Ko e Meʻa ʻOku Tau Ako mei Heʻetau Mātuʻá

Naʻá ku ako ke ngāue mālohi ’i hoku ’apí. Naʻe fakaʻaongaʻi ʻe hoku fāmilí ha founga ʻoku mau ui ko e “lisi faivelengá.” ʻI he kamataʻanga ʻo e māhiná, naʻa mau maʻu ha lisi ʻo e ngaahi ngāue kehekehe, hangē ko hono fufulu e ʻū peletí, hono tokangaʻi ʻo e fanga hōsí, mo e ngaahi alā meʻa peheé. Naʻa mau fakaʻilongaʻi ʻa e ngaahi ngāué ʻi heʻemau fakakakato kinautolú, pea ʻi he fakaʻosinga ʻo e māhiná, ne ʻomi kiate kimautolu ha paʻanga ki heʻemau ngāue faivelengá ʻo fakatatau ki he lahi ʻo e ngaahi fakaʻilonga ne mau maʻu ʻi he sātí. Kuó u ako mei he meʻá ni ke ngāue tokanga ʻaki ʻa e paʻangá.

Pita Sateki ʻo Vasitapoteni, Suēteni

ʻI heʻene hoko ko ha mātuʻa tāutahá, naʻe lahi e ngaahi meʻa ʻeku fineʻeikí ke faí, ka naʻá ne faʻa tuku maʻu pē ha taimi ke tokoniʻi au, fakafiemālieʻi au, pe fakafanongo pē kiate au. Naʻe mahuʻinga ʻaupito ʻa hono ʻiloʻi naʻá ne ʻi ai maʻu pē, pea ʻoku ou fie fai ia ki heʻeku fānaú ʻi he kahaʻú.

ʻI he toe mali ʻeku fineʻeikí, naʻe fili hono husepāniti foʻoú ke hoko ko e tamai kiate au mo hoku tuongaʻane lahí. Ne ʻikai fuoloa mei ai, kuo kau mai ha kiʻi tehina ki homau fāmilí, ka kuo teʻeki ke u ongoʻi ha momoʻi liliu ʻi he founga tokanga mo e ʻofa kuó ne tokangaʻi ʻaki kimautolu kotoá ʻo hangē pē haʻaná. ʻOku ou fakamālō ki hono ʻulungāngá, kuó u lava ai mo hoku tuongaʻane lahí ke tupu hake ʻi ha fāmili mālohi mo uouangataha pea mo e lakanga fakataulaʻeiki ʻi he ʻapí. Naʻe makehe ʻaupito ʻa e ʻaho ko ia naʻe silaʻi ai kimautolu ko ha fāmilí. Kuo akoʻi au ʻe heʻene sīpinga ʻofá ko e tamaí ʻoku ʻikai ko hao konga—ko ha meʻa ia ʻokú ke hoko ki ai.

ʻAmanitā Konilisi ʻo Sitokalahoma, Suēteni

ʻI heʻeku kei tamasiʻí, naʻe ngāue ʻeku tangataʻeikí ʻi he feituʻu mamaʻo, pea faʻa foki mai maʻu pē ki ʻapi kuo poʻuli. Naʻá ku ʻāʻā pē kae ʻoua kuó ne foki mai ki ʻapi. Ka ʻi ha ʻaho ʻe taha naʻá ne fuʻu tōmui, pea naʻe ʻikai lava ke u maʻu ia ʻi he telefoní. Naʻá ku ilifia ʻaupito. Naʻá ku manatuʻi naʻe akoʻi au heʻeku ongomātuʻá ke u lotu maʻu pē pea kole tokoni ʻi he taimi ne u ilifia aí, ko ia ne u tūʻulutui peá u lotua ke foki lelei mai ʻeku tangataʻeikí ki ʻapi. Naʻá ku ʻohovale, ʻi he ʻosi ʻeku lotú, naʻá ku fanongo ki he pasikala ʻo ʻeku tamaí ʻi tuʻa. Naʻá ku houngaʻia ʻaupito ʻi heʻeku Tamai Hēvaní ʻi hono tokangaʻi ʻo ʻeku tamaí.

ʻI heʻeku hoko ko ha taha lahi kei talavoú, ko e taimi kotoa pē ʻoku ou puputuʻu pe ilifia aí, ko e fuofua tokotaha ʻoku haʻu ki hoku ʻatamaí ko e Tamai Hēvaní. ʻOku ou ʻilo ʻokú Ne nofo maʻu pē mo au pea ʻokú Ne fanongo mai ki heʻeku ngaahi lotú.

Lohani Kilisani ʻo Pengikaloa, ʻInitia

ʻĪmisi

A man kneeling by a chair or sofa in prayer.

ʻI ha pō ʻe taha naʻá ku hū ki he loki mohe ʻo ʻeku ongomātuʻá ke kole ha meʻa ki heʻeku tangataʻeikí, ka naʻá ne tūʻulutui ʻi he lotu, ko ia ne u mavahe leva pea foki mai ʻi ha ngaahi miniti siʻi mei ai ʻokú ne kei ʻi he tuʻunga tatau pē. Naʻá ku fakakaukau ke u teuteu ke mohe, ʻo fakakaukau ʻe ʻosi moʻoni ʻene lotú ʻi he ʻosi ʻeku teuteu ke mohé. Ne u foki ki he loki mohe ʻeku ongomātuʻá ʻi ha miniti ʻe 10 nai mei ai ʻokú ne kei lotu pē! Naʻe fakamālohia ʻeku fakamoʻoní ʻi heʻeku vakai ki he sīpinga ko iá mei heʻeku tangataʻeikí. Naʻá ne lilingi moʻoni hono lotó ʻi he lotu ki he Tamai Hēvaní.

