Naʻa Na ʻIlo Fēfē?

Naʻe fai ʻe Palesiteni Tieta F. ʻUkitofa, Tokoni Ua ʻi he Kau Palesitenisī ʻUluakí, ha pōpoaki ki he houʻeiki fafine ʻo e Fineʻofá lolotonga e fakataha lahi ʻo e Fineʻofá he 2011 ʻa ia naʻe ongo ki hoku lotó mo ʻomi kiate au ʻa e melinó. Naʻá ne lea kau ki he matalaʻi ʻakau siʻisiʻi ko e ʻoua-ʻe-ngalo-aú pea mo e meʻa ʻoku fakafofongaʻi ʻe he lau ʻe fā ʻo e matalaʻi ʻakau ko ʻení.¹

Hili e fakatahá ne fakahoko mai ʻe hoku ʻofefine ko ʻAlisá ha talanoa fekauʻaki mo hono kaungāmeʻa ko Sesí, ʻoku ʻi ai haʻane kiʻi pisinisi ngaohi meʻatokoni. Naʻe kole ʻe he kau palesiteni Fineʻofá kia Sesi ke ne teuteu ha hikingaua ke tufa ʻi he hili ʻa e fakataha lahi ʻa e Fineʻofá. Naʻe talaange ʻe Sesi kia ʻAlisa ʻokú ne ʻiloʻi he taimi pē ko iá ʻa e meʻa ʻoku totonu ke ne faí—te ne ngaohi ha foʻi keke ʻe 250. Naʻe fie tokoni ʻa ʻAlisa ʻi hono fetuku e ngaahi foʻi keké ki he senitā fakasiteikí.

Naʻe aʻu ki he ʻaho ʻo e fakatahá, pea ʻi he taimi naʻe ʻalu ai ʻa ʻAlisa ke tokoní, naʻá ne ʻiloʻi ʻa Sesi ʻoku meimei tangi. Naʻe ʻosi maau e ngaahi foʻi keké, ka naʻe ʻave ʻe Sesi ha fakatātā ʻo e keké ki hano kāinga ʻo nau talamai ʻoku ʻikai fakaʻofoʻofa feʻunga ia ki he fakatahá.

Naʻe kamata ke veiveiuaʻa Sesi. Naʻá ne fakaʻosi ʻaki ʻene pehē ʻoku ʻamanaki mai ʻa e kau taki ʻo e Fineʻofá ki ha meʻa ʻoku toe sai angé ka ʻoku ʻikai ko ʻene ngaahi foʻi keke ne ngali faingofua hono ngaohí. Naʻá ne feinga ai ke fakakaukauʻi ha founga ke toe teuteuʻi ai e ngaahi foʻi keké, ka naʻe ʻikai maʻu ha taimi feʻunga. Naʻá na ʻalu leva mo ʻAlisa ʻo ʻave e ngaahi foʻi keké ʻi he tuʻunga pē naʻe ʻi aí, mo ongoʻi ʻe Sesi ʻokú ne fai ha ngāue kovi ki he kau fafiné—kae ʻoua kuo toki aʻu ki he lea ʻa Palesiteni ʻUkitofá.

ʻI he taimi naʻá ne lea ai ʻo kau ki he matalaʻi ʻakau siʻisiʻi ko ʻení, ne ʻasi mai ha fakatātā ʻo e kiʻi matalaʻi ʻakau lanu pulū ʻi he screen. Ko ha matalaʻiʻakau faingofua mo fuʻu fakaʻofoʻofa ʻa hono laú. Naʻe ongo ki he loto ʻo e taha kotoa pē ʻa e pōpoaki ʻa Palesiteni ʻUkitofá ʻo hangē ko ia naʻá ne kolé ke ʻoua naʻa tau hē ʻi he matalaʻi ʻakau lalahí kae ngalo ʻiate kitautolu ʻa e moʻoni mahuʻinga faingofua ʻe nima naʻá ne akoʻi mai kiate kitautolú.

Hili e lotu tukú, naʻe ō atu ʻa e kau fafiné ki he holo faiʻanga faivá. ʻI he taimi naʻe hū atu ai ʻa ʻAlisa mo Sesí, naʻe takatakai ʻa e tokotaha kotoa pē ʻi he tēpile hikingaua mo fehuʻi, “Naʻa na ʻilo fēfē?”

Naʻe fakakilimi ʻa e foʻi keke takitaha ʻaki e kilimi hinehina pea teuteuʻi ʻaki e matalaʻi ʻakau ʻe taha ʻoku faingofua, fakaʻofoʻofa, mo lau ʻe nimá ko e ʻoua-ʻe-ngalo-aú.