O Le Pogai Moni Lava ua Ou Manao ai e Alu i se Misiona

I ni nai tausaga ua mavae, na auai Lorraine Samaseia i se misiona faataitai mo le Siteki a Melepone Wyndham o Le Ekalesia a Iesu Keriso o le Au Paia o Aso e Gata Ai i Melepone, Ausetalia. O le taimi lea sa 13 ona tausaga, o se tausaga e laitiiti ai i tausaga fuafuaina o le vaega mo le gaoioiga, ae na tuuina mai e le peresitene o le misiona o le eria ia te ia se faatagaga faapitoa ia auai.

“Sa fai si taufaafefe muamua, ona sa leai nisi tamaitai talavou o lo’u tupulaga na faatasi ma a’u,” na ia manatua. Sa popole foi Lorraine i le talanoa atu i tagata ese ao talai faataitai o ia. “Sa ou faalogo i le ala na oo ai nisi o faifeautalai i ni tulaga leaga ao agai atu i fale po o tagata i le auala . . . sa le mafai ona taofia ae na ou mafaufau pe o le a tupu lena mea ia i matou.”

Ae na musu o ia e manumalo le fefe. Na ia iloa o le a puipuia o ia ma ana soa e le Alii i le gaoioiga e 3-aso atoa lava.

O le auauna atu i se misiona faataitai na iu i se tulaga e maoae lava le olioli. “O le tele o tagata na matou feiloai i ai ao tuitui i faitotoa na faauo ma faaaloalo . . . e tusa lava pe latou te le fiafia [i la matou savali], sa latou fesili mai pea ni fesili e uiga ia i matou, e pei ‘O fea tou te o mai ai?’ ma, ‘Aisea tou te o ai i misiona ao laiti tele?’ Sa matou faia ni talanoaga sili.”

Sa faafetai foi Lorraine mo ana soa, o ni tamaitai faifeautalai faaēamisiona ma se faifeautalai ua foi mai le misiona (FF). “Na latou tuuina mai ia te au ni nai faataitaiga mo le tuitui i faitotoa ma le aoaoina atu o lesona, ia na fesoasoani ia te au e maua ai le mautinoa mo lau lava misiona moni.”

O le mea moni, sa ia moe miti i le alu atu i se misiona talai a ia lava talu mai le taimi na i ai i le Peraimeri. O lona aafiaga i le misiona faataitai na ona faamalosia ai lana molimau ia Iesu Keriso ma lona manao e faasoa atu Lana talalelei i isi. Talu mai lena taimi, o Lorraine—lea ua 17 nei tausaga—sa galue malosi i le saunia e auina atu ona pepa faamaonia o le misiona i le taimi lava e mafai ai ona alu o ia i le itiiti ifo ma le lua tausaga.

“Ua ou fiafia lava!” ua ia fai mai ai. “Ou te fiafia e o faatasi ma tamaitai faifeautalai, i soo se taimi ou te mafaia, e talai, aoao tagata sailiili ma asiasi i tagata lē toaaga o le Ekalesia.

“O le mea e tasi ua ou aoao ao saunia o le matuai suesue lava i tusitusiga paia i le loloto, ia mautinoa ua ou malamalama i aoaoga ma mataupu faavae [o i ai], ae maise lava i le Tusi a Mamona, ina ia mafai ona ou fesoasoani i isi foi ia malamalama.”

E ui lava na iloa e Lorraine mo ni tausaga e manao e auauna atu i se misiona, faatoa ia iloaina lelei talu ai nei le pogai mo lenei manao.

“Ao faasolo ina ou matua, auai i le polokalama a le autalavou ma na aoaoina atili i le taua o le galuega [faafaifeautalai], ua iu ina ou iloaina le pogai ou te fia alu ai,” ua ia fai mai ai.

“Ou te alofa i lou aiga ma ou te manao ia faatasi ma i latou i le isi olaga. Ou te iloa e tele tagata e mananao foi i lena mea.

“Ua ou iloa [nei] o lou faamoemoega o le faasoa atu o le talalelei i aiga . . . ina ia mafai ona faamauina faatasi i latou. Ou te fia fesoasoani i le tele o tagata ou te mafaia ina ia faatasi ma o latou aiga e faavavau.”