Ua Vali le Faleaoga ma Faamamā le Matafaga e le Au Lotu i Amerika Samoa

O le uarota a Tafuna 2, o se au lotu o Le Ekalesia a Iesu Keriso o le Au Paia o Aso e Gata Ai, na galulue faatasi talu ai nei i Aso Toonai sosoo e lua e tuuina atu le auaunaga i lo latou nuu.

O le auaunaga fou o se vaega a se eria atoa na ta’ua o le “O Mai ma Fesoasoani”, o se taumafaiga e auauna atu i le nuu ma valaaulia ai isi ia auai i lena auaunaga.

I le Aso Toonai 25 o Ianuari, na o atu ai le au lotu a Tafuna i le Maliu Mai, o se eria o le matafaga lautele, ma moa le vao, sasa le vao, salu ma vali ina ia faaleleia le nofoaga. O tagata na galulue ma ofo fua atu la latou auaunaga o vaitausaga uma lava, e aofia ai tamaiti laiti, ia na auai i lenei galuega.

O le Aso Toonai na sosoo ai, na faapotopoto ai lenei lava au lotu i le Aoga Maualuga a Tafuna ma fesoasoani e vali le faleaoga. O le taimi lea, na toatele lava i le autalavou, mai le 12 i le 18 tausaga, na saunia lenei auaunaga.

Sa o se aafiaga e aoao ai foi ma aogā mo le autalavou. O Juni Jayson, o se talavou ofo fua, na faapea mai, “ou te iloa pe a oo ina ou matua, e mafai ona ou lelei atili i le vali ma e mafai ona ou valiina lou lava fale.”

Na fiafia tele le pule aoga o le lotoifale i le galuega na faia e le autalavou. Na ia faailoa atu lona agaga faafetai ma faamanuia atu ia i latou mo se galuega na lelei ona faia.

O Bishop Talataina Suifili le taitai na vaaia le faatulagaina o na galuega faatino e lua.