Pōpoaki ʻa e Faiako ʻAʻahí
Moʻui fakafalala pē kiate kitá
Ako ʻi he faʻa lotu ʻa e fakamatala ko ʻení, pea aleaʻi ia mo e kau fafine ʻokú ke ʻaʻahi ki aí ʻo ka feʻunga ke fakahoko. Fakaʻaongaʻi ʻa e ngaahi fehuʻí ke tokoni atu ki hono fakamālohia ʻo e kau fafiné pea ʻai ke hoko ʻa e Fineʻofá ko ha konga longomoʻui ʻo hoʻo moʻuí. Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
Ko e moʻui fakafalala pē kiate kitá ko e malava, mo e tukupā, pea mo e ngāue ke tokonaki maʻa ʻetau tuʻunga lelei fakalaumālié mo e fakaetuʻasinó pea mo hotau ngaahi fāmilí.1
ʻI heʻetau ako mo fakaʻaongaʻi e ngaahi tefitoʻi moʻoni ʻo e moʻui fakafalala pē kiate kitá ʻi hotau ʻapí mo e koló, ʻoku tau maʻu ai ha ngaahi faingamālie ke tokoniʻi e paeá mo e masivá mo tokoniʻi e niʻihi kehé ke nau moʻui fakafalala pē kiate kinautolu koeʻuhí ke nau lava ʻo matuʻuaki e taimi ʻo e faingataʻá.
ʻOku ʻatautolu ʻa e faingamālie mo e fatongia ke ngāueʻaki ʻetau tauʻatāina ke filí ke tau moʻui fakafalala fakalaumālie mo fakaetuʻasino kiate kitautolu pē. Ne akoʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene meʻa fekauʻaki mo e moʻui fakafalala fakalaumālie pē kiate kitá mo ʻetau fakafalala ki he Tamai Hēvaní ʻo pehē: “ʻOku tau ului mo moʻui fakapotopoto fakalaumālie ʻi he taimi ʻoku tau moʻui ʻaki ai ʻetau ngaahi fuakavá—ʻo fakafou ʻi hono maʻu moʻui taau ʻo e sākalamēnití, taau ke maʻu ha lekomeni temipalé pea mo e feilaulau ke tokoniʻi e niʻihi kehé.”2
Kuo faleʻi kitautolu ʻe ʻEletā Heili ke tau moʻui fakafalala pē kiate kitautolu fakaetuʻasino, “ʻa ia ʻoku kau ai ʻa hono maʻu ʻo ha tuʻunga fakaako ʻoku māʻolunga ange, pe ko ha ako fakangāue, feinga ke poto he ngāué pea moʻui ʻo fakatatau pē mo e meʻa ʻoku tau maʻú. ʻI heʻetau fakaʻehiʻehi ko ia mei he fakamoʻuá kae fakahū ha paʻanga he taimi ní, ʻoku tau mateuteu ai ke tokoni taimi kakato ʻi he Siasí ʻi he kahaʻú. Ko e taumuʻa ʻo e moʻui fakapotopoto fakaetuʻasino mo fakalaumālié ke tau [hiki ki] ha tuʻunga māʻolunga ange [ke] tau lava [ʻo] tokoni ki he niʻihi kehe ʻoku fie maʻu tokoní.”3
Mei he Folofolá
Mātiu 25:1–13; 1 Tīmote 5:8; ʻAlamā 34:27–28; Tokāteline mo e Ngaahi Fuakava 44:6; 58:26–29; 88:118
Mei Hotau Hisitōliá
Hili e fakatahataha ʻa e Kāingalotu ʻo e Ngaahi ʻAho Kimui Ní ki he Teleʻa Sōlekí, ʻa ia ko ha toafa maomaonganoa, ne fie maʻu kinautolu ʻe Palesiteni Pilikihami ʻIongi ke nau tupulekina mo fokotuʻu ha ngaahi ʻapi tuʻumaʻu. Naʻe ʻuhinga ʻeni ki hono fie maʻu ʻa e Kāingalotú ke nau ako ha ngaahi pōtoʻi ngāue te nau lava ai ke moʻui fakafalala pē kiate kinautolu. Naʻe falala lahi ʻa Palesiteni ʻIongi ʻi he ngāué ni ki he ivi, ngaahi talēniti, līʻoa, pea mo e loto fie ngāue ʻa e kakai fefiné, peá ne poupouʻi ai kinautolu ʻi ha ngaahi fatongia fakaetuʻasino pau. Neongo ko e ngaahi fatongia pau e kakai fefine ʻo e Fineʻofá ʻoku faʻa kehe ʻi he ʻahó ni, ka ʻoku kei tuʻu maʻu pē ʻa e ngaahi tefitoʻi moʻoní:
-
Ako ke faʻa ngāue pea fakaʻehiʻehi mei he nofonoá.
-
Maʻu ha laumālie ʻo e moʻui feilaulaú.
-
Tali ke fatongia fakatāutaha ʻaki e mālohi fakalaumālié, moʻui leleí, ako fakaʻatamaí, ngāue maʻuʻanga moʻuí, meʻa fakapaʻangá, meʻatokoní mo e ngaahi fiemaʻu kehe ke paotoloaki ʻaki e moʻuí.
-
Lotua ha tui mo ha lototoʻa ke matuʻuaki ʻa e ngaahi faingataʻá.
-
Fakamālohia e niʻihi kehe ʻoku siʻi fie maʻu tokoní.4
Tā fakatātaaʻi ʻo e ʻatá ʻe Robert Casey