ʻOku Malava Nai ke Langa ʻa Saione he ʻAhó ni?

ʻĪmisi

kau faifekau mo ha falukunga kakai ʻi he lotú

Ngaahi taá ʻi he angalelei ʻa e ongo faʻu tohí

ʻOku tau ako mei he kakai naʻa nau fokotuʻu e kolo ko ʻĪnoké pea mo e kau Nīfaí hili e ʻaʻahi ange ʻa Kalaisí, ki he tukui kolo ne nau feʻofaʻaki mo fetauhiʻaki ʻi ha founga fakaʻofoʻofa mo māʻoniʻoni. ʻI heʻema hoko ko ha ongomeʻa malí, kuó ma faʻa fifili, ʻe malava nai ke ʻi ai ha kolo pehē he ʻahó ni?

ʻI he ngaahi taʻu siʻi kuohilí, kuo tāpuekina ʻaki kimaua ha ngaahi faingamālie ke feohi mo ha kau kumi hūfanga tokolahi ʻi ʻAfilika kuo nau hiki ki Sipoukeini, Uāsingatoni, USA. ʻI heʻema langa ha ngaahi vā fetuʻutaki mo e niʻihi fakafoʻituitui mo e ngaahi fāmili fakaʻofoʻofa ko ʻení, kuó ma maʻu ai ha ʻofa mo e angaʻofa lahi. ʻOkú ma fiefia ke mou fanongo ki ha niʻihi ʻo ʻenau ngaahi talanoá (vakai, peesi 8). Kuó ma ako ha meʻa lahi mei heʻenau tui mo e ʻofa ki hotau Fakamoʻui ko Sīsū Kalaisí. Kuo fakakoloaʻi lahi ʻe heʻenau ngaahi aʻusiá, tukufakaholó, mo ʻenau vilitaki ke muimui kiate Iá ʻa ʻema moʻuí pea kuo nau fakamālohia homa fāmili fakauōtí mo e tukui koló kotoa.

Kuo hoko homa ngaahi kaungāmeʻa ʻAfiliká ko ha faʻifaʻitakiʻanga maʻongoʻonga ʻo e tuʻunga fakaākongá. Hangē ko hono akoʻi kitautolu ʻe ʻEletā Teili G. Lenilani ʻi he makasini ko ʻení, naʻe ʻikai ngata pē ʻi hono kole ʻe Sīsū ki Heʻene kau ākonga ʻi he Fuakava Foʻoú ke nau muimui ʻiate Iá ka naʻá Ne fakaafeʻi foki e kau ākonga kotoa he kahaʻú, kau ai kitautolu takitaha, ke muimui kiate Ia. ʻI heʻetau hoko ko e kau ākongá “ʻoku fiemaʻu ke tau fakafenāpasi moʻoni hotau lotó mo e finangalo ʻo ʻetau Tamai ʻi Hēvaní” (vakai, peesi 4). ʻI heʻetau fai iá, te tau lava ai ʻo ako ke ʻofa ʻo hangē ko ʻEne ʻofá mo tokoni ʻo hangē ko ia ʻokú Ne finangalo ke tau tokoní.

ʻIo, ʻoku malava ke fokotuʻu ha kolo ʻo ha kakai ʻoku nau feʻofaʻaki mo fetauhiʻaki ʻi ha founga fakaʻofoʻofa mo māʻoniʻoni. Kuó ma mamata ki heʻene hokó.

Fakaʻapaʻapa atu,

Alice mo Philip Huber