Ngaahi Sīpinga Tuʻuloa
“Pea ʻe tataki ʻa kinautolu ʻe ha tamasiʻi siʻi” (2 Nīfai 21:6).
ʻI heʻeku hoko ko ha mēmipa ʻo e kau palesitenisī lahi ʻo e Palaimelí, ʻoku ou saiʻia ke feʻiloaki mo e fānau he funga kotoa ʻo e māmaní. Ko e feituʻu kotoa pē ʻoku ou ʻalu ai, ʻoku ou feʻiloaki mo ha fānau fakaʻofoʻofa ʻoku muimui ʻia Sīsū Kalaisi mo moʻui faivelenga ʻaki e ongoongoleleí. ʻOku nau faʻa taki honau fāmilí mo e niʻihi kehé ʻi hono tauhi e ngaahi fekaú.
Naʻe ʻaʻahi ha Taki Māʻolunga ki ha uooti ʻi Hongo Kongo naʻe fāifeinga ai ʻa e kakaí ke tokonaki maʻa honau fāmilí. Naʻá ne talaange ki he pīsopé ʻoku totonu ke totongi vahehongofulu ʻa e kāingalotú.
Naʻe manavasiʻi ʻa e pīsopé. Naʻe ʻikai ke mei maʻu ʻe he kakaí ha meʻakai mo ha paʻanga feʻunga ke feau ʻenau ngaahi fie maʻú.
Naʻe talaange ʻe he Taki Māʻolungá, “Kapau te nau totongi vahehongofulu, ʻe tāpuakiʻi kinautolu ʻe he ʻEikí.”
Naʻe kiʻi fakakaukau nounou e pīsopé. Peá ne talaange, “Te u lea ki ha niʻihi ʻo e kāingalotu faivelenga taha ʻo homau uōtí—ʻa e fānau Palaimelí!”
ʻI he Sāpate hokó, ne ʻaʻahi e pīsopé ki he Palaimelí. Naʻá ne akoʻi e fānaú ki he fono ʻo e vahehongofulú. Naʻá ne kole ange ke nau totongi vahehongofulu e paʻanga ʻoku nau maʻú. Naʻe palōmesi ʻa e fānaú te nau fai ia—pea naʻa nau fakahoko!
ʻOsi ha ngaahi māhina mei ai, kuo fai ha fakataha ʻa e pīsopé mo e kakai lalahi ʻi he uōtí. Naʻá ne talaange kuo totongi vahehongofulu ʻenau fānaú.
“Te mou loto fiemālie ke totongi vahehongofulu mo kimoutolu?” ko ʻene fehuʻí ange ia.
Naʻe ongo ki he kakai lalahí e sīpinga faivelenga ʻa e fānaú. Naʻa nau talaange te nau totongi vahehongofulu mo kinautolu. Koeʻuhí naʻe tā-sīpinga ʻa e fānaú, naʻe maʻu ai ʻe he ngaahi fāmilí ʻa e ngaahi tāpuaki naʻa nau fie maʻú (vakai, Malakai 3:8–10). Naʻe tupulaki e tui mo e fakamoʻoni ʻa e taha kotoa.
Ko e fē pē ha feituʻu ʻokú ke nofo ai, te ke lava ʻo taki ha niʻihi ʻaki hoʻo sīpinga leleí. Tauhi e ngaahi fekaú mo muimui ʻia Sīsū Kalaisi. Pea te ke hoko ko ha tāpuaki ki ho fāmilí mo e niʻihi kehé.
ʻOku mau lotua kimoutolu. Pea ʻoku mau ʻiloʻi, ʻo hangē ko e fānau ʻi Hongo Kongó, ʻe lava ʻo hoko hoʻomou tā-sīpinga leleí ko ha tokoni ki he leleí!
Faitaaʻi ʻe he © Busath Photography; tā fakatātaaʻi ʻe Maren J. Scott