Alofa mo Toga

Ina ua toe taliu mai Viliami Nofomuli Nyssen Tonga mai lana misiona i le 2014, sa ia maua se lagona lofituina ua ausia le faamoemoe. Ua faatoa maea ona auauna atu mo le lua tausaga i le Misiona i Karolaina Saute Kolumipia i le Iunaite Setete, lea e tu i le isi afa o le lalolagi le mamao mai lona atunuu o Toga i le atu Pasefika.

O le auauna atu i se misiona mo le taimi atoa mo Le Ekalesia a Iesu Keriso o le Au Paia o Aso e Gata Ai, na te manatua ma le loto faamemelo, “o se aafiaga sa suia ai lo’u olaga.” Peitai sa lei iloa e Viliami sa na o se amataga lea o le ‘suiga tele o le loto’ sa teuina e le Tama Faalelagi mo ia.

E lei pine ona ia taunuu i le fale, sa amata ona faigaluega Viliami i se fale pizza i lo latou nuu. Sa ia faia pizza o sana galuega muamua ma o le galuega lea sa ia matuai fiafia lava i ai.

Faapei o le tele o talavou matutua i motu, sa mafaufau Viliami faapea o le isi laasaga mo ia o le masii atu i se atunuu e tele atu – pe atonu o le toe foi i Amerika—e sue ai se olaga sili atu ona manuia. O le faigaluega ai i le fale fai pizza o le a fesoasoani ia te ia e sefe mo le faamoemoega tele.

Ona, tulai mai lea o faigata, i le mavae ai o le fa masina talu ona foi mai, sa maliu le tina pele o Viliami. Sa tauivi o ia ma mafatiaga o le ma’i suka ma sa ia tuua ai le fanau e toafitu, e toafa o loo aooga pea.

Sa matua mafatia Viliami. A o tauivi ai o ia ma ona faanoanoaga, sa ia mafaufau foi i nai ona tei laiti ma sa ia iloa ai o lana miti e masii i fafo ua tatau ona toe suia.

Sa faatu e Viliami ni sini fou. O le a nofo o ia i Toga ma ia tauaveina tiutetauave o lona tina i le aiga. O le a ia sailia foi ni alagatupe faaopoopo ina ia mafai ai ona ia saunia lelei mea mo lona aiga ma atiina a’e ai lona lava ola tutoatasi.

Sa tonu foi ia Viliami ua manao e tatala sana ia lava fale pizza i le isi tausaga.

Ma sa ia faia lava.

Ia Me 2015, sa ia tatalaina le “Ofa ki Tonga”, o lana fale pizza fou i le taulaga o Toga o Nuku’alofa. Ofa o le upu faaToga mo le alofa. O le igoa foi lea o le tina o Viliami.

I le toe tomanatu ai i lona soifuaga, e maofa Viliami i lana malaga. “Afai sa e iloaina au ae ou te lei alu i le misiona, o le a e matua ofo pe a e vaai i le mea ua ou i ai nei.

“I na aso, sa leai so’u lagona moni o se taitaiga. Ou te lei mafaufau lava i le lumanai. E lei uma la’u aoga maualuga, ma sa iai ni tagata e lei mafaufau e mafai ona uma la’u misiona. Ou te lei mautinoaina foi,” sa soisoi o ia.

“Ae o le auauna atu i le misiona na faasino mai ai ia te au se lalolagi ese, se ituaiga olaga e ese. Sa fesoasoani ai ia te au ia ou manao i nisi mea mo lo’u olaga. Sa aoaoina ai au i mea e mafai e tagata ona ausia pe afai latou te galulue malosi i ai.

“Na faamautuina ai foi la’u molimau ia Iesu Keriso.”

O se mau sa faamalosia ai Viliami i aso faigata ina ua mavae le maliu o lona tina, e maua i le Mataupu Faavae ma Feagaiga, Vaega 82:10. “O A’u, o Alii, e noatia au pe a outou faia mea Ou te fai atu ai; ae a outou le faia mea Ou te fai atu ai, e leai se folafolaga mo outou.”

Sa o se faamautinoaga faifai pea e faapea, e mafai ona ia ausia ana sini amiotonu uma pe afai e tumau lona usitai i poloaiga a le Tama Faalelagi . . . ma e moni lava, ua matuai faamanuiaina tele ai o ia e le Alii.

O tupe maua mai lana pisinisi fou, sa mafai ai e Viliami ona lagolagoina ona tei a o faamaeaina a latou aoga ma faatau ai le fanua ua fauina ai se fale fou mo lona aiga. Sa ia toe fesootai foi ma sana uo sa ia iloaina talu mai le 2015, ma sa ia iloa ai o lana manamea lea mo le olaga. Sa faamauina i la’ua ma Lupe mo le olaga nei ma le faavavau atoa i le Malumalu o Nuku’alofa Toga i le faaiuga o le 2019.

“Tou te silafia, a na mafai ona ou toe foi ma talanoa i lo’u lava talavou, semanu ou te faapea atu i ai, ‘Ea i luga lou ulu. Moemiti atili. Aua le fefe.’”

O Viliami o se molimau ola e faapea afai tatou te faia le mea aupito sili tatou te mafaia, o le a faia e le Tama Faalelagi isi mea o totoe.