Hiki e Maká
Mei he “ʻUnu ke Ofi Ange ki he ʻOtuá,” Liahona, Nōvema 2013, 104.
Ne feinga ha kiʻi tamasiʻi ke fakatokaleleiʻi e kelekele makamaka ʻi mui ʻi hono ʻapí kae lava ke vaʻinga ai mo ʻene fanga kiʻi kaá. Ne ʻi ai ha foʻi maka lahi naʻá ne fakafeʻātungiaʻi ʻene ngāué. Ne teke mo fusi ʻe he kiʻi tamasiʻí e foʻi maká ʻaki hono iví kotoa ka naʻe ʻikai pē ngaue e foʻi maká ia.
Naʻe mamata ʻa ʻene tamaí ʻi ha vahaʻa taimi. Naʻa ne haʻu leva ki hono fohá ʻo pehē ange, “ʻOku fie maʻu ke ke ngāue ʻaki ho iví kotoa ke hiki ʻaki ha maka lahi peheni.”
Ne tali e kiʻi tamasiʻí, “Kuó u fakaʻaongaʻi kotoa hoku iví!”
Naʻe fakatonutonu ia ʻe heʻene tamaí: “ʻIkai, ʻoku teʻeki ai. ʻOku teʻeki ai ke ke maʻu ʻeku tokoní!”
Naʻá na punou fakataha peá ne faingofua hono ʻunuakiʻi e foʻi maká.
ʻOku finangalo e ʻEikí ke tau falala kiate Ia ʻi hono fakaleleiʻi ʻetau ngaahi palopalemá. ʻE lava leva ke tau ongoʻi lahi mo hokohoko ange, mālohi ange, mahino ange mo fakatāutaha ange ʻEne ʻofá. ʻOku tau fāitaha mo Ia, pea lava ke hoko ʻo tatau mo Ia.