Ko e Sū Fakasilesitiale ʻo Hoku Hoá
Michael Reid, ʻAlesona, USA
ʻI he ngaahi taʻu kuo hilí, hili ʻeku mavahe mei he Senitā Akoʻanga Fakafaifekau ʻi Polovó, naʻá ku aʻu atu ki Folōlita mo e ongoʻi mateuteu mo loto vēkeveke ke kamata ʻi he malaʻe ngāue fakafaifekaú. ʻI heʻeku feʻiloaki mo hoku hoa foʻoú, naʻe ʻi ai ha ngaahi meʻa ne ma manako tatau ai pea naʻe hangē ne haohaoa ʻaupito homa hoá.
Ka neongo ia, hili ha ngaahi uike siʻi, ne u fakatokangaʻi ha ngaahi faikehekehe. Hangē ko ʻení, ne u mateuteu ke ma ō ʻo tukituki ʻi he ʻaho kotoa pē, ka naʻe ʻikai ke fuʻu vēkeveke ʻa hoku hoá ki he tukituki ʻi he ngaahi matapaá. Ko hono moʻoní, neongo ko ia naʻe hoa takí, ka naʻá ne fili ke ʻoua ʻe fai ha meʻa lahi.
Naʻá ku fakatokangaʻi foki naʻe hangē ʻoku talanoa lahi ʻaupito hoku hoá fekauʻaki mo ia. Naʻe tuʻu lelei fakapaʻanga hono fāmilí, pea kuó ne aʻusia ha ngaahi meʻa lahi naʻe ʻikai te u maʻu ko ʻeku haʻu mei he tūkunga māʻulalo angé.
Naʻe kamata ke fakatupulaki ʻe he ngaahi meʻá ni ha ngaahi ongo taʻe fiemālie ʻi hoku lotó, naʻe meimei aʻu ki he tuʻunga ʻo e tāufehiʻá. Naʻe uesia fakalaumālie au ʻi hono tukulotoʻi e ongoʻi tāufehiʻa ki hoku hoá, tautautefito lolotonga haʻaku feinga ke akoʻi e ongoongoleleí. Naʻe pau ke u fai ha meʻa. Naʻá ku ʻuluaki fakakaukau ke talanoa ki hoku hoá pea fakahaaʻi ange ʻeku loto-foʻí. Ka naʻá ku fili ha founga kehe.
ʻI he pongipongi takitaha naʻá ku fetongitongi mo hoku hoá ʻi he kaukau mo teuteu ki he ʻahó. Lolotonga ʻene kaukaú, ne u fakakaukau ke u tolotolo ki hono mohengá pea fakangingila hono suú. Hili hono fakamaʻa mo fakangingila vave iá, te u tuku fakalelei ʻa hono suú ki he meʻa naʻe tuku aí. Naʻá ku fai ʻeni ʻi he pongipongi kotoa pē ʻi ha uike nai ʻe ua.
Lolotonga e taimi ko ʻení ne u fakatokangaʻi ʻoku kamata ke mole ʻa ʻeku tāufehiʻá. ʻI heʻeku ngāue tokoni ki hoku hoá, naʻe kamata ke liliu hoku lotó. Ne ʻikai ke u lea kiate ia fekauʻaki mo ʻeku kiʻi ngāue tokoní. Ka neongo ia, ʻi ha ʻaho ʻe taha, naʻe pehē ʻe hoku hoá kuo pau ne tāpuekina ia ʻaki e “sū fakasilesitialé” koeʻuhí naʻe teʻeki ai pē ke ʻuli ia.
Naʻá ku ako ha lēsoni maʻongoʻonga ʻe ua mei he aʻusia ko ʻení. ʻUluakí, naʻá ku ako ko e palopalema moʻoní naʻe ʻi hoku lotó pē ia—neongo naʻe haʻu mei tuʻa ʻa e tupuʻanga ʻo e ngaahi ongo ne u maʻú. Naʻe sai pē hoku hoá.
Uá, naʻá ku ʻiloʻi ʻoku tau tokoniʻi kinautolu ʻoku tau ʻofa aí. Ka naʻe ʻikai ke u ʻiloʻi ʻoku ngāue ʻa e tefitoʻi moʻoni tatau pē ʻi he tafaʻaki ʻe taha: ʻoku fakaʻau ke tau ʻofa ʻiate kinautolu ʻoku tau tokoniʻí.