Konifelenisi lahí pea mo Au

Naʻá ku faʻa fakakaukau ki he fakaʻosinga ʻo e uike konifelenisi lahí naʻe lōloa mo taʻeoli, ka ʻi he ʻosi atu ʻa e taimí, kuó u maʻu ha ʻofa mo e vēkeveke ke fai mo aʻu ki ai. ʻE lava ʻo fakafonu fakalaumālie kitautolu ʻi he fakaʻosinga ʻo e uiké ʻi he Konifelenisi lahí, ka ʻe faingofua pē ʻa e ngalo atu e ngaahi ongo ko ʻení ʻi he aʻu ko ia ki he ʻaho Mōnité. Ko e niʻihi ʻo e ngaahi fakakaukau ko ʻení ʻokú ne lava ke tokoniʻi au ke u ako lahi lolotonga ʻa e konifelenisí.

ʻOku ou teuteuʻi au ki he konifelenisí ʻaki ʻeku hiki hifo ha ngaahi fehuʻi, peá u hiki hifo leva ʻa e lahi taha ʻo e ngaahi tali teu maʻú. ʻI he ʻosi iá, ʻoku ou saiʻia leva ke hiki hifo ʻa e ngaahi lea mei konifelenisí mo e ngaahi hivá mei he LDS.org pea fakahū leva ia ki he MP3 ke u lava ʻo fanongo ki ha lea pe himi ʻi heʻeku ʻalu atu ki heʻeku ngaahi ngāue ʻi he ʻahó. ʻOku ou saiʻia ke toki ako ʻa e ngaahi lea mei he konifelenisi ʻi he Liahona. ʻOku ou fakaʻilongaʻi mo ha fanga kiʻi fakamatala ʻi he tafaʻaki ʻo ʻeku tohí. ʻI he aʻu ko ia ki he konifelenisi hokó kuó u ʻosi fakaʻaongaʻi lelei ʻeku tohi makasini ko iá. ʻOku faʻa fakaʻaongaʻi ʻe hoku fāmilí ʻi he taimi ʻe niʻihi ʻa e ngaahi pōpoakí ʻi he efiafi fakafāmilí.

Kapau ʻoku tau fie maʻu ke tau maʻu ʻa e ongo ʻa e laumālié lolotonga ʻa e konifelenisí ʻoku fie maʻu ke tau ngāueʻi ia, ka ʻi he taimi ʻoku ou fai ai ʻení ʻoku ou ongoʻi ha tāpuaki lahi ʻiate au. ʻOku ou faʻa maʻu ha ngaahi tataki mo ha ivi mālohi ʻi he taimi ʻoku ou ako ai ʻa e ngaahi pōpoaki mei he konifelenisí, pea ʻoku ou ʻiloʻi ʻoku ueʻi fakalangi ʻa e ngaahi pōpoaki ko iá.