Kiʻi Tohi Fakamatala ʻo e Konifelenisi ʻo ʻEpēlelí 2013

2013

Sepitema 2013

Kiʻi Tohi Fakamatala ʻo e Konifelenisi ʻo ʻEpēlelí 2013

“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38).

ʻI hoʻo toe vakaiʻi ko ia ʻa e konifelenisi lahi ʻo ʻEpeleli 2013, ʻe lava ke ke fakaʻaongaʻi ʻa e ngaahi pēsí ni (mo e ngaahi Tohi Fakamatala Konifelenisi ʻi he ngaahi pulusinga he kahaʻú) ke tokoni atu ki hoʻo akó mo fakaʻaongaʻi ʻa e ngaahi akonaki fakamuimuitaha ʻa e kau palōfita mo e kau ʻaposetolo moʻuí mo e kau taki kehe ʻo e Siasí.

Ngaahi Lea Fakapalōfita Kau ki he Ngaahi Vaivai ʻo e Tangatá

“ʻI he Siasí ni, ʻe mahuʻinga maʻu pē e meʻa ʻoku tau ʻiló he meʻa ʻoku ʻikai ke tau ʻiló. Manatuʻi, ʻoku ʻaʻeva ʻa e taha kotoa he māmaní ʻi he tui.

“Ko ia, mou angaʻofa fekauʻaki mo e vaivai ʻo e tangatá—ʻa homou ngaahi vaivaí pea pehē foki mo kinautolu ʻoku ngāue fakataha mo koe ʻi ha Siasi ʻoku fakahoko ʻe ha kau ngāue tokoni ko ha kau tangata mo ha kau fafine fakamatelie. Naʻe ngāue ʻa e ʻOtuá mo ha kakai taʻehaohaoa, talu mei he kamataʻanga ʻo taimí, tuku kehe pē Hono ʻAlo haohaoa ʻe Taha naʻe Fakatupú. ʻOku pau ko ha meʻa matuʻaki fakakina kiate Ia, ka ʻoku ngāue ki ai. ʻOku totonu ke pehē mo kitautolu. … Ko ia, ʻai ke mou faʻa kātaki mo angaʻofa mo faʻa fakamolemole.”

ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻEiki, ʻOku ou Tui,” Liahona, Mē 2013, 94.

Ngaahi Tali Maʻaú

Ko e konifelenisi kotoa pē ʻoku ʻoatu ai ʻe he kau palōfitá mo e kau ʻaposetoló ha ngaahi tali fakalaumālie ki ha ngaahi fehuʻi ʻa e kāingalotu ʻo e Siasí. Fakaʻaongaʻi hoʻo pulusinga ʻo e konifelenisí pe hū ki he conference.lds.org ke maʻu e ngaahi tali ki he ngaahi fehuʻi hangē ko ʻení:

ʻE fēfē haʻaku tuʻu mālohi ʻi he taimi ʻe manukiʻi ai au ko ʻeku tuí? Vakai, Robert D. Hales, “Tuʻu Maʻu ʻi he Ngaahi Potu Toputapú,” 48.
Ko e hā te u lava ʻo fai kapau ʻoku fai ʻe ha taha ʻoku ou ʻofa ai ha ngaahi fili ʻoku kovi? Vakai, Henry B. Eyring, “Haʻu Kiate Au,” 22; mo e Richard G. Scott, “Ke Melino ʻa ʻApi,” 29.
Ko e hā ʻoku mahuʻinga lahi ai e nofomali ʻa ha tangata mo ha fefiné? Vakai, David A. Bednar, “ʻOku Mau Tui ki he Angamaʻá,” 41; L. Whitney Clayton, “Nofomalí: Sio pea Ako,” 83; mo e L. Tom Perry, “Ko e Tauʻatāiná ʻa e Talangofua ki he Fonó,” 86.
Ko e hā e taumuʻa ʻo e lakanga fakataulaʻeikí? Vakai, M. Russell Ballard, “Ko ʻEku Ngāué ʻEni mo Hoku Nāunaú,” 18.
Ko e hā ʻoku tau fie maʻu ai ha siasí? Vakai, Quentin L. Cook, “Melino Fakatāutahá: Ko e Pale ʻo e Anga Māʻoniʻoní,” 32; mo e D. Todd Christofferson, “Huhuʻí,” 109.