Ko e Fāmilí Ko e Uho Ia ʻo e Palani ʻa e Tamai Hēvaní

Naʻe saiʻia ʻa Misa hono langa e ngaahi tauá ʻaki e ngaahi poloká, ka ko e taimi ʻe niʻihi naʻe loto-foʻi ʻi he taimi naʻe ngangana ai ʻe ngaahi poloká ki he falikí. Hili iá naʻá ne ʻilo ha kiʻi fakapulipuli ʻI he taimi ʻoku ne fakaʻaongaʻi ai ha poloka lahi ange ʻi lalo ʻi he tauá, ʻoku toe mālohi ange ai e fakavaʻe ʻo e tauá Naʻe fiemaʻu ʻa e faʻa kātakí mo e akó, ka naʻe vave pē ʻene langa ha taua ne ʻikai toe faingofua ʻene holó.

Hangē ko ia ko e ako ʻa Misa ke langa ha taua ʻoku toe mālohi angé, te tau lava ʻo faʻu ha fāmili ʻoku toe mālohi angé. Ko e ngaahi fāmilí ko ha konga mahuʻinga ʻaupito ia ki he palani ʻa e Tamai Hēvaní maʻatautolú. Naʻa tau moʻui ko ha ngaahi foha mo ha ʻofefine fakalaumālie ʻo e Tamai Hēvaní kimuʻa pea toki fāʻeleʻi mai kitautolú. Ko e taimi ko ia naʻe fiemaʻu ai ke tau haʻu ki māmaní, naʻa Ne palani ke tau haʻu ki ha ngaahi fāmili. ʻOkú ne fiemaʻu ke maluʻi, akoʻi, mo tokoniʻi kitautolu ke tau toe foki hake kiate Ia ʻe hotau ngaahi fāmilí.

ʻE lava ke tau ngāue ke ʻoange ki hotau fāmilí ha fakavaʻe ʻoku toe mālohi angé. Te tau lava ʻo ako ke tokoni mo fetokoniʻaki. Te tau lava ʻo fanongo mo lea lelei ki he taha kotoa pē. Te tau lava ʻo lotu mo ako fakataha ʻa e folofolá. Te tau lava ʻo ngāue fakataha mo feohi fakataha ʻo fai ha meʻa ʻoku tau manako ai. Te tau lava ʻo faʻu ha fāmili mālohi ange, ʻaki e faʻa kātakí mo e mateuteú.