ʻI he ʻaho ʻe taha naʻe fie maʻu ʻe Sīsū ke akoʻi ʻa e kakaí ʻi he founga ke kei mālohi ai neongo e hoko ʻa e ngaahi faingataʻá. Naʻá Ne fai kiate kinautolu ha talanoa fekauʻaki mo ha afā lahi, ko ha tangata poto, mo ha tangata vale. ʻI he tō mai ʻa e matangí, ne ʻikai holo e fale ʻo e tangata potó koeʻuhí he naʻe langa ia ʻi ha funga maka. Ka naʻe holo e fale ʻo e tangata valé koeʻuhí he naʻe langa ia ʻi he ʻoneʻoné.
Naʻe akoʻi ʻe Sīsū ʻa hono mahuʻinga ko ia ke maʻu ha tui kiate Iá pea muimui ki Heʻene ngaahi akonakí. ʻI heʻetau fakatupulaki ha fakamoʻoni mālohí, te tau mālohi feʻunga ke tuʻu, tatau ai pē pe ko e hā e ngaahi meʻa faingataʻa ʻe ala hokó.
Ko e talanoa fakatātaá ko ha faʻahinga talanoa makehe. ʻOku fakamatala fekauʻaki mo e fanga kiʻi meʻa faingofua ʻoku tau angamaheni ki aí, hangē ko ha ʻuha lōvai pe ko ha mataʻitofe mahuʻinga. Naʻe fai ʻe Sīsū ʻa e ngaahi talanoa fakatātaá ke tokoni ki he kakaí ke mahino kiate kinautolu ʻa e ngaahi moʻoni fakalaumālié. Ko e talanoa fakatātā ʻe taha ʻi he Mātiu 13:44–46 . Ko e hā ʻokú ne akoʻi fekauʻaki mo e mahuʻinga fau ʻo e ongoongoleleí? Te ke lava nai ʻo maʻu ha ngaahi talanoa fakatātā kehe?
Hiki ʻa e ngaahi ʻekitivitī hangē ko ia ʻi laló ʻi he ʻū laʻi pepa. Taufetongi ʻi hono fili mo lau leʻolahi kinautolú. Aleaʻi e ʻuhinga ʻoku hangē ai hono fakahoko takitaha iá ko hano langa ha fale ʻi he funga maká pe ʻoneʻoné. ʻE tokoni’i fēfē kitautolu ʻe he fakafanongo ki he kau palōfitá ke tau muimui ʻi he ngaahi akonaki ʻa Sīsuú mo fai ha ngaahi fili fakapotopoto?
Ko hono lau fakataha ʻo e folofolá
Fakahoko ha pole
Ko e ʻalu ki he lotú
Tukuakiʻi ha taha kehe ʻi ha fehalaaki
Fai hoʻo ngāue fakaakó mei ʻapi
Fakahaaʻi e fakaʻapaʻapa ki he niʻihi kehé
Tala e moʻoní
Tuʻu fakalongolongo pē lolotonga ʻoku fakamamahiʻi ha taha
Fanongo ki he konifelenisi lahí
Ko e kākā ʻi he ngāue fakaakó
Fakakau ha taha ʻoku foʻoú
Ko hono fakaʻaongaʻi ʻo e ngaahi lea koví
Vaʻinga mo ha tokoua pe tuongaʻane
Ko e vahevahe mo e niʻihi kehé
Fakamoleki ha taimi lahi ʻi he ngaahi keimi fakakomipiutá
Toʻo ha meʻa ʻoku ʻikai ko haʻaú
Ko e lotu he pongipongí mo e pō kotoa pē
Fakakau ha taha ʻoku tuenoa
Fili ha foʻi maka hamolemole. Tohiʻi ai ʻa e “Sīsū Kalaisi,” ʻaki ha peni fakaʻilonga pe vali. Talanoa fekauʻaki mo hono ʻuhinga ʻoku mātuʻaki mahuʻinga ai ke langa ʻetau moʻuí ʻi Heʻene ngaahi akonakí. Tauhi ʻa e foʻi maká ʻi ha feituʻu te ke lava ʻo toutou sio ki aí.
ʻE lava ke tokoniʻi kitautolu ʻe he Tohi ʻa Molomoná ke mahino ʻa e Fuakava Foʻoú. Lau ʻa e Hilamani 5:12 . Ko e hā naʻá ke ako kau ki he ʻuhinga ʻo e foʻi lea ko e maká mei hono lau e veesi ko iá? Kumi ʻa e “Maká” ʻi he Fakahinohino ki he Ngaahi Folofolá ke vakai kapau te ke lava ʻo ʻiloʻi ha ngaahi veesi kehe ʻe tokoni ke mahino lahi ange kiate koe.
Lau fakataha ʻa e Mātiu 7:24–29 . Te mou lava foki ʻo tā ha fakatātā ʻo e talanoá. Hili iá pea mou talanoa leva fekauʻaki mo e ngaahi fehuʻi ko ʻení: Ko e hā ha ngaahi meʻa ʻi heʻetau moʻuí ʻoku hangē ko e ʻuhá mo e havilí? ʻE lava ke tatau hono fai ha ngaahi fili ʻo fakatatau mo e meʻa ʻoku manakoá mo hono langa hotau falé ʻi he ʻoneʻoné? ʻOku maluʻi fēfē kitautolu ʻe he ngaahi akonaki ʻa Sīsuú mo ngaohi kitautolu ke tau mālohi ʻo hangē ko ha fale ʻoku langa ʻi ha maká? Talanoa kau ki ha ngaahi founga ʻe lava ke mou langa ai hoʻomou tui kia Sīsū Kalaisí.
Hiva: “Ko e Tangata Potó mo e Tangata Valé” (Tohi Hiva ʻa e Fānaú, 132)
Folofolá: Mātiu 7:24–29