Fai ha Fakaafe pea Toe Vakai’i
’Ahi’ahi’i ʻa e ngaahi founga faingofua ʻe 11 koʻení ke vahevahe ʻa e ongoongoleleí ʻi he ngaahi fetalanoaʻaki fakaʻahó.
Kapau ʻokú ke fie maʻu ke vahevahe ʻa e ongoongoleleí ka ʻokú ke manavasiʻi pe ʻikai ke fakapapauʻi e founga ke fai ai iá, ko e fakamatala ko ʻení maʻau. ʻOku lahi ange hono vahevahe ʻa e ongoongoleleí ʻi hono fakaafeʻi pē ho ngaahi kaungāmeʻá ke feʻiloaki mo e kau faifekaú. Ko ha fakakaukau lelei ia, ka ʻoku ʻi ai ʻa e ngaahi meʻa kehe lahi te ke lava ʻo fai ke “fakaafeʻi ha niʻihi kehe ke haʻu kia Kalaisi” (Malangaʻaki ʻeku Ongoongoleleí: Ko Ha Fakahinohino ki he Ngāue Fakafaifekaú [2004], 1). Pea ʻoku faingofua ange ia ʻi he meʻa ʻokú ke fakakaukau ki aí. Mahalo ʻe tokoni atu ha talanoa fakatātā ʻo e soká.
ʻOku ʻiloʻi ʻe he kau vaʻinga leleí ʻa e founga mo e taimi ke paasi ai e foʻi pulú ki heʻenau timí ke ʻoange kiate kinautolu ha faingamālie ke nga’unu ki muʻa ʻOku hangē hono fakaafeʻi ha niʻihi kehe ke nau ako fekauʻaki mo e ongoongoleleí ko hono paasi ʻo e foʻi pulú, ka ʻoku ʻikai ke ke ʻoange ha faingamālie ke fokotuʻu ha kai, ʻokú ke ʻoange ha faingamālie ke nau haʻu ai kia Kalaisi.
Ko ha ngaahi fakakaukau ʻeni ʻe niʻihi ke ke kamata ʻaki. Lotua ha tataki fakalaumālie peá ke mohu founga ʻi hoʻo fulihi ʻa e ngaahi fakakaukau ko ʻení ke feʻunga mo e ngaahi manako mo e tūkunga ho ngaahi kaungāmeʻá. Hili iá pea poupouʻi kinautolu!
Fakaafeʻi ha kaungāmeʻa ki he Mutualé
ʻOku ʻi ai haʻo kaungāmeʻa ʻoku manako ʻi he sipotí. Ko ia ʻi hoʻo fanongo ko e ʻekitivitī ʻo e Mutualé ki he uike ní ko ha efiafi sipoti, ʻokú ke ʻiloʻi ko e faingamālie totonu ia ke fakaafeʻi mai ai.
Kole ki haʻo kaungāmeʻa ke tokoniʻi koe ke ke fai ha ngāue ʻi he Fakalakalaka Fakatāutahá pe Fatongia ki he ʻOtuá
ʻI hoʻo palani hoʻo ngāue lahí, ʻokú ke fakatokangaʻi te ke fie maʻu tokoni, ko ia ʻokú ke fakakaukau ke kole ki ha niʻihi ʻo ho ngaahi kaungāmeʻa taʻe Siasí ke tokoni. ʻE lava ʻeni ke ʻoatu ʻa e faingamālie kiate koe ke fakamatalaʻi ange e ʻuhinga ʻokú ke ngāue tokoni aí, pea lava foki ke mo fiefia ʻi he ʻngāue tokoni fakatahá.
Fakaafeʻi haʻo kaungāmeʻa ke ʻalu ki ha hulohula ʻa e Siasí
ʻOku fakaafeʻi koe ho kaungāmeʻa lelei tahá ke mo ʻeva he Falaite ko ʻení, ka ʻoku fai ha hulohula ʻa e Siasí ʻi he pō ko iá. Fakaafeʻi ia ki he hulohulá, kae ʻoua ʻe fakasītuʻaʻi ʻene fakaafé!
Talaange ki ha taha fekauʻaki mo e Tohi ʻa Molomoná
ʻOku ʻi ai ha taumuʻa homou uōtí ke lau e Tohi ʻa Molomoná ke ’osi ʻi he fakaʻosinga ʻo e taʻú, ko ia ʻalu mo hoʻo folofolá ki he akó. ʻOku fakatokangaʻi ʻe ha taha ʻo ho ngaahi kaungāmeʻá hoʻo tohí pea fehuʻi atu fekauʻaki mo ia, ko ia fakamatalaʻi ange ʻa e Tohi ʻa Molomoná mo vahevahe hoʻo fakamoʻoni kau ki aí.
Lau ʻa e talanoa ʻa Kēnetí ki mui ange ʻi he fakamatala ko ʻení ke ʻiloʻi e meʻa naʻe hoko ʻi heʻene mamata ki ha mēmipa ʻo e Siasí mo ha Tohi ʻa Molomona ʻi he akó.
Fakaafeʻi ha kaungāmeʻa ki he lotú
Kuo kole atu ke ke akoʻi ha konga ʻo ha lēsoni he Sāpaté. ʻI hono ʻeke atu ʻe ha kaungāmeʻa ho’o meʻa ʻe fai ʻi he fakaʻosinga ko ʻeni ʻo e uiké, fakamatalaʻi ange te ke akoʻi ha konga ʻo ha lēsoni ʻi he lotú, kae ʻoua te ke liʻaki ho’o ngaahi palani ʻi he Sāpaté. ʻOku fie ʻilo ho kaungāmeʻá, ko ia fakaafeʻi leva ia ke mo ʻalu ke ne lava ʻo fanongo ki hoʻo faiakó.
