“Fekauʻaki mo e Ngaahi Loli Engeengá mo e Kihiʻi Paʻanga e Kau Uitoú,” Liahona, Fēpueli 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Fekauʻaki mo e Ngaahi Loli Engeengá mo e Kihiʻi Paʻanga e Kau Uitoú
Naʻe akoʻi au ʻe he foaki ʻe hoku fohá ʻa ʻene koloa mahuʻingá ki he mahuʻinga ʻo ʻeku ngaahi foaki ki he Fakamoʻuí.
Tā ʻo e foha ʻo e tokotaha faʻu tohí ʻi he maka fakamanatu ʻi ʻOkinauá ʻi he angalelei ʻa e tokotaha faʻu tohí
Ne u sio fakamamaʻu ki he ngaahi ʻotu maka māpele lanu ʻuliʻuli naʻe tuʻu fakalongolongo ʻi he lotolotonga ʻo e ngoue fakaʻofoʻofa ʻi he Paʻake Fakamanatu ʻo e Melino ʻi ʻOkinauá ʻi ʻItomani, ʻOkinaua, Siapaní. Kuo tohitongi ai ha ngaahi hingoa ʻe 200,000 tupu, ʻoku fakamanatua ʻe he ngaahi maká ni ʻa kinautolu ne mole ʻenau moʻuí lolotonga e Tau ʻi ʻOkinauá ʻi he lolotonga ʻo e Tau Lahi ʻa Māmani Hono II.
ʻI heʻemau lue atu ki he tauʻanga meʻalelé ʻi he fakaʻosinga ʻo ʻemau ʻaʻahí, naʻá ku fakatokangaʻi mo hoku uaifí ne ʻikai ke toe toʻo ʻe homa kiʻi fohá ʻene loli engeenga naʻá ne saiʻia taha aí. ʻI heʻema ʻeke ange pe naʻe ʻi fē iá, naʻá ne toe taki kimaua ki he fuʻu maka fakamanatú. Kuó ne fokotuʻu fakalelei ʻene lolí ʻi ha veʻe haʻinga matalaʻiʻakau ne foaki ʻe ha kau ʻaʻahi kehe. ʻI heʻene fofonga malimalí mo fiefiá, naʻe fakahaaʻi mai ʻe homa fohá ʻene foaki ki he meʻa ne fakamanatú.
ʻI heʻemau fakaʻuli ki ʻapí, naʻá ma fakalaulauloto ki heʻene fili taʻesiokitá. Naʻá ne fakatokangaʻi nai ʻa e laumālie makehe ʻo e feituʻu ko iá peá ne ongoʻi kuo pau ke ne foaki ʻene koloa mahuʻinga tahá? Ko e hā ha mahuʻinga ʻe lava ke tānaki atu ʻe ha loli pelesitiki ki he lāngilangi mo e fakamanatu ʻo kinautolu kuo mole ʻenau moʻuí ʻi hení?
Ne tafoki ʻeku fakakaukaú ki he feilaulau fakalelei ʻa e Fakamoʻuí. ʻI ha ngoue fakaʻofoʻofa meimei tatau pē, naʻá Ne feilaulauʻi ʻEne moʻuí koeʻuhí ke fakatauʻatāinaʻi kitautolu mei he angahalá mo e maté mo tau foki ki ʻapi ki heʻetau Tamai Hēvaní. Ko e hā te u lava ʻo foaki ki he Fakamoʻuí pe ki hoku ngaahi tokouá mo e tuofāfiné ʻa ia ʻe feʻunga ke fakahaaʻi ʻaki ʻeku houngaʻiá? Ko e hā hano mahuʻinga ʻo ʻeku ngaahi foakí ʻi hono fakafehoanaki ki Heʻene feilaulaú?
ʻI he pō ko iá, naʻá ku lau ʻi he Kosipeli ʻa Maʻaké fekauʻaki mo e fefine naʻá ne foaki ha kiʻi paʻanga ʻe ua kae foaki ʻe he kakai koloaʻiá ha meʻa ne fuʻu lahi angé. Naʻe ongo ki hoku lotó e folofola ʻa e Fakamoʻuí:
“Ko e fefine [masivá ni] kuó ne lī ki ai ʻa e meʻa lahi hake ʻiate kinautolu fulipē kuo nau lī ki he tukuʻanga koloá:
“… ko ia, ʻi heʻene masivá, kuó ne lī ki ai ʻa ia kotoa pē ne ne maʻú, ʻio, ʻa ʻene moʻuí kotoa pē” (Maʻake 12:41–44).
ʻOku ou tui ʻoku ʻikai fuʻu tokanga ʻa e ʻEikí ki he meʻa ʻoku tau foakí kae tokanga lahi ange ki heʻetau ngaahi holí mo e loto-fakamātoató. Mahalo ko e konga lahi ʻo e ngaahi meʻa te u lava ʻo foakí ʻoku ngali ʻikai mahuʻinga ia ʻi hono fakafehoanaki atu ki he tokoni lahi ʻo hangē ko e maka fakamanatú ʻoku fai ʻe he niʻihi kehé. Ka “ʻoku ʻafioʻi ʻe [he ʻEikí] ʻa e lotó” (1 Samuela 16:7), ko ia ʻe lava ke ʻuhingamālie ʻa hono fakahaaʻi faingofua ʻo e ʻofá, loto-houngaʻiá, pe ngāue tokoní he ʻokú ne fakalāngilangiʻi ʻa Sīsū Kalaisi mo ʻEne feilaulau huhuʻí.
Hangē pē ko e ʻū loli engeengá mo e kiʻi paʻanga ʻa e kau uitoú.