Fakakaungāmeʻa mei he Funga Māmaní
Ko Tulia au mei he ʻOtu Filipainí
Mapuai, Kapiani!*
Mei ha ʻinitaviu mo Ame Seini Leviti
Kuó ke fakaʻānaua nai ke ke nofo ʻi ha kiʻi motu? Ko ʻAlesanitulia ʻeni, ka ʻoku ui fakanounouʻi pe ʻe hono fāmilí mo hono ngaahi kaungāmeʻá ko Tulia. ʻOkú ne nofo ʻi he motu ʻi Filipaini ko Sepú mo ʻene faʻeé, tamai, pea mo hono ongo tehiná. Naʻe ʻi ai foki mo hono tuongaʻane lahi ka naʻá ne pekia kimuʻa pea toki fāʻeleʻi ʻa Tuliá. ʻOkú ne pehé “ʻOku ou ʻilo ʻokú ne kei hoko pē ko e konga ia homau fāmilí, pea te u toe sio ki ai ʻi ha ʻaho koeʻuhí ko e fāmilí ʻoku taʻengata.”
Ko e taha ʻo e ngaahi meʻa ʻoku ou manako taha ke faí ko e hulohula. Ko ha tokotaha tauʻolunga pālei (ballet) au. ʻOku ou ʻamanaki ke hiki hake ki he tuʻunga hokó ʻi he taʻu kahaʻú, ʻa ia ko e pōnité (pointe). ʻOku ʻuhinga ʻeni te u tui leva e sū makehe ki he pāleí ʻe tokoni ke u hulohula ʻaki hoku louhiʻi vaʻé.
ʻOku laka hake ʻi he motu ʻe 7,000 ʻi he ʻotu Filipainí, ko ia ai ʻoku lahi e ngaai feituʻu fakaʻofoʻofa ke ʻaʻahi ki aí. ʻOku ofi homau ʻapí ki he matātahí, pea ʻoku ou manako ke vaʻinga ʻi he tahí. Ko e taha ʻo e ngaahi meʻa ʻoku ou manako aí ko e kakaú. Naʻá ku akoʻi pē foki au keu poto he kakaú!
ʻOku ou saiʻia he ʻalu mo hoku fāmilí ʻo ʻaʻahi ki ha ngaahi matātahi kehekehe. ʻI ha taimi ʻe taha naʻá mau ō ai ki Palauani—ko ha kiʻi motu ʻoku ʻi ai e vatafe lahi taha ʻo māmaní ʻi lalo fonuá. Naʻá ku ʻalu mo ʻeku nāunau ukú ʻo uku ai pea sio ki he fanga ika lanu kehekehe kotoa pē.
Naʻe pehē ʻe ha niʻihi ʻo e kaungā akó ʻi ha ʻaho ʻe taha ʻi he akó, ʻoku ʻikai ke tui ʻa e kau Māmongá ki he ʻOtuá. Naʻá ku fakahā ange kiate kinautolu ʻoku tau tui ki ai. ʻI he ʻaho hono hokó, naʻá ku haʻu mo ha ngaahi kaati tufa ʻa ia naʻe ʻasi ʻi muʻa ha fakatātā ʻo Sīsū Kalaisi pea mo e ngaahi Tefito ʻo e Tuí ʻi he tafaʻaki ki muí. ʻI he sio hoku kaungā akó ki he fakatātaá mo lau ha niʻihi ʻo ʻetau tui fakalotú, naʻa nau fiefia ke ʻiloʻi ʻoku tau tui ki he ʻOtuá.
ʻOku ou Fie Sio he Temipalé
ʻOku mau monūʻia ke nofo ofi ki he Temipale Sepū Siti Filipainí. Naʻá ku lava ke ʻaʻahi mo hoku familí ki he temipalé kimuʻa pea toki fakatapuí. Ko ha feituʻu fakaʻofoʻofa mo nonga ia. ʻOku ou fakamāloʻia koeʻuhí ko e temipalé, he ʻe lava ke ne fakatahaʻi hoku fāmilí ʻo taʻengata.