Ko Hono Tala e Ngaahi Fakapulipulí

Naʻe tāpuni ʻe Luʻisa ʻene pepa fiká ʻi he tā ʻa e fafangú. Naʻe ʻikai ke ne mei lava ke tukutaha ʻene tokangá ki he ngaahi palopalemá ʻi he houa ʻe taha kuo ʻosí.

Naʻe fakavavevave kotoa e fānau ako kehé ki tuʻa. Ko e kalasi fakaʻosi ia he ʻaho Falaité. Ko e angamahení naʻe ongoʻi fiefia foki mo Luʻisa ʻi he fakaʻosinga ʻo e uiké. Ka ʻi he ʻahó ni naʻe ʻikai ke ne ongoʻi ha meʻa ka ko e hohaʻa pē. Talu mei he kai hoʻataá. Ko e taimi ia naʻe ʻeke ange ai ʻe hono kaungāmeʻa lelei tahá, ʻa Kalotia, ha fehuʻi: “Te ke lava nai ʻo tauhi ha kiʻi fakapulipuli?”

ʻI he taimi ko iá, ne ʻunu atu ʻa Luʻisa pea kamokamo ʻi he loto vēkeveke. Naʻá ne poto ʻi he tauhi ʻo e ngaahi fakapulipulí. Naʻá ne fakakaukau fakapapau ko e ʻai ke talaange ʻe Kalotia kau ki ha kiʻi tamasiʻi talavou naʻá ne manako ai.

Ka naʻe ʻikai ha fakaoli ʻe taha ʻa e fakapulipuli ʻa Kalotiá.

Naʻe fakahohaʻasi ʻe ha leʻo ʻa e ngaahi fakakaukau ʻa Luʻisá. Naʻe kemo hono matá pea sio hake mei hono tesí. Naʻe fehuʻi ange ʻe heʻene faiakó, “Naʻe ʻi ai haʻo fehuʻi fekauʻaki mo hoʻo ngāue fakaako mei ʻapí, Luʻisa?” Kuo ʻosi mavahe kotoa e fānau ako kehé mei he lokí.

Naʻe tali atu ʻa Luʻisa, “Ikai.” Naʻá ne fesiofaki mo ʻene faiakó. Naʻe pau ke ne fakahā ki ha taha! Ka naʻe fekau ia ʻe Kalotia ke ne palōmesi ke ʻoua te ne tala.

Naʻe lea fakavave atu ʻa Luʻisa, “Te u ʻalu ke maʻu e pasí.” Naʻá ne tui hono koté peá ne fakavave atu ki tuʻa ki he ʻea momokó.

ʻI he heka pasi ʻa Luʻisa ki ʻapí, naʻá ne ongoʻi mātuʻaki loto manavasiʻi naʻe ʻikai ke ne mei matuʻuaki. Naʻá ne ongoʻi haʻihaʻisia ʻi hono fatafatá, hangē naʻe faingataʻa ke mānavá.

Naʻe ʻikai lava ʻe Luʻisa ke taʻofi ʻene fakakaukau fekauʻaki mo e fakapulipuli ʻa Kalotiá. Naʻe talaange ʻe Kalotia ʻi he kai hoʻataá kuó ne fai ha meʻa naʻe fakatuʻutāmaki. Naʻe kei faingataʻa pē kia Luʻisa ke tui ki he meʻa naʻá ne fanongo ki aí. Naʻá ne fakakaukau naʻá ne ʻiloʻi ʻa hono kaungāmeʻa lelei tahá! Ne ʻikai ke ne lava ʻo fakakaukauloto atu ki hano fai ʻe Kalotia ha meʻa fakailifia pehē. ʻI he ʻosi ʻa e maʻu meʻatokoni hoʻataá, ne fekau ʻe Kalotia ʻa Luʻisa ke palōmesi ke ʻoua te ne tala ki ha taha.

Kae fēfē kapau ʻe lavea ʻa Kalotia?

Naʻe feinga ʻa Luʻisa ke ʻoua ʻe fanongo ki he kakata mo e talanoa ʻi he pasí ʻi heʻene kuikui hono matá pea lotu ʻi hono lotó.

“Kātaki, ʻe Tamai Hēvaní, ʻo tokoni mai ke u ʻilo e meʻa ke faí. ʻOku ʻikai te u fie maʻu ke ʻita mai hoku kaungāmeʻá kiate au. Ka ʻoku ʻikai ke u loto ke hoko foki ha meʻa kiate ia. ʻI he huafa ʻo Sīsū Kalaisí, ʻēmeni.”

Ne ngali lōloa ange ʻa e lue ki ʻapí ʻi he angamahení. ʻE lava nai ʻa e Fineʻeikí ke tala naʻe ʻi ai ha meʻa naʻe fehalaaki ʻi he aʻu ʻa Luʻisa ki ʻapi? Ko e hā ʻoku totonu ke ne lea ʻakí?

ʻI heʻene sio hifo ki he sinoú, naʻe manatuʻi ʻe Luʻisa ʻa e tau tolo sinou naʻá na kamataʻi mo Kalotia mo ha fānau kehe ʻi he pāká ʻi he uike kuo ʻosí. Naʻe fakafiefia ʻaupito ia! Naʻá ne fakakaukau ki he ngaahi meʻa kehe naʻá na manako mo Kalotia hono fai fakatahá. ʻEvá Lue laló. Fai e ngāue fakaako mei ʻapí. Vaʻinga sipotí.

ʻE fēfē nai kapau ʻe tala ʻe Luʻisa ʻene fakapulipulí pea ʻikai toe fie hoko ʻa Kalotia ia ko hano kaungāmeʻa? Naʻe fakatupu ʻe he fakakaukau ʻa Luʻisa ʻene ongoʻi ʻoku faingataʻaʻia hono keté.

Hili iá naʻe toe ʻi ai haʻane fakakaukau ʻe taha. Ko e taimi ní ko e meʻa mahuʻinga tahá ko e meʻa ko ia naʻe lelei taha kia Kalotiá—ʻikai ko e fakakaukau ʻa Kalotia kiate iá. Naʻe fie maʻu ʻe Kalotia ha kaungāmeʻa moʻoni, ha kaungāmeʻa te ne tokoniʻi ia ke ne malu. Naʻe ʻiloʻi ʻe Luʻisa naʻe fai maʻu pē ʻe Sīsū ʻa e meʻa naʻe lelei taha maʻá e niʻihi kehé, ʻo tatau ai pē kapau naʻe ʻikai ke saiʻia ha niʻihi ʻiate Ia.

Naʻe ʻiloʻi ʻe Luʻisa e meʻa naʻe fie maʻu ke ne faí. Kuo pau ke ne talanoa ki ai mo ʻene Fineʻeikí. Te ne tā foki kia Kalotia ʻo talaange naʻá ne hohaʻa pea naʻe fie maʻu ha taha lahi ke tokoni. Mahalo pē ʻe talanoa leva ʻa Kalotia ki heʻene faʻeé.

Ne ongoʻi maʻamaʻa ange ʻa e loto ʻo Luʻisá ʻi heʻene lue atu ki hono matapā ʻi muʻá.

Naʻá ne ui atu ʻi heʻene hū ki lotó “Fineʻeiki?” “ʻE lava nai ke ta talanoa?”

Mahalo ʻe iku ʻita ʻa Kalotia, ka naʻe ʻiloʻi ʻe Luʻisa ko e meʻa ʻeni ʻoku totonu ke faí. Te ne hoko ko ha kaungāmeʻa moʻoni.

Naʻe fuʻu mahuʻinga ha ngaahi fakapulipuli ke tauhi.