Ko e Talaʻofa ʻo Polotá

ʻI he taimi naʻe mālōlō ai ʻeku tamai ʻi he fonó, naʻe fakataha homau fāmilí ke talitali e niʻihi kehe ne omi ko e fie kaungā mamahí. ʻI heʻeku feohi mo e fāmilí mo e kaungāmeʻá ʻi he efiafí kotoa, ne u faʻa fakatokangaʻi homa mokopuna taʻu 10 ko Polotá, naʻá ne tuʻu he veʻe tafaʻaki ʻeku faʻē ʻi he fonó—ko ʻene kuí. Taimi ʻe niʻihi naʻá ne tuʻu ʻi mui ʻiate ia, ʻo sio pē. Ne tuʻo taha haʻaku fakatokangaʻi ʻena fepikinimá. Ne u sio ki heʻene milimili hono nimá, fāʻofua ki ai, mo tuʻu ʻi hono tafaʻakí.

Hili ha ngaahi ʻaho mei he aʻusia ko iá, ne ʻikai lava ke toʻo e ʻata ko iá mei hoku ʻatamaí. Ne ueʻi au ke fai ha ʻīmeili kia Polota Ne u fakahā kiate ia e meʻa ne u mamata mo ongoʻí. Ne u fakamanatu kiate ia ʻa e ngaahi fuakava kuó ne fai he taimi ne papitaiso ai iá, ʻo ʻoange e ngaahi lea ʻa ʻAlamaá ʻi he Mosaia vahe 18:

“Pea ko ʻeni ko e meʻa ʻi hoʻomou holi ke hū ki he lotoʻā sipi ʻo e ʻOtuá, pea ui ʻa kimoutolu ko hono kakaí, pea ʻoku mou loto ke fefuaʻaki ʻa hoʻomou ngaahi kavengá, koeʻuhí ke nau maʻamaʻa;

“ʻIo, pea ʻoku mou loto ke tangi fakataha mo kinautolu ʻoku tangí; ʻio, pea fakafiemālieʻi ʻa kinautolu ʻoku ʻaonga ki ai ʻa e fakafiemālié, pea tuʻu ko e kau fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē pea ʻi he feituʻu kotoa pē koeʻuhí ke mou ʻi aí, ʻo aʻu ki he maté, … koeʻuhí ke mou maʻu ʻa e moʻui taʻengatá—

“… Kapau ko e fakaʻamu ʻeni ʻo homou lotó, ko e hā haʻamou ʻuhinga ke ʻoua naʻa papitaiso ʻa kimoutolu ʻi he huafa ʻo e ʻEikí, ko e fakamoʻoni kiate ia kuo mou fai ha fuakava mo ia te mou tauhi kiate ia mo tauhi ʻene ngaahi fekaú, koeʻuhí ke ne huaʻi hifo ʻa hono Laumālié ʻo lahi ʻaupito kiate kimoutolu?” (veesi 8–10).

Naʻá ku fakamatalaʻi ange kia Polota naʻe akoʻi ʻe ʻAlamā ko kinautolu ʻoku nau loto fiemālie ke papitaisó ʻoku fie maʻu ke nau ngāue maʻae ʻEikí ʻaki ʻenau tokoniʻi e niʻihi kehé—ʻi hoʻo moʻuí kotoa! Naʻá ku pehē ange: “ʻOku ʻikai ke u ʻilo pē ʻokú ke ʻiloʻi, ka ko e taimi ʻokú ke fakahaaʻi ai hoʻo ʻofa mo hoʻo tokanga ki hoʻo kuí ko hoʻo tauhi ia hoʻo ngaahi fuakavá. ʻOku tau tauhi ʻetau ngaahi fuakavá he ʻaho kotoa pē ʻaki ʻetau angalelei, fakahā ʻa e ʻofá, mo fetauhiʻakí. ʻOku ou loto pē ke ke ʻiloʻi ʻoku ou laukau ʻaki hoʻo hoko ko ha tokotaha tauhi fuakava! ʻI hoʻo tauhi ʻa e fuakava ʻokú ke fai ʻi he taimi naʻá ke papitaiso aí, te ke mateuteu ai ke fakanofo koe ki he lakanga fakataulaʻeikí. Ko e fuakava makehe ko ʻení te ne teuteuʻi koe pea te ne foaki atu ha ngaahi faingamālie lahi ke faitāpuekina mo tokoniʻi e niʻihi kehé mo teuteuʻi koe ki he ngaahi fuakava te ke fai ʻi he temipalé. Fakamālō atu ʻi hoʻo hoko ko ha faʻifaʻitakiʻanga lelei kiate au! ʻOku ou fakamālō atu ʻi hono fakahā mai kiate au e founga ʻo e hoko ko ha tokotaha tauhi fuakavá!”

Naʻe tali mai ʻe Polota: “Fakamālō atu Kulenimā, ʻi he pōpoakí. Naʻe ʻikai ke u ʻilo ʻoku ou tauhi ʻeku ngaahi fuakavá, ʻi he taimi ne u fāʻofua maʻu pē ki heʻeku Kui uá, ka naʻe māfana hoku lotó mo ongoʻi lelei moʻoni. ʻOku ou ʻilo ko e Laumālie Māʻoniʻoní ia ʻi hoku lotó.”

Ne māfana foki hoku lotó ʻi heʻeku fakatokangaʻi ʻoku ʻilo ʻe Polota ko e taimi ko ia ʻokú ne tauhi ai ʻene ngaahi fuakavá, ʻe “ʻiate [ia] maʻu ai pē ʻa hono Laumālié [Tamai Hēvaní]” [T&F 20:77]. Ko ha talaʻofa ʻeni ʻoku malava ke hoko ʻi hono maʻu e meʻafoaki ʻo e Laumālie Māʻoniʻoní.