonu ke hoko e kau tīkoní ko ha sīpinga ʻo e Fakamoʻuí ʻi he tōʻongá mo e teuteú, he taimi oku nau tufa ai e sākalamēnití.
Naʻe hoko atu e houalotú, peá ngalo ia ʻiate au. Hili hono tufa ʻe he kau tīkoní ʻa e sākalamēnití, ne kamata leva e ngaahi malangá. Ko e malanga fika uá, ko e faʻē ia ʻa e talavoú. Naʻe lea fekauʻaki mo ʻene uluí, ʻene ngaahi faingataʻaʻia heʻene tupu haké, pea mo ʻene fāifeinga heʻene hoko ko e faʻē tokotahá. Ko ha lea fakaʻofoʻofa pea naʻe tangi. Naʻe tangutu leva ʻi hono nofoʻangá ʻi muʻa pea kei tangi pē ʻi he fakatahataha mai ʻa e kuaea ʻa e uōtí ke hivá.
Feʻunga pē ia mo e tuʻu hake ʻene tama tangatá, mo hono hēkesi hipá mo e sote ne ʻikai mono ki lotó, ʻo lue atu ki he tuʻunga malangá. Naʻá ne fāʻofua ki heʻene faʻeé pea tulolo hifo hono tafaʻakí ke fakanaʻanaʻa. Naʻá ku tangi ʻi heʻeku vakai ki he meʻá ni; naʻe ongo kiate au ʻo ʻikai ke u ma-fakamatalaʻi. Ka ne u toki fakatokangaʻi, peá u mā. Naʻá ku toki fakatokangaʻi ʻi heʻeku tangutu ʻi hoku suti mafolofolá, mo hoku hēkesi kuo haʻi fakaleleí, mo hoku sū kuo palākeniʻi ʻuliʻulí, naʻe ʻikai ke u fakatokangaʻi fakalelei ha meʻa ʻi heʻeku teuteu ki he sākalamēnití.
Naʻe hifo mai ʻa e talavoú mo siʻene faʻeé mei muʻa ʻo tangutu fakataha ʻi he kamata ke hiva ʻa e kuaeá. Naʻá ku tangutu ai, ʻikai ke lava ʻo fanongo ki he hivá koeʻuhí he ko e lēsoni naʻe akoʻi ʻe he tīkoni ko ʻení naʻá ne lōmekina hoku lotó ʻaki ha pōpoaki ʻo e ʻofa faka-Kalaisí.
Kuó ne fakahoko ʻene tōʻongá ʻaki ha manavaʻofa mo e tokanga. Naʻe ʻikai ha momoʻi fakaʻilonga ʻo ha mā ʻi hono fofonga kei siʻí—ka ko e ʻofa haohaoa pē. Naʻe lelei mo e ngaahi malanga hoko mei he tuʻunga malangá he ʻaho ko iá, ka te u manatuʻi maʻu pē ʻa e malanga ʻi he tuʻa tuʻunga malangá.