Ngaahi Fakakaukau Maʻá e Efiafi Fakafāmili ʻi ʻApí

“ʻAho ʻe Fitu Kimuʻa He Toetuʻú,” peesi 10, mo e “Kau Fakamoʻoni Makehe ʻoku nau Fakamoʻoni ki he Kalaisi Moʻuí,” peesi 16: Te ke lava ʻo fakaʻaongaʻi ʻa e ngaahi nāunau ʻi he ngaahi fakamatala ko ʻení ke fakahoko haʻamou fakataha lotu fakaʻaho mo ho fāmilí he uike kimuʻa he Toetuʻú. Kamata ʻi he Sāpate kimuʻa e Toetuʻú, lau ʻa e ngaahi fakamoʻoni ʻa e Kau Palesitenisī ʻUluakí ʻi he peesi 17 pea muimui ki he ngaahi fakahinohino ʻi he “ʻAho ʻe Fitu Kimuʻa He Toetuʻú.” ʻI he ʻaho kotoa pē mei ai, lau e ngaahi fakamoʻoni ʻo ha ongo ʻAposetolo ʻe ua pea fakaʻaongaʻi e ngaahi folofolá, ngaahi hivá, mo e ʻekitivitī ʻi he “ʻAho ʻe Fitu Kimuʻa he Toetuʻú” ke vahevahe ha pōpoaki mo ho fāmilí. ʻI he Pongipongi Toetuʻú, te ke lava ʻo sio ʻi he vitiō mei he Tohi Tapú “Kuó Ne Toetuʻu,” ʻe lava maʻu atu ʻi he lds.org/bible-videos (ʻi ha ngaahi lea fakafonua kehekehe).

“Fuʻu Faingofua ia, Kulenipā!” peesi 67: Hili hono lau e talanoa ko ʻení, ʻe lava ke ke toʻo mai ho uasí! Fakakaukau ke lau ha peesi mei he Tohi ʻa Molomoná mo ho fāmilí pea vakaiʻi e taimí ki he lōloa ʻo e taimi ki hono laú. Fakaʻaongaʻi ʻa e taimi ko iá ko ha fakahinohino, pea fakafuofuaʻi e lōloa ʻe lava ai ho fāmilí ke nau lau e Tohi ʻa Molomoná. Mahalo te ke fie fokotuʻu ha taumuʻa ke lau fakataha ʻa e Tohi ʻa Molomoná. ʻE tokoni kapau te mou faʻu ha taimi-tēpile, hangē ko e lau ʻi ha taimi tukupau he ʻaho kotoa pē, ke aʻusia hoʻo taumuʻa ngāué.