Ua Sami e le Au Paia I Toga le Aso Fanau Lona 150 o le Faalapotopotoga a Tamaitai Talavou

Sa faailoga e tagata o Le Ekalesia a Iesu Keriso o le Au Paia o Aso e Gata Ai i Toga le aso fanau lona 150 o le faatuina o le faalapotopotoga a Tamaitai Talavou i le faaiuga o Me 2020.

O se tasi o tamaitai talavou ua fiafia e uiga i le aso faamanatu, o Vinolia Piulisi Langi. O ia o se taitai o tamaiti aoga i le Aoga Maualuga a Liahona.

Fai mai lona fesoasoani i le aoga maualuga, o Vika Niupalau Kivalu, o Vinolia “e taitai e ala i ana faataitaiga i lona faamuamua o le talalelei i lona olaga, i lona mulimuli ma ola i tulaga faatauaina o Tamaitai Talavou.”

Ina ua 10 tausaga o Vinolia, sa maliu lona tama i se ma’i fatu.

Fai mai Kivalu, na faamatala e Vinolia le maliu o lona tama o “se tasi o aafiaga e sili ona ogaoga i lona olaga.”

“O se mea lea na suia ai lona olaga, aua sa ia aoao vave ai i lona olaga e liliu atu i le Alii mo se faamafanafanaga, taitaiga, ma le filemu.”

E fiafia Vinolia i le polokalama a le Ekalesia mo Tamaitai Talavou. Fai mai a ia, e aoao ai o ia e auauna atu i isi, aemaise i latou e manaomia le fesoasoani.

O le a faauu ia Vinolia i le faaiuga o le tausaga nei mai le Aoga Maualuga a Liahona, ma ua faamoemoe e suesue i le Iunivesite a Polika Iaga-Hawaii mo se tausaga a o lei faamisiona mo le 18 masina.

A maea lana misiona ua fuafua o ia e faalautele ana suesuega, aemaise i le galuega faafomai, ina ia mafai ai ona toe taliu mai i Toga e fesoasoani i ona tagata. Ua faamoemoe o ia i ai se aso e faaipoipo ai i le malumalu ma faamoemoe ai mo se “lumanai susulu mo ia lava ma lona aiga i le lumanai.”