Po o Le A Lava Le Mea e Moomia Ai

O le tele o lo’u fiafia faatamaitiiti e mafai ona ave le faamalo i le faatosinaga lelei a lo’u tina onosai ma lotoalofa. Fai mai [o ia] sa i ai so’u uiga e ese le “finafinau.” Atonu na ia sipelaina o le L.O.T.O.M.A.L.O.S.I. I le avea ai o ni matua, atonu o nisi taimi tatou te fesili ai pe o i ai se aafiaga o a tatou fanau ia tatou faatosinaga? Sa ou ola a’e i le Ekalesia ma sa ou auai i ana polokalama uma. Sa ou maua le Perisitua Arona ma le Mekisateko¹ i vaitausaga talafeagai ma sa ou maua lo’u faamanuiaga faapeteriaka ae ou te lei auauna atu i le misiona. O le taimi o la’u auaunaga faafaifeautalai na tauaofa’i ai tosinaga taiala uma i lo’u olaga i se fagua o Io’u atamai i le tiute i le Atua². Sa ou sagisagi e ulu atu i le galuega faamisiona, ae o le mea moni faigofie o le, e utiuti lo’u poto masani e aoao atu ai le talalelei, lea foi na faaalia ai le loloto tauamata o lo’u iloa ma le malamalama i le talalelei.

O le iloaina o o’u vaivaiga, sa amata ai ona ou faitau i avanoa uma ma faatumuina lo’u aso i suesuega ma le manatunatu loloto. Sa ou mafaufau ma le agaga tatalo i mea sa ou faitauina, ma sa sili ona faamalamalamaina ma iloa atili ai. O le vaitau lea sa amata ai ona ou tuputupu a’e i le Alii³. Na amata ai ona maua’a i lo’u loto le lotofaafetai i lo’u Faaola ma sa mafai ai ona ou vaai i le mea na faamalamalama mai e le Tupu o Peniamina faapea o le silisiliese o le Atua ma lo’u faatauvaa⁴. Sa amata ai ona ou manatua mea uma na aoao ai a’u e lo’u tina⁵. E ui ina sa ou toaga i le lotu i tausaga uma o lo’u talavou, ae sa ou lagonaina se suiga tele i lo’u loto⁶ ma e ala i le faaatoatoaga a le Togiola a Iesu Keriso sa ou toefanauina ai⁷.

E mafai e i tatou taitoatasi ona iloa le mamalu o le Atua⁸ ma o’o i lenei suiga tele o le loto⁹. E oo foi i lenei manatu fou, ua faamanatu mai ai ia i tatou le faamatalaga a le Tupu o Peniamina, o i tatou lava o “tagata faatauvaa.”¹⁰ E peiseai e fai si ogaoga o lea faaupuga, ae o se atavali o lo tatou tamameamea faaleagaga ma o se faamanatu foi o lo tatou faalagolago i lo tatou Faaola o Iesu Keriso o lē malosi e faaola¹¹. O a tatou talosaga faifai pea, ma le lototatalo ma le faalagolago i le Togiola a le Faaola, o le ki lea ia maua ai pea e le aunoa Lona agaga e faatasi ma i tatou¹². O le saili atu i le atoatoaga o se faagasologa e manaomia ai le suiga lea e oo mai lava i le taimi tatau. E le mafai ona tatou tumau i le vailepa faaleagaga pe a tatou saili faamaoni i ai i le atoatoa¹³ e ala i le mana gafatia o le Togiola a Iesu Keriso.

E tulaga ese le tuuina o faifeautalai faamisiona i se siosiomaga e onomea i le Agaga. O lea vaitau toto’a o le auauna atu e mafai ona avea o se auala mo le tuputupu a’e lautele faaleagaga ma avea ai o se faamanuiaga tele i o latou olaga ma i latou e auauna atu i ai. Ua tatou molimauina uma ia eseesega o lo tatou tuuvaa ese atu, ona toe taliu mai lea o atalii ma afafine ua mauaina, ma ua faaalia nei se savali ma se talanoa faaleatua¹⁴. Peitai, o le toatele o i tatou e ola i fafo atu o le matafaioi faaleagaga o se misiona. O la tatou faatulagaga o mea e fai o tiutetauave taua e pisi ai, e mafai ona se’e ese faafuasei ai la tatou taulaiga mai le mea e taua, i le mea e le taua. Na saunoa mai Peresitene Nelson “A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, Ana upumoni”.¹⁵

I le avea ai o tagata taitoatasi ma aiga, e ao ona tatou taumafai e fai o tatou fale ma ni malutaga faaleagaga. O le faia o lena mea, o le a faaitiitia ai tosinaga a le fili i o tatou olaga¹⁶. O le toemamanuina o o tatou fale e avea o se nofoaga tutotonu o le aoaoina o le talalelei¹⁷, o le a faatumauina lelei ai i tatou i luga o le ala o feagaiga. O le tamoe i autafa o le ala i le mamao e au i ai le lima, e ono aumaia ai se lagona sese o lo tatou tulaga faaleagaga ma faafitia ai e i tatou lava le mana o le faale-atua, ua faaalia e ala i le auai i le faatinoga o sauniga o le perisitua ma le malumalu¹⁸. O le tautalatala, olioli, ma le tala’i atu o Keriso¹⁹ i o tatou fale e ala i le mataupu aoaoina o le “Sau, Mulimuli Mai ia te Au, o le a faamalolosia ai musele o lo tatou faatuatua²⁰ ma o le a tosina ai a tatou faaiuga i aso taitasi, a o tatou taumafai e faateleina lo tatou gafatia faaleagaga ia maua faaaliga²¹. A o tatou faatautaia le fana’e o le matautia o le olaga, e mafai ona tatou maua le faamautinoaga i le folafolaga a le Faaola, Ou te le tuua outou o matuaoti; Ou te sau ia te outou²².”

O le tatalo o le faamanatuga o loo aofia ai se olega i le Atua, ina ia tatou maua pea Lona agaga e faatasi ma i tatou²³ ma e leai se taimi ua sili atu ai ona taua le iloa o le ala e fetalai mai ai le Agaga nai lo le taimi nei lava”²⁴. Ia taitasi i tatou ma malolo, tomanatu ma faia fetuunaiga e tatau ai i o tatou olaga ina ia mafai ai e le Agaga Paia ona mau faatasi ma i tatou ma afio ai i totonu ia i tatou. Ina tatou faia ia po o le a lava le mea e mafai ai e le Agaga Paia ona taiala, faamafanafana ma aoao i tatou i le siosiomaga o le fale ua tatou taumafai e fatuina mo Ia.