Mohe ʻi he ʻAho Tokonakí pea Malimali ʻi he Sāpaté

ʻOku sai’ia ʻa Mela ʻi hono ʻai ke malimali e kakaí. Naʻá ne ʻai ke malimali ʻene faiakó ʻi heʻene hiki hake hono nimá ke fai ha ngaahi fehuʻí. Naʻá ne ʻai hono tokoua, ko Maselá, ke malimali ʻi heʻene fai ha ngaahi lea lelei kiate iá.

Hili iá pea ʻe malimali foki mo Mela. Naʻe fakafiefia ke tokoniʻi e kakai kehé ke nau fiefiá.

Ka naʻe ʻi ai e taimi ʻe taha he uike kotoa pē ne tātaaitaha pē ke malimali ʻa Mela. Ko e taimi ko iá ko e pongipongi Sāpaté. Ko e taimi ia ne faʻa helaʻia lahi taha maʻu pē ai ʻa Mela mo Maselá. Naʻe toe fakatupu ke na ʻiteʻita lahi ange ʻi he fakavave holo ke teuteu ki he lotú. Pea toe lue lōloa ki he lotú. Naʻe laka hake ʻi ha maile ʻe taha hono mamaʻó! Ne faʻa aʻu tōmui ki ai ʻa Mela mo Masela. Te na faʻa liʻaki e konga ʻuluaki ʻo e Palaimelí.

Naʻe pehē ʻe Sisitā Lima ʻi he ʻaho ʻe taha, “ʻOku mau ʻofa atu kiate kimoua ʻi he ʻikai ke mo ʻi heni he taimi totonú.” Ko e palesiteni Palaimeli ia ʻi honau uōtí ʻi Palāsilá.

Naʻe ʻiloʻi ʻe Mela ʻoku totonu ke ne ʻalu ki he lotú ʻi he taimi totonú. Ka ʻe founga fēfē? Naʻe ʻi ai leva ha fakakakau ʻa Mela. ʻI he pō Tokonaki hono hokó, ne fakakaukau ʻa Mela ke ʻahiʻahiʻi ha meʻa foʻou.

Naʻe fufulu ʻe Mela hono nifó, kae ʻikai toe fufuuʻi e meʻakaí ki he taimi mohé ʻI he ngaahi ʻaho lahi naʻe pau ke fakamanatu ʻe he Fineʻeikí ki he ongo tamaiki fefiné ke tamateʻi e TV peá na ō ʻo mohe. Ka neongo ia te na pūlou hona kafú ’o vaʻinga mo fefanafanahi ʻo aʻu ki he fuoloa e poʻulí. Taimi ʻe niʻihi naʻá na ʻā fuoloa aí, naʻe ʻikai mei lava ke faka’ā’ā hake hona matá. Ne pau ke na ngaungaue ke ʻoua te na mohe.

Ko e pō ko ’ení naʻe tui ʻe Mela hono vala mohé peá ne hangatonu ki he mohengá. Naʻe ʻikai toe fie maʻu ke fakamanatu ange ʻe he Fineʻeikí kiate ia. Naʻe kamata ke ne sio ki he ngaahi fakatātā ʻi muʻa ʻi heʻene Tohi ʻa Molomoná.

“Ko e ha ho’o me’a ’oku fai?” Ko e fehu’i ange ia ’a Maselá.

Naʻe pehē ʻe Mela, Ko ha sivi.” Naʻe fonu hono ʻatamaí ʻi he ngaahi fakakaukau fakafiefiá. ʻIkai ngata aí naʻá ne ʻosi ongoʻi fiemohea.

Ko e meʻa hono hoko naʻe ʻiloʻi ʻe Melá, ko e ulo mai e laʻaá ʻi hono matapā sioʻatá. Naʻe mei taimi ke teuteu ki he lotú. Naʻe ongoʻi fiefia ʻa Mela kae ʻikai toe ongoʻi palakūʻia. Naʻe ʻikai ke toe ngangau hono ʻulú. Naʻe ʻikai ke ongosia hono sinó.

Naʻá ne aʻu ki he Palaimelí kimu’a ʻi ha niʻihi ʻo e kau taki.

Naʻe pehē ʻē Sisitā Lima, “ʻOku ou fakamālō atu ʻi hoʻo hoko ko ha faʻifaʻitakiʻanga lelei ki he fānau kehé.”

Ko e taimi leva ʻeni ke malimali ai ʻa Melá. Naʻá ne fakakaukau te ne mohe vave maʻu pē ʻi he ʻTokonakí. Na’á ne lava ʻi he founga ko iá ʻo fiefia ʻi he Sāpaté kotoa.