Naʻá ku ʻIloʻi ʻa e Leʻo ʻo e Palōfitá

ʻĪmisi

Illustration of young adult woman in bed. There is a radio by her bed

ʻI ha pō Sāpate ʻe taha he māhina ʻe tolu nai hili ʻeku hiki mei hoku fonua tupuʻanga ko Mekisikoú ki he ʻIunaiteti Siteití ke u ʻalu ki he akó, ne u fetongitongi holo e ngaahi kautaha letioó ʻi he feinga ke maʻu ha ngaahi hiva faka-Sāpate lelei. ʻI heʻeku fanongo ki he ngaahi kautaha letiō fakalotofonua lahi, naʻá ku ongoʻi ha leʻo angamaheni peá u taʻofi ai.

Ne u mahamahalo ko e leʻo ia ʻo Palesiteni Kōtoni B. Hingikelī (1910−2008), ʻa ia ko e Palesiteni ʻo e Siasí ʻi he taimi ko iá. Ne u ʻiloʻi naʻe ngali kehe ia kiate au ke u lava ʻo fakafaikehekeheʻi hono leʻó. Ne u anga ʻaki e fanongo ki he konifelenisi lahí, ngaahi faeasaiti ʻa e Potungāue Ako ʻa e Siasí, mo e ngaahi fakamafola kehe ʻa e Siasí ʻo fakafou ʻi he leʻo ʻo ha taha fakatonulea lea faka-Sipeini ʻoku leʻo lahi ange ʻi he leʻo ʻo e tokotaha leá. Ka naʻá ku ʻiloʻi ko e leʻo ē ʻo Palesiteni Hingikelií ʻi he letioó.

Naʻe teʻeki ke lelei ʻeku lea faka-Pilitāniá ke mahino e meʻa naʻá ne lea ʻakí, ka naʻá ku fanongo pē ki he lea he letioó. Naʻe ʻomi ʻe hono leʻó ha ongo ʻo e nonga. ʻI he ʻosi ʻa e leá, naʻe pehē ʻe he tangata fakamafola leá, “Naʻa tau toki fanongo kia Palesiteni Kōtoni B. Hingikelī.”

Naʻá ku ʻiloʻi ʻoku folofola mai ʻa e ʻEikí ʻi Heʻene kau tamaioʻeikí pea ʻe tatau ai pē pe ʻoku haʻu ʻa e pōpoakí ʻi Hono leʻó pe ko ʻEne kau palōfitá, ʻoku tatau ai pē (vakai, T&F 1:38).

Naʻá ku fakakaukau ki heʻene makehe ʻeku fakatokangaʻi ʻa e leʻo ʻo Palesiteni Hingikelī. Kuo tokoni hono fai iá ke u fakatokangaʻi te u fie maʻu maʻu pē ke ʻiloʻi e leʻo ʻoku fakaʻaongaʻi ʻe he ʻEikí ke fetuʻutaki mo ʻEne fānaú—neongo pe ko e hā e foungá.

Naʻe pehē ʻe he Fakamoʻuí, “ʻOku fanongo ʻeku fanga sipí ki hoku leʻó, ʻo hangē ko ʻeku tala kiate kimoutolú: pea ʻoku ou ʻiloa ʻa kinautolu, pea ʻoku nau muimui ʻiate au” (Sione 10:27).

ʻI ha māmani ʻoku fonu ʻi he ngaahi leʻo kehekehé—ngaahi “kautaha letiō”—ke fili aí, ʻoku ou ʻamanaki te u lava maʻu pē ʻo tokanga ke ʻiloʻi e leʻo ʻo hoku Tauhí mo ʻEne kau tamaioʻeikí pea loto fiemālie ke muimui ki heʻenau faleʻí.