Faamanuiaina i Talaatu o A’u Miti

A o ou laitiiti i atumotu o Samoa, sa fai mai sa’u uo e faapea, o tagata o Le Ekalesia a Iesu Keriso o le Au Paia o Aso e Gata Ai—matou te iloa i latou ‘o Mamona’—sa tapuai ia Iosefa Samita. Sa ou talitonu i ai.

O se tasi o o’u faiaoga i le aoga tulagalua o, Viena Tanuvasa, o se tagata o le ekalesia a Iosefa Samita. O nisi taimi ou te tafao ai pe tasi pe lua foi aso i le aiga o Sister Tanuvasa. O iina na ou faalogo ai i la’u uluai viiga mai le latou lotu: “A tumu le aso i faigata, aua le faavaivai.”

O loo fai pea ma viiga ou te fiafia i ai.

E tele taimi sa valaaulia ai e Sister Tanuvasa a’u ma te o i lana lotu, ae ou te musu ona o lo’u ava i lo’u lava aiga, o ni tagata malolosi o se isi faapotopotoga Kerisiano i lo matou nuu.

Mulimuli ane, sa ou nofo i lo matou aiga lautele i Aukilani i, Niu Sila. O lo matou fale i le pitonuu o Otara e mamao ese mai le falesa o la matou faapotopotoga, o lea sa ou le alu soo ai i le lotu.

I se tasi aso, sa ma o ai ma sa’u uo e momoli se afifi i se faifeautalai. Sa ou iloa ai o ia o se faifeautalai mai le lotu lava lea e pei o Sister Tanuvasa. Sa sau i fafo le soa a le faifeautalai lea i le taavale. Sa ia faailoa mai lona igoa ma aumai ia te au se kopi o le Tusi a Mamona. Sa ia fai mai e tatau ona ou faitauina aua o le a fesoasoani ou te aoao atili ai e uiga ia Iesu Keriso. Sa ia fai mai foi e tatau ona ou tatalo ma fesili atu i le Tama Faalelagi pe moni lenei tusi.

Ou te le i faitauina.

Peitai, e lua vaiaso mulimuli ane, sa tuitui mai ai faifeautalai i lo’u faitotoa ma sa iu ina ou taliaina. Sa ou iloaina o le a le faatagaina e lo matou aiga ni faifeautalai i lo matou fale, o lea sa ou talosagaina ai pe mafai ona matou feiloai i se tasi o o latou falesa. Sa la malilie ma e lei pine, faatasi ai ma le fesoasoani a ni uso o le aualofa mai le latou uarota, sa la aoaoina ai au i le talalelei a Iesu Keriso.

E ese le manaia, ma sa ou manao ia ou iloa atili. Sa ou asiasi i le latou uarota ma sa valaaulia au i a latou Afiafi Faaleaiga, ma sa ou lagonaina le fiafia i mea uma sa ou aoaoina . . . vagana ai le mea e tasi.

Sa ou toe mafaufau i o’u uluai taimi i Samoa, i mea sa ala ai ona ou taufaalili i nisi taimi i a’u uo Mamona. Sa ou iloa e faapea a o lei faaauauina pea ona matou feiloai ma faifeautalai, e tatau ona ou aoaoina le mea moni e uiga ia Iosefa Samita.

Sa ou iloaina le mea sa ou moomia i le amataga o le Tusi a Mamona. A o ou faitauina le tala i le Uluai Faaaliga a Iosefa Samita—i lana tatalo i le vao ma le asiasiga faavavega mai le Tama Faalelagi ma Iesu Keriso—sa ou iloaina i lo’u loto o mea uma lava o loo tusia ai e moni. Sa lei tapuai lana ekalesia ia Iosefa Samita, ae o ia moni o se perofeta a le Atua.

Sa tonu ai ia te au i lena taimi ua ou manao e papatiso.

O la’u molimau ia Iosefa Samita na faamalosia ai pea lava a’u i le tele o tausaga.

Sa faaosoosoina au i se tasi taimi ou te alu ese mai la’u uarota ona sa ou le lagonaina le taliaina o a’u e ni uso patino o le Aualofa. O le manatuaina o Iosefa Samita sa ia tuu atu i taimi uma ona tofotofoga i le Alii, o lea sa ou mulimuli ai i lana faataitaiga ma sa ou tatalo ma le loto atoa i le Tama Faalelagi e uiga i a’u faafitauli i le lotu. Sa faamanuiaina au i se lagona fou o le mautinoa ma le faamautinoaga o le a fesoasoani le ma sootaga ma le Atua ou te manumalo ai i soo se faalavefau.

O le iloa ai sa taliaina e Iosefa Samita le tele naua o tiutetauave i se tulaga talavou tele, sa fesoasoani lea ia te au e talia ai valaauga i la’u uarota, e ui ina sa ou lagonaina lo’u le saunia. Afai sa mafai e le Tama Faalelagi ona faamalosi ia Iosefa talavou, e mafai foi ona ia faamalosi ia te au.

Sa ou ma’i talu ai nei ma sa ou talosagaina se faamanuiaga faaleperisitua. E lei pine ona uma le faamanuiaga, ae o matou iloa o le a ou le manaomia se taotoga. O lea aafiaga na faamanatu mai ai ia te au sa iloa e le aunoa e Iosefa Samita o le a puipuia o ia e lona Tama Faalelagi.

E tumu au i le lotofaafetai ua ou auai i Le Ekalesia a Iesu Keriso o le Au Paia o Aso e Gata Ai ma mo le perofeta o Iosefa Samita. Ua ala mai i lona faatuatua ma le tele o ana osigataulaga na toefuatai mai ai le talalelei a Iesu Keriso, ua faamanuiaina ai lo’u aiga ma a’u i talaatu o mea sa ou moemiti i ai.