Fakahā ki ho ngaahi kaungāmeʻá ʻa e Mormon.org
ʻOku lahi ha ngaahi fehuʻi ho ngaahi kaungāmeʻá fekauʻaki mo ʻetau tuí, fakaʻaliʻali leva kiate kinautolu ʻa e Mormon.org ke tokoni ke tali ʻenau ngaahi fehuʻí.
Vahevahe ha fakamatala mei he Liahona
ʻOku fakamanatu atu ʻe ha taha ʻo e ngaahi fakamatala mei he makasini fakamuimuitaha ʻo e Liahona haʻamo fetalanoaʻaki mo ha taha ʻo ho ngaahi kaungāmeʻá. ʻOkú ke vahevahe mo ia hoʻo tatau ʻo e makasiní (pe ko ha link ʻi he ʻinitanetí) pea fakaafeʻi ia ke ne lau ʻa e fakamatalá.
Vahevahe ha potufolofola ʻi ha pōpoaki text he telefoní
Lolotonga hoʻo ako folofola pongipongí, ʻokú ke lau ha veesi ʻe ʻaonga ʻaupito ki ha kaungāmeʻa kuo faingataʻaʻia kimuí ni mai. ʻOkú ke pōpoaki ki ai ʻi he telefoní ʻo fakahā ange naʻá ke fakakaukau kiate ia peá ke maʻu ha potufolofola te ne ngali saiʻia ai.
Fakaafeʻi ha taha ki he maʻu meʻatokoni efiafí
ʻOku ngaohi ʻe he Tangataʻeikí ʻene sipēketi manakoá he uike ni! ʻOkú ke fakatokangaʻi ha taha ako foʻou ʻi ho ʻapi akó ʻoku hangē ʻoku ʻikai tokolahi hono ngaahi kaungāmeʻá, ko ia fakakaukau leva ke fakaafeʻi ia ki he maʻu meʻatokoni efiafi ʻa e fāmilí. Kapau ko ha pō Mōnite, te ke lava ʻo kole ange ke nofo ki he efiafi fakafāmili ʻi ʻapí ’i he’ene ’osí.
Fakaafeʻi ha kaungāmeʻa ke mo mamata ʻi he konifelenisi lahí
ʻOkú ke fanongo ki ha lea mei he konifelenisi lahí ʻi hoʻo MP3 player lolotonga hoʻo lue ki he akó. ʻOku ʻeke atu ʻe ha kaungāmeʻa pe ko e hā ʻokú ke fanongo ki aí. ʻOkú ke talaange ʻa e moʻoní—ʻokú ke fanongo ki he lea ʻa ha palōfita moʻui ʻa e ʻOtuá. ʻOku fehuʻi atu ho kaungāmeʻá, “Ko e hā hono ʻuhinga iá?” ʻOkú ke fakamatala kau ki he kau palōfita ʻo onopōní pea mo e kau ʻaposetoló pea fehuʻi leva ki ho kaungāmeʻá pe te ne loto ke kau mo koe ʻi ʻEpeleli ke fanongo ki he meʻa ʻoku lea ʻaki ʻe he kau taki ko iá.
ʻOange ki ha kaungāmeʻa ʻa e Ki hono Fakamālohia ʻo e Toʻu Tupú
Kapau ʻoku fehuʻi atu ʻe ha kaungāmeʻa pe ko e hā ʻokú ke moʻui ʻaki ai ha ngaahi tuʻunga moʻui paú, ʻoange ha tatau ʻo e Ki hono Fakamālohia ʻo e Toʻu Tupú pea talanoa ʻo kau ki he founga kuo tokoni ai ʻa hono moʻui ʻaki e ngaahi tuʻunga moʻuí ke ke ongoʻi fiefia angé.
Lau ʻa e talanoa ʻa Hená ʻi he fakamatala ko ʻení ke vakai ki he founga naʻá ne vahevahe ai ʻa e kiʻi tohi ko ʻení mo ha kaungāmeʻá.
ʻOua naʻa ngalo ke toe vakaiʻi
Hili hono fakaafeʻí, ko e sitepu hono hokó ke toe vakaiʻi. ʻI he soká, ʻoku ʻilo ʻe he kau vaʻinga lelei tahá ʻoku ʻikai ʻosi honau fatongiá hili hono paasi ʻa e foʻi pulú—kuo pau ke nau ngaungaue mo feinga ke ʻataʻatā.
ʻE lava ke faingofua pē hono toe vakaiʻí hangē ko hono ʻeke pē ki ho kaungāakó ʻene fakakaukau fekauʻaki mo e folofola naʻá ke vahevahé pe naʻe ongoʻi fēfē ho kaungāmeʻá hili hoʻomo ʻalu ki he lotú.
Vakaiʻi ʻa e talanoa ʻa Kēnetí ki ha sīpinga ʻo e founga naʻe liliu ai ʻe he toe vakaiʻí ha moʻui ʻa ha talavou.
ʻI hoʻo toe vakaiʻi hili hono fakaafeʻi ʻo e niʻihi kehé ke ako fekauʻaki mo hoʻo tuí, ʻokú ke fakahaaʻi ʻokú ke tokanga ki heʻenau fiefiá. Te nau ongoʻi ʻa hoʻo holi moʻoni ke tokoní pea te nau ongoʻi fiemālie ke fai atu ha ngaahi fehuʻi lahi ange ʻi he kahaʻú.