Seni Haniseni ʻo ʻAitahō, USA

ʻOku ou fakamālō naʻe vahevahe mai ʻe heʻeku ongomātuʻá ʻa e talanoa ʻo ʻena feohi fakakaumeʻá kiate au. Naʻá na hoko ko ha kaungāmeʻa lelei ʻi hona taʻu 14, pea naʻá na tutupu hake mo ako fakataha. ʻI he ʻalu ʻa e taimí, naʻe fakatupulaki ʻena kaungāmeʻá ki he ʻofa moʻoni, pea naʻá na mali ai ʻi he temipalé. ʻOku ou palani ke muimui ʻi he sīpinga ʻa ʻeku ongomātuʻá ʻo e mali ʻi he temipalé pea ʻamanaki lelei te u aʻusia ʻa e fiefiá mo e ʻofa moʻoní ʻo hangē ko ia naʻá na maʻú.

Pasale ʻAna Malia ʻo Palahova, Lumēnia

Naʻe hoko maʻu pē ʻa Sīsū Kalaisi ko e tefito ʻo e vā fetuʻutaki ʻo ʻeku ongomātuʻá. Naʻá na tokanga taha ki hono faʻu ʻo ha ʻapi ʻa ia ne nofoʻia ʻe he Laumālié pea fokotuʻu ke fakamuʻomuʻa māʻolunga ʻa e ako folofola fakafāmilí, lotu fakafāmilí, mo e efiafi fakafāmili ʻi ʻapí.

Naʻe uiuiʻi ʻeku faʻeé ke faiako ʻaʻahi ki ha faʻē kei talavou ʻa ia naʻe faingataʻaʻia hili haʻane toki vete mali. Ne u faʻa foki mai ki ʻapi ʻoku toʻotama ʻeku faʻeé ʻi ha ongo kiʻi tamaiki tangata ʻa e fefiné ni. Ko e taimi ʻe niʻihi ne mau faʻa tuʻu ʻi he ʻapi ʻo e fefiné ni ʻi heʻemau fakakakato ha ngaahi meʻa, pea ʻe tuku ʻe heʻeku faʻeé ha kiʻi tohi ʻi he matapaá. ʻOku ou fakamālō ki he sīpinga ʻa ʻeku faʻeé ʻa ia ko e ʻofa faka-Kalaisí ʻoku “ʻikai kumi ʻene meʻa ʻaʻaná” (Molonai 7:45).

ʻOku ako mo fakaʻaongaʻi maʻu pē ʻe heʻeku ongomātuʻá ʻena ngaahi taukei mo e ʻilo foʻoú ke langa hake e puleʻanga ʻo e ʻOtuá. Koeʻuhí ko ʻena sīpingá, kuó u fakamuʻomuʻa e akó ʻi heʻeku moʻuí. Naʻe tataki au ʻe he sīpinga ʻa ʻeku ongomātuʻá ke u mali mo ha tangata ʻa ia naʻe fakatefito foki ʻene moʻuí ʻia Sīsū Kalaisi.

Lesieli Nileseni ʻo ʻIutā, USA

ʻĪmisi

Father and son working on a bicycle.

ʻOku lava ʻe heʻeku tamaí ʻo fakaleleiʻi ha faʻahinga meʻa pē. ʻI hoku taʻu hongofulu tupú, naʻá ku fehuʻi kiate ia pe ʻokú ne fakaleleiʻi fēfē ʻa e ngaahi meʻa kotoa pē. Naʻá ne pehē, “Kimuʻa peá u kamata ngāué, ʻoku ou fai ha lotu ʻo kole ki he Tamai Hēvaní ke tokoni mai. Hili iá pea kamata leva ʻeku ngāué.” Kuo akoʻi au ʻe heʻene sīpingá ke u loto-fakatōkilalo pea fekumi ki ha takiekina fakalangi.

ʻI he taimi kuo ongoʻi loto foʻi ai ʻeku fineʻeikí, naʻá ne fekumi ki he fakamoʻuí mo e melinó mei he Fakamoʻuí. ʻI heʻeku fehangahangai mo e ngaahi momeniti mo iá, kuó ne poupouʻi au ke fakaʻaongaʻi e mālohi ʻo e Fakaleleí. ʻI heʻeku hoko ko ha taha lahi kei talavoú, ʻoku ou hokohoko atu ke maʻu ʻa e melino mo e ʻofa fakapapau ʻa e Fakamoʻuí ʻaki e muimui ki heʻene sīpinga māʻoniʻoní.

ʻAisake Malama ʻo Sonikōpingi, Suēteni

ʻI heʻeku kei siʻí, naʻe fakatō ʻe heʻeku ongomātuʻá kiate au ʻa e ʻofa haohaoa ko ia mei heʻeku Tamai Hēvaní. Naʻe kamata ke u ʻiloʻi Ia ʻi he hivaʻi kiate au ʻe heʻeku fineʻeikí ʻa e “Fānau au ʻa e ʻOtuá” (Ngaahi Himí, fika 193), pea ʻalu pē taimí kuo hoko ʻa e ngaahi sīpinga ʻeku ongomātuʻá ko hoku takiekina fakalaumālie lahi taha ke ʻiloʻi mo ʻofa ki heʻeku Tamai ʻi Hēvaní ʻi he ngāue tokoní pea mo e faivelenga ʻi he ʻalu ki he ngaahi fakataha mo e ʻekitivitī ʻa e Siasí.

Mālini ʻOteka ʻo Vasikuesi ʻo Manākuā, Nikalākuā