Fanaua e ni Matua Lelei

I lesona uma na aoaoina ai au e ou matua i lou olaga atoa, o le la faataitaiga na sili ona aoaoina ai au.

O lou tina, o Linda Obeketang, o se tamaitai malosi tele ma atamai ma na te taitaia lo matou aiga i le amiotonu.

Mo le tele o tausaga, na faamautinoa e lou tina ua faapotopoto lo matou aiga i taeao uma ma po uma mo tatalo faaleaiga. O le auai i lenei faigalotu i le Atua i aso taitasi ua aoaoina au e liliu atu ia te Ia i mea uma, ona o mea matou te faia i taimi uma. Ua aoaoina ai au e faalogo mai o Ia ma e alofa o Ia ia te au. O a matou tatalo i aso taitasi e valaaulia le Agaga i totonu o lo matou aiga ma fesoasoani ia i matou ia maua se aso lelei.

Faafetai i le tumau ma le faatuatua o lou tina, o le tatalo e le o se mea ou te manaomia ona faamanatuina ia te au lava ia faia, o se mausa amiotonu o le a ou tauaveina atu i lou olaga faatagata matua ma ou te faafetai tele ia te ia mo lena mea.

O le pese o le Peraimeri, ‘Tatalo a le Tamaitiiti’ e oo mai i le mafaufau pe a ou manatua lou tina.

‘Le Tama o e i ai iina. Pe o e lagona mai tatalo’.

O se aoaoga faavae faigofie lenei ou te iloa e moni. Na aoaoina foi i matou e lou tina e uiga i le tatalo i ana upu, ae o ana faatinoga na mafai ai ona pipii lesona i le mafaufau.

O lo’u tama, o Hirobo Obeketang, e masani lava ona fiafia i auaunaga. Soo se mea lava e alu i ai e vaavaai lava o ia mo tagata e manaomia le fesoasoani ma e aapa vave atu lava ia i latou.

I lona aso fanau i le tausaga ua mavae, na ia filifili ai e tuuina atu ni meaalofa nai lo le mauaina mai. Na ia filifili e tuuina atu ni meaalofa i nisi o alii e leai ni fale ae nonofo i le auala. O lena po na matou o ai i se faleaiga mo le ’aiga o le afiafi. Ina ua uma ona aai i le faleaiga, na ia vaaia ni alii matutua se toalua o loo aai foi iina ma na alu atu faalilolilo ma totogi le la meaai. Ou te vaai lava ia te ia o fai lenei ituaiga o mea i taimi uma lava.

I le avea ai ma se tagata e matamuli ma tauivi e talanoa atu i tagata ese, o le faataitaiga a lo’u tama na faaali mai ai ia te au e ia lava le tele o le olioli i le auauna atu ma le lē manatu faapito. O le nā ona ta’u atu ia auauna atu o le a lē lava lena mo se tagata matamuli e pei o au; na ou manaomia le faaalia mai e ala i le faataitaiga ma le aafiaga ma o le mea lena na faia e Tama.

O le viiga, ‘Ua ou faia ea se lelei i le aso.?’ ou te mafaufau ai i lo’u tama, aemaise lava le laina mulimuli,

‘Ia ala mai ma fai se lelei nai lo le manao i manuia, o se fiafiaga, se faamanuiaga, . . .’

E le o toaga lou tama i le Ekalesia i le taimi nei, ae o taimi uma lava na te foai atu ai ma le lē manatu faapito, ou te vaaia lava o ia ua fiafia. Ou te iloa ua ia lagonaina le Agaga; e mafai ona ou iloa i ona foliga. Ou te vaaia le alofa tele o ia mo tagata o siomia o ia ma ou te iloa o le alofa lena, ma o le agaga na te lagonaina pe a ia auauna atu, o le a iu lava ina toe taitai atu ai o ia i le talalelei.

Pe a tatou mulimuli i le faataitaiga a le Faaola ma faia e pei ona Ia faia, o le a sili atu ona mafai ai e le Agaga ona molimau ia i tatou i le moni o lena mea. Ou te faafetai i se tina ma se tama alofa na aoaoina au e tatalo ma auauna atu e ala iā laua faataitaiga.