Naʻá ku Toutou Kole Ange

Naʻá ku ʻiloʻi ʻoku totonu kotoa ke tau vahevahe ʻa e ongoongoleleí, ka ne teʻeki ai ke u maʻu ha ola lelei. Pea lolotonga ha kalasi lea faka-Sipeini naʻá ku toʻo, naʻá ku fetaulaki ai mo ha talavou ko Tiako. Naʻá ma hoko ko ha kaungāmeʻa peá ma faʻa foki fakataha ki ʻapi mei he akó. ʻI he ʻaho ʻe taha, naʻá ma fakalaka atu ʻi ha falelotu ʻo e Siasí ne toki langa.

Naʻá ku pehē ange, “Kuó u hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho kimui Ní ʻi he ngaahi taʻu lahi.” Ne u vahevahe mo ia ha niʻihi ʻo e ngaahi meʻa ʻoku tau tui ki aí, pea fakahā kiate kuo lahi fau hono faitāpuekina au mo hoku fāmilí koeʻuhí ko e ongoongoleleí. Naʻá ku fakaafeʻi ia ke haʻu ki he ngaahi houalotú ʻi he Sāpate ko iá ʻi he 9:00 a.m.

Naʻe aʻu ki he Sāpaté pea ne u tatali loto vēkeveke, ka naʻe ʻikai ke ne haʻu. Naʻá ku toe fakaafeʻi ia he lolotonga e uiké. Ne hokohoko ʻeni ʻi he uike kotoa pē ʻi ha māhina ʻe ua pe tolu. Naʻá ne ʻomai maʻu pē kiate au ha ʻuhinga naʻe ʻikai ʻalu ange aí: “Naʻá ku mohe kuo fuoloa e poʻulí,” “Naʻá ku helaʻia,” “Naʻe ʻi ai ha ngaahi palopalema.” Ka naʻá ku toutou kole pē kiate ia, pea hangē ne ʻikai ke ne tokanga ki ai.

ʻI he pongipongi Sāpate ʻe taha ne u tangutu ʻi he taha ʻo e ngaahi sea naʻe ofi ki he tafaʻaki ki mui ʻo e falelotú. Naʻe kei toe pē ha ngaahi miniti siʻi kimuʻa pea kamata ʻa e lotú mo e ui leʻosiʻi mai ʻe ha taha hoku hingoá. Ne u sio ki he matapaá, ko Tiako!

Naʻá ne pehē “Naʻe ʻikai koā ke u palōmesi atu te u haʻu ʻi ha ʻaho?” Naʻá ne maʻu ʻa e houalotu sākalamēnití, pea naʻá ku ʻohovale, ʻi heʻene nofo he toenga ʻo e ngaahi houalotú pea hangē naʻe fiefia ʻi he taimi naʻá ku fakafeʻiloaki ai ia ki he kau faifekaú. Ne kamata ke ne fetaulaki maʻu pē mo kinautolu. Naʻe hokohoko atu ʻema talanoa mo Tiakó ʻi heʻema lue foki ki ʻapi mei he akó, ka naʻe fekauʻaki ʻema talanoá mo e ngaahi moʻoni ko ia naʻá ne akó. Ne u lava ʻo tali e ngaahi fehuʻí mo fai ʻeku fakamoʻoní. Faifai, peá ne maʻu ha fakamoʻoni pea kau ki he Siasí.

ʻI he ʻahó ni ʻoku ou hoko ko ha faifekau taimi kakato ʻi he Misiona Palāsila Sanitā Maliá. Kimuʻa peá u ʻalu ki he malaʻe ʻo e ngāue fakafaifekaú, naʻe fakahū foki ʻe Tiako ʻene foomu ke hoko ko ha faifekau taimi kakato, pea ʻokú ne lolotonga ngāue ʻi he Misiona Palāsila Manaú.

Naʻá ku toki maʻu ha tohi meiate ia. Naʻá ne tohi ʻo pehē “ʻOku ou fakamālō atu hoʻo toutou fakaafeʻi au ki he lotú.” “Te u houngaʻia ʻo taʻengata.” ʻOku ou fiefia ke vahevahe e ongoongoleleí ʻi he ʻaho kotoa pē ka ʻoku ou toe fiefia foki ke ʻiloʻi ʻoku fakahoko ʻe Tiako e meʻa tatau.